1-2. Mpianatran’i Jesosy aroe koa fa tamy lalan̈a handeha ta Emaosy, ino raha nisy?

 TAMY zen̈y 16 Nisana, taon̈o 33. Mpianatran’i Jesosy aby io nalahelo mare ndreky navozo. Aroe tamindrô niala ta Jerosalema nandeha ta Emaosy, tanàna kadiriny 11 kilometara miala a Jerosalema. Irô kivy mare, fôtony Jesosy olo narehandrô vo baka nivonen̈a. Ke karaha ravan̈a tan̈y raha nantinaindrô fa hataon’i Mesia. Fa baka tiô, nisy raha tsy nampoizindrô nandalo.

² Tiô fo, nisy lelahy araiky nan̈aton̈o irô roe lahy ke nan̈ano dia araiky tamindrô. Nitantaraindrô taminany fa irô kivy tamy raha nahazo Jesosy. Lelahy io amy zay nikoran̈a raha tsy ho adin̈andrô foeky. “Nanomboko tamy Mosesy firaka tamindrô mpaminan̈y aby io”, nazavainy tamindrô nan̈ino Mesia tsy maintsy nijaly ndreky naty. Irô telo lahy koa fa navy ta Emaosy, nambaran’ny lelahy io azôvy izy: Jesosy efa baka nivilômin̈y! Misaora ravoravo mare irô mpianatra aby io, izikoa fa nahay fa velon̈o Mesia!​—Lioka 24:13-35.

3-4. Ino ma raha nandalo tamy mpianatran’i Jesosy, baka iô ino raha hianarantsika amy lahatsoratra ty? (Asan’ny Apostoly 1:3)

³ Jesosy natetiky niboaka tamy mpianatranany, tan̈atin’ny 40 andra farany niain̈any tambony tany tatỳ. (Vakia Asan’ny Apostoly 1:3) Ino vokatra zen̈y tamindrô mpianatranany nalahelo ndreky navozo aby io? Irô lôso ravoravo, natoky ten̈a, aviô  nisy korazy nitory vaovao tsaran’ny Fanjakan̈an’ny Zan̈ahary ndreky nampianatra. a

⁴ Hahazo hatsaran̈a atsika izikoa mandiniky raha nataon’i Jesosy tan̈atin’ny fotoan̈a io. Amy lahatsoratra ty, hizahantsika akôry nataon’i Jesosy nampiasa fotoan̈a io 1) hankahirezan̈a mpianatranany, 2) han̈ampian̈a irô hahay tsarabe Soratra Masin̈y, aviô 3) hampiofan̈ana irô baka han̈ano andraikitry maro maventy. Hizahantsika koa akôry hangalantsika tahaka môdelinany.

ANKAHIREZA OLO HAFA

5. Nan̈ino ma nila nankahirezin̈y irô mpianatran’i Jesosy aby io?

⁵ Ten̈a nila nankahirezin̈y irô mpianatran’i Jesosy aby io. Sasany tamindrô io niala tran̈o, fianakavian̈a aviô asandrô, ke nan̈araka Jesosy. (Mat. 19:27) Sasany ndraiky nampijalin̈y, fôtony nanjary mpianatranany. (Jaona 9:22) Nahavita nan̈ano sôron̈o jiaby zen̈y irô, fôtony irô nino fa izy Mesia nampan̈antinain̈y. (Mat. 16:16) Fa Jesosy koa fa nivonen̈a, diso fan̈antinan̈a irô, baka iô kivy mare.

6. Jesosy koa fa baka nivilômin̈y, ino ma raha nataony?

⁶ Hain’i Jesosy fa tsy diso irô mpianatranany aby io koa nalahelo, izikoa izy fa nivonen̈a. Izy tsy nieritreritry fa irô tsy ampy finoan̈a. Ke niaraka izy nivilômin̈y, izy direkty nandeha nankahery irô kamaradiny aby io. Ohatra, izy niboaka tamy Maria Magdalena nitomoan̈y mare tamy fasan̈anany tiô. (Jaona 20:11, 16) Baka iô koa, izy niboaka tamy mpianatra aroe nikoran̈intsika tan̈abo tarỳ in̈y. Aviô koa izy niboaka tamin’ny apostoly Petera. (Lioka 24:34) Ke ino raha ianarantsika baka amy Jesosy? Diniha baka raha nandalo tamin’izy niboaka tamy Maria Magdalena.

