Baiboly Masin̈y io Volan̈an’ny Zan̈ahary nisoratin̈y handeha amintsika jiaby. Mila ianarantsika izio, amy zen̈y ho haintsika Araiky nampanoratra izio. (Jaona 17:3; 2 Timoty 3:16) Koran̈in’i Jehovah Zan̈ahary amizio ao fikasan̈anany momba olombelon̈o ndreky momba tany.—Genesisy 3:15; Apokalypsy 21:3, 4.

Tsisy boky miran̈a amy Baiboly io, fôtony izio zaraiky fo boky ten̈a misy vokany maventy amy fiainan̈an’olo. Izio man̈ampy atsika hangala tahaka toetrin’i Jehovah, karaha ataony fitiavan̈a, famindram-pô, ndreky fahaizan̈a mahinakinaka olo. Izio man̈amia fan̈antinan̈a man̈ampy olo hahavita hiaritry fahorian̈a farany mare. Aviô, Baiboly koa man̈aboely raha jiaby tsy mifan̈araka amy sitrapôn’ny Zan̈ahary, misy amy donia ty.—Salamo 119:105; Hebreo 4:12; 1 Jaona 2:15-17.

Tamy voanalohany tan̈y, Baiboly io nisoratin̈y tamy teny hebreo ndreky aramianin̈y, baka iô griky. Fa izio ziôty efa navoadika amy volan̈a mandilatra 3 000, na izy feno zen̈y na tapany aminany io. Izio boky avoadika amy volan̈a farany maro, aviô izio boky ten̈a miparitaka letrizay. Raha zen̈y tsy mahagaga, fôtony karaha ty raha koran̈in’ny faminanian̈an’ny Baiboly: “Hitorian̈a amy tany jiaby vaovao tsara momba Fanjakan̈a ty [izio hafatra ten̈a koran̈in’ny Baiboly], amy zen̈y firenena jiaby haharen̈y, zay vo ho avy ny farany.”—Matio 24:14.

Hainay tsarabe fa matomboko ankitin̈y hafatra an̈atin’ny Baiboly. Ke zahay koa fa nandika izy ty, nifen̈y mare zahay nan̈aja hafatra an̈atin’izy ty ato. Andraikitry maventy fandikan̈a izio amy fomba marin̈y tsarabe. Soratra Masin̈y—Fandikan-tenin’ny Donia Vaovao amy teny angiley nampiasain̈a tamy fandikan̈a araiky ty. Efa mandilatra 60 taon̈o nan̈aboahan̈a Soratra Masin̈y—Fandikan-tenin’ny Donia Vaovao amy teny angiley io voanalohany, baka iô matetiky izio navaozin̈y. Marin̈y ndraiky fa efa tsara mare fandikan-teny aby zen̈y. Kanefa niova mare teny angiley tan̈atin’ny 50 tato, ke zen̈y nahavy Komitin’ny Fandikan̈a Baibolin’ny Donia Vaovao nanapa-kevitry han̈avao Fandikan-tenin’ny Donia Vaovao (izy feno) amy teny angiley. Tanjon̈onay tsy vitany han̈aboaka Baiboly marin̈y tsarabe fo fa, tianay koa izio hazava salakady ho mora vakian̈a. Amy lahatsoratra aby ty ahitan̈a Fan̈azavan̈a Fan̈ampiny mikoran̈a momba raha sasany nankatsarain̈a amy fandikan-teny ty: “Toro Lalan̈a Arehan̈a Izikoa fa Mandika Baiboly”, “Raha Mampiavaka Fandikan-teny Ty”, “Akôry Navian’ny Baiboly Firaka Amintsika Atỳ?”

Irô olo tia Jehovah Zan̈ahary ndreky manompo izy aby io tihahazo Baiboly marin̈y tsarabe ndreky mora azo. (1 Timoty 2:4) Zen̈y nahavy zahay nan̈aboaka fandikan-teny navaozin̈y amy teny angiley io. Mifen̈y koa zahay mandika izio amy volan̈a farany maro, erakan’ny mety ho vita. Man̈anten̈a zahay sady mivavaka koa, baka fandikan-teny ty hahatsara anao, amy zen̈y anao koa fa ‘mitady Zan̈ahary . . . anao hahita izy ankitin̈y.’—Asan’ny Apostoly 17:27.