1, 2. Nan̈ino ma ten̈a ilain̈y man̈araka raha volan̈inolo pitariky lalan̈a? Ino ivolan̈ana fa karaha pitariky lalan̈a in̈y fo eritreritry io?

IRITRIRETA hely baka izioty misy olo pitondra sambo mamily sambonany an̈ivondranomasin̈y, na olo mandeha amy tany paiky tsisy olo, na koa olo pitondra ropilany an̈abony lan̈itry an̈y. Ino raha ilainolo aby io baka iro tsy ho very? Mila olo na raha iro hitariky lalan̈andro.

² Iritrireta amy zay anao handeha amy tany tsiary hitanao, kanefa misy olo atokisanao von̈ono hitariky anao. Izy efa tamy tany io, baka io hainy tsarabe lalan̈a tokony himboan̈a. Hay tsarabe fa anao tsy ho very izikoa man̈araka raha koran̈iny. Tsisy ny hafa amy pitariky lalan̈a io koa eritreritry io. Izio an̈isany raha ten̈a tsara namiany Jehovah atsika. (Jakoba 1:17) Ho very atsika izikoa tsisy izio, fotony izio han̈ampy atsika hahita lalan̈a tokony himboantsika ndreky tsy hiala amy lalan̈a io. Atsika izio handiniky fan̈ontanian̈a aby ty: 1) Ino ma eritreritry zen̈y, baka io karakory ataonizio koa fa miasa? 2) Karakory tokony hataontsika hiarovan̈a izio, ndreky nan̈ino atsika tokony handiniky eritreritrinolo hafa? 3) Ino hatsaran̈a ho azontsika izikoa madio fo eritreritrintsika?

3. Ino ma dikany volan̈a griky nandikan̈a “eritreritry” io? Ino fahaizan̈a miavaka anan̈antsika?

³ Izikoa zahan̈a volan̈a griky nandikan̈a “eritreritry” io,  “fahaizan̈a an̈aty” mety handikan̈a izio. Manjary mahay raha momba ain̈intsika atsika, fotony manan̈a izio. Olombelon̈o zaraiky fo namiany Zan̈ahary fahaizan̈a io. Atsika afaka mandiniky ain̈intsika, ke atsika tompiny fo mahay na mety raha nataontsika na tsy mety. Izio koa mety han̈ampy atsika hahay hanapakevitry na koa hampitandrin̈y atsika izikoa atsika mila han̈ano fanapahankevitry ratsy. Hilamin̈y eritreritrintsika izikoa nan̈ano raha tsara, kanefa han̈enjiky atsika ndraiky izio, izikoa atsika nan̈ano raha ratsy.

4, 5. a) Ino ivolan̈antsika fa nanan̈a eritreritry io koa Adama ndreky Eva? Nan̈ano karakory iro koa fa nandika lalàn̈any Zan̈ahary? b) Ino ohatra man̈aboaka fa ten̈a niasa eritreritrinolo aby tsy nivadiky taloha tan̈y?

⁴ Efa nataony Zan̈ahary an̈atintsika ao fahaizan̈a io. Nanan̈a eritreritry io koa Adama ndreky Eva. Iro koa fa nanota, iro nen̈atra. (Genesisy 3:7, 8) Nan̈enjiky iro eritreritrindro, kanefa zen̈y efa tsy nahatsara iro. Kinia nidikavindro lalàn̈any Zan̈ahary, baka io iro nanohitry izy. Amy maha lavorary iro, haindro tsarabe raha nataondro tsy nety, fa iro efa tsy afaka nimpody tamy Jehovah eky.

⁵ Mifanohitry amy zen̈y, maro olo tsy lavorary kanefa nan̈araka raha nivolan̈iny eritreritrindro fa tsy nan̈ano karaha nataony Adama ndreky Eva. Karaha ty nivolan̈iny Joba, lelahy tsy nivadiky: “Zaho tsy hiala amy fahamarin̈ananaka, baka io izio tsy hivotsorako foeky, amy zen̈y fonaka tsy han̈amia tsin̈y zaho.” * (Joba 27:6) Joba nan̈araka raha nivolan̈iny eritreritrinany fo, na tamy raha nataony zen̈y na tamy fanapahankevitrinany.  Zen̈y nahavy izy nahavita nivolan̈a fa tsy nan̈amia tsin̈y na nan̈enjiky izy foeky eritreritrinany. Tsy karaha zen̈y ndraiky Davida, fotony izy koa fa tsy nan̈aja Saoly, panjaka voahosotro Jehovah, “nan̈ejiky izy fo fonany.” (1 Samoela 24:5) Ndray nan̈enjiky Davida eritreritrinany, nahatsara izy raha zen̈y, fotony nampianatra izy tsy han̈ampody hadisovan̈anany eky.