7. Eraka Jaona 20:11-16, ino ma raha hitan’i Jesosy nataon’i Maria, tamy maraindrain̈in’ny 16 Nisana, aviô nandrisiky Jesosy han̈ino ma raha zen̈y? (Zahava koa sary.)

⁷ Vakia Jaona 20:11-16. Mbala maraindrain̈y be tamy 16 Nisana, nisy man̈angy vitsivitsy tsy nivadiky, nandeha tamy tany nandivenan̈a Jesosy. (Lioka 24:1, 10) Alô hidinihintsika araiky amindrô io, i Maria Magdalena. Izy koa fa navy tamy fasan̈a tiô, zahany  fasan̈a io foan̈a. Izy baka tiô nilomoay nandeha nivolan̈a izio tamy Petera ndreky Jaona. Aviô amy zay irô roe lahy nilomoay nandeha tamy fasan̈a tan̈y, fa Maria nan̈araka irô baka tafara. Fa izikoa fa hitandrô fa foan̈a ankitin̈y fasan̈a io, irô nandeha nody. Fa Maria ndraiky tsy nody. Izy nidôko tiô fo nitomoan̈y. Tsy hainy foeky fa hitan’i Jesosy izy tamin’io. Jesosy nandiniky man̈angy nalahelo mare izy io, ke tihankahery izy. Ke izy niboaka tamy Maria. Izy nan̈ano raha tsotra fa ten̈a nankahery i Maria. Jesosy nikoran̈a taminany, aviô nan̈iraka izy han̈ambara vaovao maventy tamindrô rahalahiny aby io fa efa nivilômin̈y izy.​—Jaona 20:17, 18.

8. Akôry hangalantsika tahaka Jesosy?

⁸ Akôry hangalantsika tahaka Jesosy? Mangala tahaka Jesosy atsika, izikoa mandrisiky irô rahalahy ndreky ranabavintsika aby io hanohy fo hanompo Jehovah. Ke mila mandiniky raha sarotro mahazo irô atsika, baka iô mahay mahinakinaka koa fa mikoran̈a amindrô. Diniha baka raha nahazo ranabavintsika araiky, i Jocelyne. Rahavaviny takan’ny aksidan mare ke naty. Ho Jocelyne: “Nalahelo fo zaho tan̈atin’ny fanjava maro.” Fa nisy olo fivadiany nikaiky izy nandeha tamindrô, baka iô nitandren̈y izy tsarabe, ndreky nan̈amia toky izy fa izy ten̈a valera amy Zan̈ahary. Ke ho Jocelyne: “Jehovah mira nampiasa irô fivadiany io han̈antsory zaho baka tan̈aty ranomasin̈y misy daroba be in̈y, ke nametraka zaho tan̈aty lakan̈a fan̈avotan̈a olo. Lôso tihanompo Jehovah ndraiky zaho nohon’ny fan̈ampiandrô.” Hahavita hankahery olo koa atsika, izikoa tandrin̈esantsika tsarabe irô mikoran̈a raha an̈atin’ny fôndrô, sady mahay mahinakinaka izikoa fa mikoran̈a amindrô. Atsika amy zen̈y handrisiky irô hanohy hanompo Jehovah fo.​—Rom. 12:15.

