LAHATSORATRA FIANARAN̈A 35
HIRA 123 Ekeo Foana ny Fahefan’i Jehovah
Fomba Han̈ampian̈a irô Olo Nadoso Tsy ho An̈isan’ny Fiangonan̈a
“Ho bebe haravoan̈andrô an-dan̈itry an̈y amy mpanota araiky mibebaka, tozay amin’olo marin̈y 99 tsy mila mibebaka.”—LIOKA 15:7.
HEVITRY HIDINIHIN̈Y
Nan̈ino ma olo sasany mila adoso tsy ho an̈isan’ny fiangonan̈a, baka iô karakôry fomba han̈ampian’ny anti-pan̈ahy olo karaha zen̈y hibebaka ndreky himpody hankasitrahan’i Jehovah ndraiky koa?
1-2. a) Akôry hevitrin’i Jehovah momba olo mpanota kanefa tsy mibebaka? b) Tian’i Jehovah han̈ino olo jiaby nan̈ano fahotan̈a maventy?
TSY kila fitondran-ten̈a zay iken’ny Zan̈ahary Jehovah aby. Izy tsy tia fahotan̈a. (Sal. 5:4-6) Ke izy man̈anten̈a atsika han̈araka didinany amy Baiboly ao. Mazava ho azy fa izy tsy man̈anten̈a fahalavorarian̈a amin’olo tsy lavorary. (Sal. 130:3, 4) Izy koa tsy milefitry amin’olo ‘tsy mavozo Zan̈ahary man̈araraotro hatsaram-pan̈ahinany miavaka han̈anaovan̈a fitondran-ten̈a tsisy hen̈atra.’ (Joda 4) Sady Baiboly koa mikoran̈a “fandripahan̈a olo tsy mavozo Zan̈ahary” amin’ny Aramagedona, adin’ny Zan̈ahary.—2 Pet. 3:7; Apok. 16:16.
2 Fa ndray zen̈y, tsisy olo tian’i Jehovah ho ripaka. Eraka nikoran̈intsika tamindrô lahatsoratra aby talohan’ity, Baiboly mikoran̈a mazava tsara fa “tiany olo jiaby hibebaka.” (2 Pet. 3:9) Irô anti-pan̈ahy kristianin̈y aby io mangala tahaka Jehovah, ke irô mifen̈y hahari-draha man̈ampy olo nan̈ano fahotan̈a maventy hiova, ke himpody hahazo sitraka amy Jehovah ndraiky koa. (Isaia 6:9) Kanefa, tsy olo jiaby nan̈ano fahotan̈a maventy zay vôn̈ono hibebaka aby. Sasany mbala manohy man̈ano fitondran-ten̈a ratsindrô fo, ndray irô anti-pan̈ahy aby io efa nan̈ampy irô impirimpiry, baka irô hibebaka. Ke ino raha mila hatao, izikoa karaha zen̈y ny raha misy?
“ADOSOA AMINARÔ OLO MPAN̈ANO NY RATSY”
3. a) Izikoa Baiboly zahan̈a, tôkony hatao karakôry ma olo araiky tsy mibebaka? b) Izikoa olo araiky tsy mibebaka, nan̈ino ma atsika mivolan̈a fa safidinany hadoso tsy an̈isan’ny fiangonan̈a zen̈y?
3 Izikoa misy olo araiky nan̈ano fahotan̈a maventy kanefa tsy mibebaka, irô anti-pan̈ahy aby io tsy maintsy man̈araka tari-dalan̈a amy 1 Korintianina 5:13 ty: “Adosoa aminarô olo mpan̈ano ny ratsy zen̈y.” Sady efa zen̈y baka safidin’olo nan̈ano fahotan̈a maventy io. Izy a mijinja raha nafafiny. (Gal. 6:7) Nan̈ino ma atsika mivolan̈a zen̈y? Fôtony efa impirimpiry irô anti-pan̈ahy aby io nan̈ampy izy hibebaka, fa izy tsy nan̈eky fan̈ampian̈andrô. (2 Mpanj. 17:12-15) Ke raha ataony man̈aboaka fa izy foeky mifidy tsy han̈araka fitsipikin’i Jehovah.—Deot. 30:19, 20.