6. Ino ivolan̈ana fa samy namian̈a eritreritry io aby olo jiaby?

⁶ Tsy panompony Jehovah zaraiky fo namiany eritreritry io. Apostoly Paoly nivolan̈a: “Iro olo baka amy firenena hafa aby io tsy manan̈a lalàn̈a, kanefa iro man̈ano raha takiny lalàn̈a, fotony efa voajanahary amindro raha zen̈y. Ke isaka iro man̈ano zen̈y, efa mira lalàn̈a aminy ain̈indro zen̈y. Ain̈inany foeky man̈aboaka fa efa voasoratra an̈aty fonany raha ten̈a tiany lalàn̈a koran̈iny, baka io eritreritrinany koa vavolombelon̈o miaraka aminany, ke eritrerinany tompiny fo man̈amia tsin̈y izy na man̈adoso tsin̈y izy.” (Romanina 2:14, 15) Ndray olo araiky tsy mahay lalàn̈any Jehovah, mbala ampatsiaroviny vavolombelon̈o io fo ndraikindraiky, baka izy han̈ano raha mifan̈araka amy toro lalàn̈a Zan̈ahary.

7. Ino mahavy atsika mivolan̈a fa mety ho diso koa eritreritry io ndraikindraiky?

⁷ Ndray izy man̈ano zen̈y, mety ho diso eritreritrintsika io. Izikoa nadin̈anolo pitariky lalan̈a io tany tokony himboan̈a, atsika mety ho very. Mety ho very koa atsika izikoa tsy man̈araka raha koran̈inolo pitariky lalan̈a fa mandeha amy zay tany tiantsika himboan̈a. Karaha zen̈y koa, mety hamitaka atsika eritreritrintsika io izikoa fitiavanten̈a fo mameno fontsika. Izikoa atsika tsy man̈araka toro lalan̈a amy Baiboly ao, tsy ho haintsika foeky han̈avaka ny tsara ndreky ratsy izikoa fa misy fanapahankevitry tsy maintsy ataontsika momba raha maventy araiky.  Izikoa tiantsika hiasa tsarabe eritreritrintsika io, atsika mila mangataka fan̈ahy masin̈y amy Jehovah. Karaha ty nivolan̈iny Paoly: ‘Vavolombelon̈o eraka fan̈ahy masin̈y eritreritrinaka.’ (Romanina 9:1) Tokony hifen̈y mare atsika baka eritreritrintsika hifan̈araka amy taridalan̈a fan̈ahy masin̈y io.

8. a) Ino ma ifandraisany fo ndreky eritreritry, baka io ino ma raha ten̈a tokony hiritriretintsika izikoa fa hanapakevitry? b) Misy olo mivolan̈a: “Eritreritrinaka tsy man̈enjiky zaho.” Nan̈ino ma tsy voatery ampy mivolan̈a zen̈y? (Zahava lamariky amy pazy ambany.)

⁸ Olo sasany koa fa hanapakevitry, eritreritrindro ndreky fondro fo mibeko iro. Iro mety hivolan̈a karaha ty: ‘Eritreritrinaka tsy man̈enjiky zaho.’ Baka amy fo ao hiboahany fan̈irian̈a, ke izikoa mare loatra fan̈irian̈a io an̈aty fonolo araiky, eritreritrinany mety hitariky izy amy lalan̈a diso. Baiboly mivolan̈a karaha ty: “Fo io mamitaka mandilatra raha hafa jiaby, sady sarotro fihezin̈y koa. Azovy ma mahay raha momba izio?” (Jeremia 17:9) Han̈ano raha mamparavoravo Jehovah raha ten̈a tokony hiritriretintsika fa tsy han̈ano raha iriny fontsika. *

