RAIMANDRENY
6: Mahaiza Man̈anatra Tsaiky
KARAKORY MA ZEN̈Y?
Matetiky dikanizio man̈ano raha hahaizany tsaiky aby io raha tokony hataondro. Fa tafiditry amizio koa mampianatra iro na man̈itsy iro amy raha tsy mety ataondro.
NAN̈INO MA RAHA ZEN̈Y TEN̈A ILAIN̈A?
Tatoato raimandreny nanjary tsy tia man̈anatra tsaiky, fotony iro mavozo tsao zanakandro tsy matoky ten̈a eky. Fa hendry raimandreny izikoa man̈amia fitsipiky mifan̈araka tsara amy taon̈ony zanakandro ndreky man̈ampy iro han̈araka izio.
“Mila volan̈iny amindro raha tokony hatao ndreky tsy tokony hatao, baka iro hisy jery lera iro be an̈y. Tsaiky koa tsy anarin̈y, manjary ho diso lalan̈a izy, mira laka tsisy labara.”—Pamela.
INO HEVITRY?
Aza miovaova: Zanakanao koa fa nahavita raha tsara, ankasitraha izy. Fa izy ndraiky koa tsy nan̈araka fitsipiky, faiza izy fa kaza banjain̈a.
“Olo izioty tsy tia anarin̈y. Iry zanako ndraiky tsy man̈ano karaha zen̈y. Safe zaho mifen̈y mankasitraka iro izikoa misy raha tsara ataondro, karaha in̈y moramora aminaka man̈itsy iro, koa fa misy raha tsy pare ataondro.”—Christine.
TOROHEVITRINY BAIBOLY: “Zay raha afafinolo fo hijinjainy.”—Galatianina 6:7.
Mahaiza mipezipezy. Anaro alohany han̈anatra tsaiky, diniha taon̈onany ndreky raha hainy, misy ahaizanaro asa mety liferin̈y fo izin̈y, sa mila anarin̈y izy. Ohatra zioty, efa nifan̈arahanaro lera tokony hampiasandro telefony. Iro koa tsy man̈araka izin̈y, aza imboan̈a mampiasa izio hely. Fa izikoa ndraiky raha tsisy dikany mampaditry iro, aza sarotiny amy zen̈y.
“Zanako koa tsy man̈araka volan̈anaka, dinihiko antsendriky raha io tsao tsy kiniany. Ke izikoa izio tsy kiniany marin̈y, zaho tsy man̈asazy izy fa volan̈iko fo izy. Fa izikoa ndraiky izio raha fa ampodimpody aminany kanefa tsy jireny, izy amiako sazy.”—William.
TOROHEVITRINY BAIBOLY: “Anaro lelahy, kaza mampameloko zanakanaro, baka izy tsy ho kivy.”—Kolosianina 3:21.
Mifen̈a ho be fitiavan̈a. Tsy ho sarotro anarin̈y zanakanaro, izikoa hitandro fa anaro ten̈a tia iro.
“Zanakanay lelahy fa navy nan̈ano raha tsy nety. Nampatsiarovinay izy raha nataony taloha ten̈a namparavoravo zahay. Nazavainay taminany koa fa tsy hampan̈ino izy izikoa izy man̈arin̈y raha tsy mety nataony, avio namianay toky koa izy fa zahay von̈ono fo han̈ampy izy.”—Daniel.
TOROHEVITRINY BAIBOLY: “Fitiavan̈a io maharidraha.”—1 Korintianina 13:4.