AMPIA OLO HANDINIKY BAKA AMY SORATRA MASIN̈Y

9. Ino raha sarotro natrefindrô mpianatran’i Jesosy aby io, aviô karakôry nataony nan̈ampy irô?

⁹ Irô mpianatran’i Jesosy aby io nan̈eky Volan̈an’ny Zan̈ahary, baka iô irô nifen̈y nan̈araka izio tamy fiain̈anandrô. (Jaona 17:6) Fa raha nampiasaloha irô fo, nan̈ino Jesosy nivonen̈a karaha olo mpamono olo. Hain’i Jesosy fa irô io nanan̈a finoan̈a ndreky ten̈a tia Jehovah, fa irô fo nila nampian̈a baka hahay tsarabe raha nivolan̈in’ny Soratra Masin̈y. (Lioka 9:44, 45; Jaona 20:9) Ke izy nampianatra irô hahay tsarabe dikan’ny raha vakindrô an̈atin’ny Soratra Masin̈y. Diniha baka akôry nan̈anaovany zen̈y, izy koa fa niboaka tamindrô mpianatra aroe tamy lalan̈a nandeha ta Emaosy in̈y.

10. Akôry nataon’i Jesosy nandresy lahatra irô mpianatranany aby io fa izy Mesia ankitin̈y? (Lioka 24:18-27)

¹⁰ Vakia Lioka 24:18-27. Aleva onon̈o fa Jesosy tsy nivolan̈a tamy mpianatra aroe io azôvy izy, fa izy nan̈ontany irô. Nan̈ino? Fôtony mety tiany baka irô han̈aboaka raha tan̈aty jerindrô ndreky tan̈atin’ny fôndrô. Irô nivolan̈a taminany fa irô nan̈anten̈a fa Jesosy han̈avotro Israely amy fampijalian’ny Romanin̈y. Ke izikoa irô fa baka nan̈ambara raha nampiasaloha irô io, Jesosy nampiasa Soratra Masin̈y nan̈ampian̈a irô roe lahy io hahay tsara raha nandalo io. b Baka iô mbala alin̈y io fo, izy fanôjy mpianatra sasany, ndreky nan̈azava tamindrô dikan’ny faminanian̈a aby io. (Lioka 24:33-48) Ino raha ianarantsika baka tamy tantara io?

11-12. a) Ino raha ianarantsika baka amy fomba nampianaran’i Jesosy fahamarin̈ana amy Baiboly? (Zahava koa sary.) b) Akôry nataon’olo nampianatra Baiboly Nortey nan̈ampy izy?

¹¹ Akôry hangalantsika tahaka Jesosy? Voanalohany,  anao koa fa mampianatra Baiboly, mahaiza man̈apetraka fan̈ontanian̈a mety tsara, baka olo han̈aboaka raha an̈aty jerindrô ndreky fôndrô. (Ohab. 20:5) Ke izikoa fa hainao raha an̈aty fôndrô, ambarà irô karakôry atao mizaha andinin-teny mifan̈araka tsarabe amy raha iain̈andrô io. Baka iô mifen̈a tsy hivolan̈a amindrô ino raha tôkony hataondrô. Fa ampia irô hahay tsarabe raha koran̈in’ny Soratra Masin̈y io ndreky hahita akôry fomba mety han̈arehan̈a torolalan̈an’ny Baiboly io amy fiain̈anandrô. Diniha baka raha nahazo Nortey, rahalahy baka a Ghana.

¹² Nortey nanomboko nianatra Baiboly tamin’izy 16 taon̈o. Fa tsy ela tafaran’izen̈y, nanohitry izy fianakavian̈anany. Ino raha nan̈ampy izy hanohy fo? Olo nampianatra Baiboly izy nampiasa Matio toko faha-​10 nan̈azavan̈a taminany fa ten̈a Kristianin̈y tsy maintsy injehin̈y. Ke ho Nortey: “Ke izikoa fa nisy fan̈injehan̈a in̈y, zaho ten̈a natoky fa zaho nahita fahamarin̈ana.” Mpampianatranany koa nan̈ampy izy handiniky raha volan̈in’ny Matio 10:16, baka izy hitandrin̈y tsara ndreky han̈aja fo izikoa fa mikoran̈a raha momba fivavahan̈a amin’olo an-tran̈ondrô ao. Ke Nortey koa fa vita batisa, izy tihan̈ano mpisava lalan̈a, fa babany ndraiky nan̈anten̈a izy hianatra tamin’ny iniversite. Tsy nivolan̈in’ny mpampianatranany tamy Nortey ino raha mila ataony. Fa izy nampiasa fan̈ontanian̈a nan̈ampian̈a izy handiniky torolalan̈an’ny Baiboly, baka hahay hanapa-kevitry tsara. Ke ino vokany? Nortey nanapa-kevitry nan̈ano fanompoan̈a manontolo andra. Fa izy baka tiô nitoravan’ny babany. Karakôry fahitan’i Nortey raha nahazo izy io? Ho izy: “Zaho resy lahatra fa ten̈a tsara safidy nataoko in̈y.” Ke izikoa atsika man̈ampy olo hahay handiniky baka amy Soratra Masin̈y, atsika han̈ampy irô hankafatatra finoan̈andrô ndreky hanohy hanompo Jehovah fo.​—Efes. 3:16-19.