9. Karakory ma mavozo Zan̈ahary zen̈y? Ino raha tokony hataontsika koa fa hanapakevitry?

⁹ Izikoa eritreritry mifan̈araka amy raha koran̈iny Baiboly mitariky atsika, ho hita amy fanapahankevitry ataontsika fo fa olo mavozo Jehovah atsika, ke tsy han̈ano zay  raha tiantsika hatao fo. Nanan̈a zo hitaky latety taminolo ta Jerosalema tao Nehemia, fotony izy governera. Kanefa izy tsy nan̈ano zen̈y, fotony tsy tiany foeky hieritreritry fa man̈ano raha halany Jehovah izy, izikoa mampijaly olony Zan̈ahary. Volan̈iny karaha ty: ‘Zaho tsy nan̈ano karaha zen̈y foeky, fotony zaho navozo Zan̈ahary.’ (Nehemia 5:15) Mavozo Zan̈ahary atsika, izikoa atsika mavozo tsao han̈ano raha tsy tiany. Zen̈y mahavy atsika mifen̈y fo hitady toro lalan̈a Zan̈ahary, isaka atsika hanapakevitry.

10, 11. Ino aby toro lalan̈a Zan̈ahary momba figiahantoaka, baka io karakory ahaizantsika fomba han̈arahan̈a toro lalan̈a zen̈y?

¹⁰ Hangala ohatra hely baka atsika momba figiahantoaka. Mety ho hisy namantsika hikaiky atsika antran̈onany an̈y, ke mety ho hisy figiahan̈a. Amy fotoan̈a karaha zen̈y, atsika mila mandiniky: ‘Zaho ma higiaka sa tsy higiaka?’ Ino toro lalan̈a momba zen̈y amy Baiboly ao? Baiboly tsy mandrova atsika higiaka toaka izikoa atao lerany. Izio nidera Jehovah, fotony izy niasa divay natao hamparavoravo fontsika. (Salamo 104:14, 15) Kanefa, halany Zan̈ahary olo man̈ano mamo na man̈ano fety feno fitondranten̈a ratsy. (Lioka 21:34; Romanina 13:13) Ampitovisiny Baiboly aminolo pijangajanga ndreky pandiadia vady olo araiky izikoa mamo. Fahotan̈a maventy amy Zan̈ahary figiahantoaka dila loatra. *—1 Korintianina 6:9, 10.

¹¹ Ten̈a miaro eritreritrintsika toro lalan̈a karaha zen̈y. Izikoa misy naman̈a mikaiky anao han̈ano fety, ke anao mila hanapakevitry higiaka na tsy higiaka, ty raha mila iritriretinao: ‘Karazan̈a fety karakory ma izy ty? Mety hivadiky fety feno fitondranten̈a ratsy ma izy ty, fotony olo  han̈arampo amy figiahan̈a? Zaho ty ma an̈isany olo tia migiaka? Tsiazoazoko ma ain̈inaka izikoa tsy mahazo hely? Zaho ma tsy maintsy mila toaka fo an̈adosoako hen̈amasonaka? Zaho koa fa migiaka ma mba mahay lerany edy?’ Mivavaha baka ho hitanao toro lalan̈anany momba fan̈ontanian̈a aby io. (Vakia Salamo 139:23, 24.) Mira miangavy Jehovah hitariky lalan̈antsika atsika izikoa fa man̈ano zen̈y, sady mampifan̈araka eritreritrintsika amy toro lalan̈anany. Mbala misy raha hafa koa tokony hidinihintsika, koa fa hanapakevitry.

12, 13. Ino mahavy eritreritrintsika tsy mitovy? Akory tokony hataontsika izikoa fa tojy raha karaha zen̈y?

¹² Mety ho gaga anao mahita fa tsy voatery hitovy eritreritriny Kristianin̈y. Misy raha tsy mety aminolo sasany, kanefa ndraiky tsy mampan̈ino olo hafa raha zen̈y, na mety ho tsara aminany foeky. Misy olo tia migiaka hely koa fa miaraka amy naman̈a. Sasany ndraiky tsy tia migiaka foeky. Ino mahavy atsika tsy mitovy karaha zen̈y? Akory hatao izikoa fa hanapakevitry?

¹³ Maro antony tsy mampitovy atsika, fotony atsika samy amy raha niain̈antsika. Mety pigiaka toaka be olo araiky taloha, ke mbala mety miady amizio fo izy firaka izioty. (1 Mpanjaka 8:38, 39) Izikoa olo araiky mbala miady mare hiala amy toaka io, mety ho sarotiny be izy momba izio. Mety hanapakevitry tsy higiaka izy, fotony eritreritrinany tsy man̈omba izy han̈ano zen̈y. Tsy diso izy koa man̈ano zen̈y! Atsika koa tsy tokony ho meloko izikoa tojy raha karaha zen̈y. Izikoa anao tia izy ankitin̈y, anao tsy hanery izy higiaka izikoa izy efa nivolan̈a fa tsy higiaka, na hainao antony na tsy hainao. Mety tsy ho tiany tantarain̈y aminolo foeky raha manahiran̈a izy io.