4. Izikoa misy olo adoso tsy ho an̈isan’ny fiangonan̈a, nan̈ino ma izio mila han̈anaovan̈a filazan̈a?
4 Izikoa nisy olo nan̈ano fahotan̈a maventy kanefa tsy mibebaka nadoso tsy ho an̈isan’ny fiangonan̈a, hisy filazan̈a atao hivolan̈ana fa olo io efa tsy Vavolombelon̈on’i Jehovah eky. b Ino ma antony an̈anaovan̈a filazan̈a zen̈y? Tsy handeha hangalan̈a baraka olo io tanjon̈o han̈anaovan̈a filazan̈a zen̈y. Fa atao raha zen̈y, baka fiangonan̈a han̈araka torohevitrin’ny Soratra Masin̈y “tsy hifanerasera” amin’olo io eky, na ‘tsy hiaraka hihina aminany foeky.’ (1 Kor. 5:9-11) Misy antony tsara nahavy Jehovah nan̈ano didy zen̈y. Karaha ty nivolan̈in’ny apostoly Paoly: “Levira hely fo efa mampivoha koba jiaby.” (1 Kor. 5:6) Mety hitariky olo tsy ho tapa-kevitry hifen̈y han̈araka fitsipikin’i Jehovah eky irô olo nan̈ano fahotan̈a maventy kanefa tsy mibebaka aby io.—Ohab. 13:20; 1 Kor. 15:33.
5. Akôry tôkony ho fiheverantsika olo araiky nadoso tsy ho an̈isan’ny fiangonan̈a, aviô nan̈ino?
5 Izikoa misy mpiara-manompo araiky nadoso tsy ho an̈isan’ny fiangonan̈a, karakôry tôkony ho fiheverantsika izy? Atsika ndray tsy mifanerasera aminany, atsika tsy tôkony hieritreritry fa efa tsisy raha mety hantinain̈y aminany foeky. Izy tôkony hataontsika karaha ôndrikôndriky very in̈y fo. Izikoa baka misy ôndrikôndriky araiky tafisintaka andiany misy izy, mety mbala himpody fo izy. Tsarova koa fa olo io nanokan-ten̈a tamy Jehovah. Mampalahelo fo, efa tsy miain̈y mifan̈araka amy fanokan̈an-ten̈a nataony in̈y eky izy iziôty. Ke raha zen̈y hampiditry problemo aminany. (Ezek. 18:31) Fa ndray zen̈y, izikoa Jehovah mbala man̈ambela fotoan̈a hamindran̈a fô aminany, atsika tôkony han̈anten̈a fo fa izy mbala himpody. Ke akôry mety han̈ampian’ny anti-pan̈ahy olo araiky nan̈ano fahotan̈a maventy, nadoso tsy ho an̈isan’ny fiangonan̈a?
AKÔRY AN̈AMPIAN’NY ANTI-PAN̈AHY IRÔ OLO NADOSO TSY HO AN̈ISAN’NY FIANGONAN̈A?