AMPIOFÀN̈A RAHALAHY ABY IO HANJARY ‘LELAHY NATAO KADÔ’

13. Akôry nataon’i Jesosy baka ho hisy olo fo hanohy asan’ny Babany io? (Efesianina 4:8)

¹³ Tamy Jesosy tambony tany tatỳ, izy nan̈ano tsarabe raha nan̈irahan’ny Babany izy. (Jaona 17:4) Fa Jesosy fo tsy nanan̈a toe-tsain̈y ty: ‘Izikoa tianao ho vita tsara raha araiky, mila anao fo man̈ano izy.’ Tan̈atin’ny telo taon̈o nan̈anaovany fanompoan̈a, izy nampiofan̈a olo. Aviô talohan’izy nanonga tan-dan̈itry,  izy nan̈ankin̈y tamy mpianatranany aby io andraikitry hikarakara ôndrikôndrikin’i Jehovah aviô hitariky tamin’ny asa fitorian̈a ndreky fampianaran̈a. Sasany tamindrô mpianatra aby io mety mbala tsendriky ampy 30 taon̈o. (Vakia Efesianina 4:8) Karakôry nampiasan’i Jesosy irô 40 andra farany niain̈any tambony tany tatỳ, nan̈ampian̈a irô lelahy nanokan-ten̈a ndreky tsy nivadiky aviô nazoto niasa aby io hanjary ‘lelahy natao kadô’?

14. Karakôry nan̈ampian’i Jesosy mpianatranany handroso ara-pan̈ahy tan̈atin’ny 40 andra farany niain̈any tambony tany tatỳ? (Zahava koa sary.)

¹⁴ Jesosy nan̈amia torohevitry han̈ampy irô mpianatranany aby io. Fa tsara fan̈ahy fo izy koa fa nan̈ano zen̈y. Ohatra, hitany baka fa sasany tamindrô mpianatra aby io nora nisalasala, ke izy nan̈amia torohevitry irô. (Lioka 24:25-27; Jaona 20:27) Izy koa nan̈iraka irô hifantoko tsarabe tamin’ny asa fikarakaran̈a ôndrikôndriky fa tsy tamin’ny asa velon-ten̈a nataondrô. (Jaona 21:15) Izy koa nampatsiaro irô tsy hampiran̈a raha vitandrô amy fanompoan̈a, amy raha vitan’olo. (Jaona 21:20-22) Baka iô, izy nan̈itsy hevitry diso sasany nanan̈andrô momba Fanjakan̈an’ny Zan̈ahary ndreky nan̈ampy irô hifen̈y tamy fitorian̈a vaovao tsara. (Asa. 1:6-8) Ino raha ianaran’ny anti-pan̈ahy baka amy Jesosy?

15-16. a) Akôry mety hangalan’ny anti-pan̈ahy aby io tahaka Jesosy? Hazavà. b) Ino hatsaran̈a nazon’i Patrick baka tamy torohevitry nazony?

¹⁵ Akôry hangalan’ny anti-pan̈ahy tahaka Jesosy? Irô mila man̈ampy ndreky mampiofan̈a irô rahalahy aby io, an̈isan’izen̈y tanora aby io, baka irô hahavita han̈ano andraikitry bebe c. Haindrô anti-pan̈ahy aby io fa mbala maro raha mila ampianarin̈y irô rahalahy aby io. Ke irô anti-pan̈ahy aby io mila tsara fan̈ahy han̈amia torohevitry irô, amy zen̈y irô hanetry ten̈a, ho azo atokisan̈a, ndreky vôn̈ono han̈ampy olo.​—1 Tim. 3:1; 2 Tim. 2:2; 1 Pet. 5:5.