14, 15. Ino raha tsy nampitovy eritreritrindro Kristianin̈y tamy taonjato voanalohany tan̈y, baka io ino raha nirahiny Paoly natao?

 ¹⁴ Tamy taonjato voanalohany, efa tsy nitovy edy eritreritrindro Kristianin̈y aby io. Sasany tsy nety nihinan̈a hanin̈y navy natao soron̈o tamy sampy. (1 Korintianina 10:25) Kanefa tsy nampan̈ino apostoly Paoly raha zen̈y, izikoa fa nalafo ta bazary. Tsisy dikany tamy Paoly foeky sampy zen̈y, fotony hainy fa Jehovah nan̈amboatra hanin̈y jiaby io fa tsy sampy. Hainy Paoly fa tsy olo jiaby nitovy hevitry taminany. Mety panompo sampy be sasany tamindro io taloha, ke iro koa fa nanjary Kristianin̈y, tsy tiandro foeky raha koa fa momba sampy. Karakory nandaminan̈a raha zen̈y?

¹⁵ Apostoly Paoly nivolan̈a fa ‘atsika matanjaka tokony han̈ampy iro tsy matanjaka, fa tsy han̈ano raha mamparavoravo ain̈intsika tompiny.’ (Romanina 15:1, 3) Nivolan̈a Paoly fa atsika tokony hangala tahaka raha nataony Kristy, ke han̈ano raha hamparavoravo rahalahintsika fa tsy raha hamparavoravo atsika. Naleony Paoly tsy nihina hena toizay han̈ano raha hampalahelo olo araiky nan̈amezany Kristy ain̈inany.—Vakia 1 Korintianina 8:13; 10:23, 24, 31-33.

16. Nan̈ino iro manan̈a eritreritry sarotiny tsy tokony hanery olo hafa han̈araka hevitrindro?

¹⁶ Ndray zen̈y, iro manan̈a eritreritry sarotiny tsy tokony hanery olo hafa han̈araka hevitrindro, izikoa mbala tsisy fitsipiky mazava momba raha zen̈y amy Baiboly. (Vakia Romanina 14:10.) Eritreritrintsika tokony hampiasaintsika hitsaran̈a ain̈intsika fa tsy hitsaran̈a namantsika. Aza adin̈a volan̈a Jesosy ty: “Aza mitsara eky baka anao tsy hitsarain̈y.” (Matio 7:1) Tsisy olo tokony hiady hevitry momba raha miankiny aminy eritreritrinolo tsiaraikiaraiky. Tokony hifen̈y fo atsika hampisy fifankati- avan̈a ndreky fifankahirezan̈a fa tsy han̈ano raha hampalahelo namantsika.—Romanina 14:19.

17. Man̈ano karakory ma eritreritrinolo maro aminandra izioty?

¹⁷ Karaha ty nambarany apostoly Petera: “Ataova fo raha hanan̈anaro eritreritry madio.” (1 Petera 3:16) Tsisy raha bebeny manan̈a eritreritry madio man̈oloan̈a Jehovah zen̈y. Tsy maro olo karaha zen̈y aminandra izioty. Karaha ty nivolan̈iny Paoly momba olo sasany: “Eritreritrindro efa mira nitombohin̈y vy may be in̈y.” (1 Timoty 4:2) Vy koa fa may zen̈y man̈oro, ke izikoa izio mipetaka aminy ain̈y, mampisy holatra ndreky mampadonto. Tsisy ny  hafa amy zen̈y koa eritreritrinolo maro, fotony izio efa tsy man̈ampy iro han̈avaka ny tsara ndreky ny ratsy. Iro ndray man̈ano raha tsy mety, iro efa tsy mahaimen̈atra. Mirehareha aby iro man̈ano raha tsy manjary!

18, 19. a) Nan̈ino mety hahatsara atsika nen̈iny io? b) Ino raha tokony hataontsika izikoa mbala man̈enjiky atsika fo eritreritrintsika, ndray atsika efa nibebaka?