6. Ino aby raha ataon’ny anti-pan̈ahy han̈ampian̈a olo araiky nadoso tsy ho an̈isan’ny fiangonan̈a?
6 Izikoa fa misy olo nadoso tsy ho an̈isan’ny fiangonan̈a, irô anti-pan̈ahy aby io ma efa tsy man̈ampy izy himpody amy Jehovah eky? Tsy karaha zen̈y foeky! Izikoa irô fa mikoran̈a amin’olo nan̈ano fahotan̈a maventy kanefa tsy nibebaka io fa izy hadoso tsy ho an̈isan’ny fiangonan̈a, azavain’ny komitin’ny anti-pan̈ahy aminany koa, ino raha mila hataony baka izy ho tafimpody ndraiky amy fiangonan̈a. Fa mbala misy raha beben’izen̈y koa ataondrô anti-pan̈ahy aby io. Matetiky volan̈indrô amin’olo nan̈ano fahotan̈a maventy io fa tiandrô hifanôjy aminany ndraiky afaka fanjava vitsivitsy, baka hahitan̈a asa izy efa nan̈ova toe-tsain̈inany. Izikoa olo nan̈ano fahotan̈a maventy io vôn̈ono hifanôjy amindrô ndraiky, amy fotoan̈a io irô handrisiky izy hibebaka ndreky himpody amy Jehovah. Fa nata izy mbala tsendriky niova amy fotoan̈a hikoran̈andrô aminany io, anti-pan̈ahy aby io mbala han̈ano raha hifanojian̈a aminany ndraiky koa afara an̈y ndreky handrisiky izy hibebaka.
7. Akôry ataondrô anti-pan̈ahy aby io mangala tahaka fahinakinahan’i Jehovah olo, izikoa fa misy olo nadoso tsy ho an̈isan’ny fiangonan̈a? (Jeremia 3:12)
7 Irô anti-pan̈ahy aby io mangala tahaka hinakinakan’i Jehovah lera irô man̈ampy olo nadoso tsy ho an̈isan’ny fiangonan̈a. Ohatra, taloha tan̈y, Jehovah tsy niambin̈y Israelita aby io efa nibebaka vo izy nan̈ampy irô, fa izy nan̈ano raha voanalohany nan̈ampian̈a irô, nata irô tsy honohono hibebaka foeky. Eraka raha efa nikoran̈intsika tamy lahatsoratra faharoe tamin’ny andian-dahatsoratra ty, naboakan’i Jehovah tsarabe hinakinakanany zen̈y tamy vahoakanany. Izy, ohatra, nan̈iraka mpaminan̈y Hosea han̈ampody vadiny, kanefa vadiny io mbala tsy vôly tamy fahotan̈a nataony. (Hosea 3:1; Mal. 3:7) Irô anti-pan̈ahy aby io mangala tahaka Jehovah, ke tiandrô hibebaka olo nan̈ano fahotan̈a io, ndreky himpody ndraiky amy fiangonan̈a, baka iô tsy hataondrô raha hampasarotro fimpodianany io.—Vakia Jeremia 3:12.
8. Nan̈ino ma fan̈oharan̈a nataon’i Jesosy momba zanaka adala in̈y ahitantsika tsarabe fihetseham-pôn’i Jehovah momba irô olo nadoso tsy ho an̈isan’ny fiangonan̈a? (Lioka 15:7)
8 Aleva onon̈o fan̈oharan̈an’i Jesosy momba zanaka adala in̈y, avoakoran̈a tamy lahatsoratra faharoe tamin’ny andian-dahatsoratra ty. Baban’ny tsaiky io izikoa fa nahatazan̈a izy navy lavidavitry tarỳ, karakôry nataony? Izy “nilomoay nitolon̈o zanany io, baka iô izy nirôfiny tam-pitiavan̈a.” (Lioka 15:20) Aleva onon̈o fa babany io tsy niambin̈y zanany nangataka familan-keloko taminany, fa izy direkty nan̈ano raha voanalohany, karaha ataon’ny baba jiaby tia zanaka in̈y fo. Karaha zen̈y raha ataon’i Jehovah amindrô olo jiaby niala izy. Ke irô anti-pan̈ahy aby io koa man̈ano erakan’ny vitandrô hangalan̈a tahaka Jehovah. Tiandrô “himpody” amy Jehovah ndraiky lan̈iany olo niala izy. (Lioka 15:22-24, 32) Izikoa fa misy olo mimpody amy Jehovah, ravoravo mare irô anjely an-dan̈itry an̈y ndreky atsika ambony tany eto!—Vakia Lioka 15:7.