¹⁶ Diniha baka hatsaran̈a nazon’ny rahalahy araiky kahian̈a Patrick, tamy torohevitry nazony. Tamin’izy tanora, matetiky izy masiasiaka mivolan̈a, ndreky tsy tsara fan̈ahy tamin’ olo, firaka tamy ranabavy. Nisy anti-pan̈ahy araiky matotro navoamariky fahalimian̈anany zen̈y. Anti-pan̈ahy io nan̈amia torohevitry izy tsy niolakolaka, kanefa tsara fan̈ahy koa izy. Ke ho Patrick: “Ravoravo mare zaho fôtony anti-pan̈ahy io nan̈aboaka taminaka, ino raha mbala mila hivoako. Zaho baka natetiky kivy, izikoa fa nahita rahalahy hafa nahazo tombontsoam-panompoan̈a niriko mare. Fa torohevitrin’ny anti-pan̈ahy io nan̈ampy zaho hahita fa tsy fazahoan̈a tombontsoam-panompoan̈a amy fiangonan̈a ten̈a raha maventy, fa mila mifen̈y manetry ten̈a ke man̈ampy irô rahalahy ndreky ranabavy aby io.” Ke vokany, Patrick voatendry anti-pan̈ahy tamin’izy 23 taon̈o.​—Ohab. 27:9.

17. Akôry nan̈aboahan’i Jesosy fa izy natoky mpianatranany aby io?

¹⁷ Tsy hitory fo nan̈irahan’i Jesosy irô mpianatra aby io fa hampianatra koa. (Mat. 28:20) Irô mpianatra aby io nety nieritreritry fa tsy ho vitandrô raha nan̈irahan’i Jesosy irô io. Kanefa Jesosy natoky fa ho vitandrô asa io, ke irô nirahiny nan̈ano izio. Izy natoky tsarabe nivolan̈a: “Baba nan̈iraka zaho, ke zaho koa man̈iraka anarô.”​—Jaona 20:21.

18. Akôry hangalan’ny anti-pan̈ahy tahaka Jesosy?

¹⁸ Akôry hangalan’ny anti-pan̈ahy tahaka Jesosy? Anti-pan̈ahy ampy traikefa mazoto mizara andraikitry. (Fil. 2:19-22) Ohatra, irô mety man̈iraka irô tanora aby io man̈adio ndreky mikobaby Tran̈o Fivorian̈a. Anti-pan̈ahy aby io afaka man̈amia irô tanora aby io raha hataondrô ndreky mampiofan̈a irô han̈ano zen̈y. Baka iô matoky sady man̈ambela irô han̈ano asa io. Misy rahalahy araiky vo voatendry anti-pan̈ahy, Matthew an̈arany. Izy ten̈a mankasitraka raha ataondrô anti-pan̈ahy za-draharaha aby io aminany. Irô mampiofan̈a tsarabe izy han̈ano asa isan-karazany, baka iô matoky sady man̈ambela izy hankefa zen̈y. Ho izy: “Ten̈a nahazo hatsaran̈a zaho fôtony irô nan̈ampy zaho hianatra baka tamin’ny hadisovan̈a nataoko, ndreky nan̈ampy zaho hahaihankatsara fo.” d

19. Tôkony ho tapa-kevitry han̈ino atsika?

¹⁹ Jesosy nampiasa irô 40 andra farany niain̈any tambony tany tatỳ, hankahirezan̈a, hampianaran̈a, baka iô hampiofan̈ana olo. (1 Pet. 2:21) Irarian̈a koa atsika han̈araka marikitry raha nataony zen̈y. Izy han̈ampy atsika han̈ano zen̈y. Sady izy koa efa nampan̈anten̈a: “Hiaraka aminarô fo zaho isan’andra, firaka amy faran’ny donia ty.”​—Mat. 28:20.