¹⁸ Atsika koa fa man̈ano raha tsy mety, atsika mety hanen̈iny, fotony eritreritrintsika man̈enjiky atsika. Han̈ampy atsika hibebaka zen̈y, ke ho voafafa helokontsika, ndray fahotan̈a maventy nataontsika. Nisy hadisovan̈a maventy nataony Panjaka Davida, kanefa nifafany Zan̈ahary hadisovan̈anany zen̈y, fotony izy nibebaka. Ten̈a halany raha ratsy vitany. Tsy vitanizen̈y fo, tapakevitry  koa izy han̈araka lalàn̈any Jehovah fo. Hainy Davida fa Jehovah “tsara toetry ndreky von̈ono hamafa heloko.” (Salamo 51:1-19; 86:5) Akory fo basy tokony hataontsika, izikoa atsika mbala mahatsiaro diso fo, ndray efa nibebaka ndreky voafafa heloko?

¹⁹ Ndraikindraiky, eritreritrintsika io sarotiny, ke ndray efa ela be atsika nibebaka ndreky niova, izio mbala mety han̈enjiky atsika fo. Izikoa zen̈y raha misy, aleva onon̈o fa Jehovah ten̈a be mandilatra fontsika. Atsika fo mila resy lahatra sady mino fa Jehovah ten̈a tia atsika sady von̈ono hamafa helokontsika. Zen̈y raha ampirisihintsika hataonolo! (Vakia 1 Jaona 3:19, 20.) Olo araiky koa fa manan̈a eritreritry madio zen̈y, sain̈inany ndreky fonany hilamin̈y. Ho ravoravo koa izy ndray miain̈y amy donia ratsy ty. Maro olo nan̈ano fahotan̈a maventy, kanefa iro koa fa nibebaka, iro ravoravo. Izioty, iro tsy vitany manompo Jehovah fo fa eritreritrindro koa milamin̈y.—1 Korintianina 6:11.

20, 21. a) Ino ma antony nan̈anovan̈a boky ty? b) Ino ma raha namiany Jehovah atsika io, baka io karakory tokony hampiasantsika izio?

²⁰ Boky ty natao han̈ampian̈a anao ho ravoravo fo ndreky hanan̈a eritreritry madio, amy fotoan̈any farany amy doniany Satana ty. Tsy ho voakoran̈a ato aby lalàn̈a ndreky toro lalan̈a jiaby amy Baiboly mety hilainao hiritriretin̈y ndreky harahin̈y amy fiain̈ana andavanandra. Tsy voatery ho hisy lalàn̈a mazava momba raha miankiny aminy eritreritrinolo tsiaraikiaraiky ato. Fa natao boky ty, han̈ampian̈a anao hanan̈a eritreritry madio ndreky han̈araka raha koran̈iny Baiboly. “Lalàn̈any Kristy” tsy mira lalàn̈any Mosesy, fotony “lalàn̈any Kristy” mandrisiky Kristianin̈y hampiasa tsara eritreritrinany ndreky toro lalan̈a, fa tsy hanery olo han̈araka fitsipiky voasoratra. (Galatianina 6:2) Jehovah man̈ambela atsika  hifidy zay raha tiantsika hatao. Kanefa, mampatsiaro atsika Baiboly fa tsy tokony hararaotintsika “hanitrian̈a raha ratsy” safidy malalaka namiany Jehovah atsika zen̈y, fa tokony hararaotintsika han̈aboahan̈a amy Jehovah fa atsika ten̈a tia izy ankitin̈y.—1 Petera 2:16.

²¹ Niaraka anao nahay Jehovah, anao efa ‘nampiasa fahaizanao misain̈y’ edy, rango tamy zen̈y firaka izioty. (Hebreo 5:14) Mahatsara anao raha zen̈y. Ho zatra mampiasa fahaizanao misain̈y io anao izikoa isaka anao hanapakevitry, anao mivavaka fo baka Jehovah han̈ampy anao hahita fomba tsara han̈arahanao toro lalan̈a amy Baiboly ao. Ho maro hatsaran̈a ho azonao izikoa toro lalan̈a aby zen̈y fo ambelanao hibeko eritreritrinao. Hanjary karaha olo pitariky lalan̈a in̈y eritreritrinao io, ke izio han̈ampy anao han̈ano fanapahankevitry mamparavoravo Jehovah, Babanao andan̈itry an̈y. Tsy hiala amy fitiavany Zan̈ahary anao izikoa man̈ano zen̈y.