9. Tian’i Jehovah han̈ino ma irô niala taminany aby io?
9 Hitantsika baka tamy raha nianarantsika aby in̈y fa Jehovah tsy man̈ambela olo tsy mibebaka ho an̈isan’ny fiangonan̈a. Zen̈y ndraiky koa tsy mivolan̈a fa irô efa tsy jireny eky. Tiany irô himpody. Raha tsapan’i Jehovah momba irô nan̈ano fahotan̈a maventy nibebaka aby io, voakoran̈a amin’ny Hosea 14:4 ty: “Zaho hampajanga irô ke tsy hivadiky aminaka eky irô. Sitrapônaka ho tia irô, fôtony zaho efa tsy meloko eky.” Ke raha zen̈y mandrisiky anti-pan̈ahy mare hizaha, tsao fo mba efa manomboko mibebaka olo io. Aviô, zen̈y koa tôkony handrisiky mare olo niala tamy Jehovah aby io tsy hangataka andra himpody aminany.
10-11. Akôry hataon’ny anti-pan̈ahy man̈ampy irô olo efa nadoso tsy ho an̈isan’ny fiangonan̈a efa ela aby in̈y?
10 Akôry izikoa olo araiky efa ela nadoso tsy ho an̈isan’ny fiangonan̈a, na mety ho efa taon̈o maro foeky? Irô, ohatra, mety efa tsy man̈ano fahotan̈a nahavy irô nadoso tamy fiangonan̈a in̈y eky. Ndraikindraiky mety efa nadin̈andrô foeky antony nahavy irô nadoso tsy ho an̈isan’ny fiangonan̈a. Fa na karakôry na karakôry, irô anti-pan̈ahy aby io hifen̈y hizaha tany misy irô, ndreky hitsidiky irô. Amy fitsidihan̈a ataondrô io, irô anti-pan̈ahy aby io mety mivavaka miaraka amindrô, ndreky mandrisiky irô am-pitiavan̈a himpody an̈atin’ny fiangonan̈a. Mazava ho azy fa izikoa efa ela be olo io tsy nifandray tamy fiangonan̈a, efa malemy mare ara-pan̈ahinany. Ke izikoa izy mivolan̈a fa izy man̈iry himpody amy fiangonan̈a, irô anti-pan̈ahy aby io mety han̈iraka olo hampianatra Baiboly izy, ndray izy mbala tsendriky voaray. Anti-pan̈ahy aby io fo tôkony handamin̈y fampianaran̈a Baiboly karaha zen̈y.
11 Anti-pan̈ahy aby io mifen̈y mangala tahaka fahinakinahan’i Jehovah olo. Irô mifen̈y man̈ampy olo maro hahay fa mbala mibian̈a amindrô varavaran̈a, izikoa irô himpody. Izikoa misy olo nan̈ano fahotan̈a maventy mibebaka ndreky miala amy fitondran-ten̈a ratsinany, izy efa tôkony hiraisin̈y edy.—2 Kor. 2:6-8.
12. a) Amin’ino aby anti-pan̈ahy ten̈a mila mitandrin̈y? b) Nan̈ino atsika tsy tôkony hihevitry fa tsy mahazo famindram-pôn’i Jehovah fahotan̈a nataon’olo sasany? (Zahava koa lamariky amy pazy ambany.)
12 Amy raha sasany, mila mitandrin̈y mare irô anti-pan̈ahy aby io. Ohatra, izikoa olo araiky nan̈olan̈a tsaiky, na mpivadi-pinoan̈a, na nan̈ano tetiky hisarahan̈a amy vadiny, mila alain’ny anti-pan̈ahy antoko tsarabe fa ten̈a efa nibebaka ankitin̈y olo io. (Mal. 2:14; 2 Tim. 3:6) Irô mila miaro andian’ny ôndrikôndriky aby io. Mila alaintsika onon̈o koa fa Jehovah vôn̈ono handray lan̈iany olo nan̈ano fahotan̈a maventy mibebaka amin’ny ankitin̈y, aviô efa vôly amy raha ratsy nataony. Ke ndray mila mitandrin̈y irô anti-pan̈ahy aby io amindrô olo namitaka olo, irô tsy tôkony hieritreritry fa irô olo aby zen̈y efa tsy hamindran’i Jehovah fô eky. c—1 Pet. 2:10.
INO RAHA METY HATAON’NY FIANGONAN̈A?
13. Ino tsy mampiran̈a fitondrasan̈a olo nahazo fan̈anaran̈a ndreky olo nadoso tsy ho an̈isan’ny fiangonan̈a?
13 Erakan’ny nikoran̈intsika tamy lahatsoratra talohan’ity, ndraikindraiky misy filazan̈a fa olo araiky namian̈a fan̈anaran̈a. Dikan’izen̈y, atsika mbala afaka mifanerasera amin’olo io. Haintsika baka fa izy nibebaka ndreky niala tamy fitondran-ten̈a ratsinany io. (1 Tim. 5:20) Izy baka mbala an̈isan’ny fiangonan̈a ndreky mila fankahirezan̈a baka amy fiarahan̈a amy mpiara-manompo. (Heb. 10:24, 25) Kanefa tsy karaha zen̈y foeky izikoa olo araiky nadoso tsy ho an̈isan’ny fiangonan̈a. Atsika efa ‘tsy mifanerasera aminany eky’ ndreky ‘tsy miaraka mihina aminany foeky.’—1 Kor. 5:11.
14. Izikoa fa misy olo nadoso tsy ho an̈isan’ny fiangonan̈a, akôry mety ampiasain’ny Kristianin̈y feon’ny fieritreretan̈anany voataizan’ny Baiboly? (Zahava koa sary.)
14 Toromariky amy 1 Korintianina 5:11 io ma midika fa atsika tsy afaka mikaiky olo nadoso tsy ho an̈isan’ny fiangonan̈a han̈aton̈o fivorian̈a ndreky tsy han̈ano mbalatsara izy, izikoa izy fa avy amy fivorian̈a? Ehe. Marin̈y ndraiky fa atsika tsy hifanerasera amin’olo io. Kristianin̈y tsiaraikiaraiky mila mampiasa feon’ny fieritreretan̈anany efa voataizan’ny Baiboly, hanapa-kevitry hikaiky na tsy hikaiky olo nadoso tsy ho an̈isan’ny fiangonan̈a han̈aton̈o fivorian̈a, karaha ataon’ny havan̈a na kamaradinany mare taloha. Akôry izikoa izy avy? Taloha atsika tsy nan̈ano mbalatsara olo karaha zen̈y, izikoa irô avy mivory. Eto koa, Kristianin̈y tsiaraikiaraiky mila mampiasa feon’ny fieritreretan̈anany efa voataizan’ny Baiboly, hanapa-kevitry amy zen̈y. Mety tsy hampan̈ino olo sasany han̈ano mbalatsara hely na handray olo io izikoa izy efa amy fivorian̈a an̈y. Fa ndray zen̈y, atsika tsy tôkony hivalampatra hikoran̈a aminany na hifanerasera aminany.
Kristianin̈y mety mampiasa feon’ny fieritreretan̈andrô voataizan’ny Baiboly izikoa fa hanapa-kevitry hikaiky olo nadoso tsy ho an̈isan’ny fiangonan̈a han̈aton̈o fivorian̈a na han̈ano mbalatsara hely olo io, izy koa fa avy man̈aton̈o fivorian̈a (Zahava fehintsoratra 14)
15. Karazan̈a fahotan̈a karakôry ma koran̈in’ny 2 Jaona 9-11? (Zahava koa efajoro “ Mitovy Fo ma Karazan̈a Fahotan̈a Nikoran̈in’i Jaona Ndreky Paoly Io?”)
15 Mety hisy olo hieritreritry: ‘Baiboly ma tsy mivolan̈a fa izikoa misy Kristianin̈y araiky man̈ano mbalatsara olo karaha zen̈y, izy manohan̈a raha ratsy ataony?’ (Vakia 2 Jaona 9-11.) Andinin-teny man̈odidin̈y izio man̈aboaka fa tari-dalan̈a zen̈y tôkony harehan̈a izikoa olo io mpivadi-pinoan̈a na mandrisiky olo han̈araka fitondran-ten̈a ratsy. (Apok. 2:20) Ke izikoa olo araiky man̈aparitaka fampianaran̈an’ny mpivadi-pinoan̈a na fahotan̈a maventy hafa, anti-pan̈ahy aby io tsy han̈ano fandaharan̈a hitsidihan̈a izy. Fa ndray zen̈y, olo zen̈y mety mbala hibebaka fo andra araiky an̈y. Fa mandra-pavian’izen̈y, atsika tsy tôkony han̈ano mbalatsara olo karaha zen̈y foeky ndreky tsy hikaiky izy han̈aton̈o fivorian̈a.
ALEVA TAHAKA HINAKINAKA NDREKY FAMINDRAM-PÔN’I JEHOVAH
16-17. a) Tian’i Jehovah han̈ino irô mpanota aby io? (Ezekiela 18:32) b) Akôry ataondrô anti-pan̈ahy aby io miaraka miasa amy Jehovah izikoa fa man̈ampy olo nan̈ano fahotan̈a maventy?
16 Ino ma raha nianarantsika tamin’ny andian-dahatsoratra misy fizaran̈a dimy ty? Tsisy olo tian’i Jehovah ho ripaka! (Vakia Ezekiela 18:32.) Tiany olo mpanota hihavan̈a ndraiky aminany. (2 Kor. 5:20) Zen̈y nahavy Jehovah rango zay, impirimpiry nandrisiky vahoakanany tsy nan̈araka volan̈anany aby io ndreky olo tsiaraikiaraiky hibebaka ke himpody aminany. Anti-pan̈ahy amy fiangonan̈a manan̈a tombontsoa hiaraka hiasa amy Jehovah, han̈ampy olo nan̈ano fahotan̈a maventy hibebaka.—Rom. 2:4; 1 Kor. 3:9.
17 Iritrireta hely baka haravoan̈an’ny anjely an-dan̈itry an̈y, izikoa fa misy mpanota mibebaka! Jehovah Babantsika an-dan̈itry an̈y ten̈a ravoravo, izikoa misy ôndrikôndrikinany very, mimpody ndraiky amy fiangonan̈a. Ke lôso mahaitiantsika fo Jehovah izikoa atsika fa misaintsain̈y hinakinakanany, famindram-pônany, aviô hatsaram-pan̈ahinany miavaka.—Lioka 1:78.
HIRA 111 Maro ny Antony Mahafaly Antsika
a Amy lahatsoratra ty, lelahy fo voakoran̈a ho nan̈ano fahotan̈a maventy. Fa ndray zen̈y, fan̈azavan̈a jiaby ato koa mihatra amy man̈angy.
b Efa tsy olo voaroaka eky ikahiantsika olo karaha zen̈y. Ke mifan̈araka tsara amy volan̈a nampiasain’i Paoly amy 1 Korintianina 5:13, karaha ty ikahiantsika irô amy ziôty: Olo nadoso tsy ho an̈isan’ny fiangonan̈a.
c Koran̈in’ny Baiboly fa misy olo sasany tsy mahazo familan-keloko, fôtony irô tapa-kevitry hanohitry Zan̈ahary fo. Fa ndray zen̈y, Jehovah ndreky Jesosy zaraiky fo mahay azôvy olo tsy mahazo familan-keloko.—Marka 3:29; Heb. 10:26, 27.
