1-2. Ino ma mampasambatra mpanompon’ny Zan̈ahary? (Jakoba 1:22-25)

 TIAN’I Jehovah ndreky Zanany ten̈a tiany io atsika ho sambatra. Mpanoratra Salamo 119:2 mivolan̈a karaha ty: “Sambatra lan̈iany olo man̈araka fampatsiarovan̈anany, dikan’izen̈y olo mitady izy amy fô jiaby.” Jesosy koa nivolan̈a: “Zay olo mitandren̈y Volan̈an’ny Zan̈ahary ke mitandrin̈y zen̈y fo sambatra!”​—Lioka 11:28.

² Atsika mpanompon’ny Zan̈ahary io vahoaka sambatra. Fôtony nan̈ino? Maro antony mahasambatra atsika, fa an̈isan’ny antony araiky maventy amy zen̈y, atsika mamaky Baiboly tsy tapaka ndreky mifen̈y man̈araka raha ianarantsika.​—Vakia Jakoba 1:22-25.

3. Ino aby hatsaran̈a ho azontsika izikoa atsika man̈araka raha vakintsika amy Baiboly ao?

³ Maro hatsaran̈a azontsika izikoa atsika “manjary mpan̈araka volan̈a.” Ohatra araiky amy zen̈y, mamparavoravo Jehovah atsika, ke raha zen̈y mamparavoravo atsika koa. (Mpito. 12:13) Baka iô koa, atsika koa man̈araka torohevitry ambaran’ny Baiboly ao, manjary mihavan̈a tsara amy fianakavian̈antsika, ndreky amin’olo fiangonan̈a araiky amintsika. Mety efa karaha zen̈y raha misy amy fiain̈ananao iziôty. Fan̈ampin’izen̈y koa, maro problemo avoa olo tsy man̈araka didin’ny Zan̈ahary, tsy ho voa atsika. Mira raha volan̈in’ny Mpanjaka Davida koa raha tsapantsika. Izy koa fa baka nikoran̈a momba lalàn̈an’i Jehovah, lamin̈y ataon’i Jehovah ndreky fitsaran̈an’i Jehovah, karaha ty faran’ny volan̈anany: “Be ankitin̈y rady azon’olo mitandrin̈y fampatsiarovan’i Jehovah.”​—Sal. 19:7-11.

4. Nan̈ino tsy voatery ho mora fo man̈araka raha vakintsika amy Baiboly?

 ⁴ Mazava ho azy fa tsy voatery ho mora amintsika fo hamaky Baiboly ndreky han̈araka raha ianarantsika an̈atin’izio ao. Atsika maro raha atao, kanefa tsy maintsy mangala fotoan̈a koa hamakian̈a ndreky hianaran̈a Baiboly, baka hazava amintsika tsarabe raha tian’i Jehovah hampan̈anaovin̈y atsika. Ke atsika iziôty hizaha soso-kevitry sasany hahavy atsika hahavita hamaky Baiboly isan’andra. Hidinihintsika koa ino raha hahavy atsika hieritreritry tsarabe ndreky hahita fomba han̈arehan̈a raha ianarantsika ao amy fiain̈anantsika.

MANOKÀNA FOTOAN̈A HAMAKIAN̈A VOLAN̈AN’NY ZAN̈AHARY

5. Ino ma raha sasany tsy maintsy ataontsika ke mety handany fotoan̈antsika?

⁵ Ankamarozan’ny vahoakan’i Jehovah ten̈a maro raha atao. Atsika mandany fotoan̈a maro an̈anaovan̈a andraikitry isan-karazany takin’ny Soratra Masin̈y. Ohatra, ankamarozantsika mila miasa, hamilaoman-ten̈a ndreky fianakavian̈a. (1 Tim. 5:8) Maro koa Kristianin̈y mikarakara havan̈a marary na matoe. Mila fotoan̈a koa ikarakaran̈a fahasalaman̈antsika tômpiny. Fa mbala misy andraikitry maventy koa atsika amy fiangonan̈a. An̈isan’ny andraikitrintsika faran’ny maventy io, man̈ano ny faran’ny tsara mety vitantsika amy fitorian̈a vaovao tsara. Ke amindrô raha jiaby tsy maintsy ataonao zen̈y, akôry ahitanao fotoan̈a hamakian̈a Baiboly tsy tapaka, hisaintsain̈ana raha vakinao ndreky han̈arahan̈a raha koran̈in’izio ao?

6. Akôry mety hataonao baka anao hahavita hamaky Baiboly fo? (Zahava koa sary.)

⁶ Famakian̈a Baiboly io an̈isan’ny raha ten̈a maventy amintsika Kristianin̈y, ke izio tôkony hataontsika voalohan-toeran̈a. (Fil. 1:10) Karaha ty koran̈in’ny Salamo voanalohany ao, izikoa fa nikoran̈a momba olo sambatra in̈y: “Lalàn̈an’i Jehovah fo tiany, ke lalàn̈anany io vakiny matsan̈a alin̈y.” (Sal. 1:1, 2) Mazava baka amy zen̈y fa atsika mila manokana fotoan̈a hamakian̈a Baiboly. Fa lera karakôry ma ten̈a tsara hamakian̈a Baiboly? Miankin̈y amin’olo tsiaraikiaraiky fo valin’izen̈y. Atsika mila mifidy fotoan̈a mety  hahavitantsika hamaky Baiboly tsy tapaka. Karaha ty ho rahalahy araiky, Victor an̈arany: “Tiako mamaky Baiboly maraindrain̈y. Zaho tsy olo mpifoha maraindrain̈y, fa io fotoan̈a hitako milamin̈y sady tsisy mpanabataba. Jerinaka koa amin’io mbala mibian̈a tsara, aviô zaho koa mbala mahavita mifantoko tsara.” Asa karaha zen̈y koa ninao? Man̈ontania ten̈a: ‘Lera karakôry ten̈a mety aminaka, hamakian̈a Baiboly?’

DINIHA RAHA VAKINAO

7-8. Ino ma raha mila tandremantsika baka atsika hahazo hatsaran̈a be baka amy raha vakintsika? Man̈ameza ohatra.

⁷ Izikoa anao efa manokan̈a fotoan̈a hamakian̈a Baiboly, misy raha hafa koa mila tandremanao. Asa anao efa navy namaky teny, kanefa tsy elan’izin̈y efa tsisy azonao onon̈o raha nivakinao in̈y? Atsika jiaby mety efa tatran’izen̈y. Fa ny raha mampalahelo, mety ho karaha zen̈y koa raha hahazo atsika lera atsika mamaky Baiboly. Mety man̈ian̈a toko maromaro baka atsika isan’andra. Derain̈y atsika amy zen̈y! Ten̈a tôkony hanan̈a tanjon̈o atsika, ke mifen̈y fo manakatra izio. (1 Kor. 9:26) Fa kanefa, famakian̈a Baiboly io mbala fanombohany fo. Fa mbala misy raha hafa koa tôkony hataontsika, baka atsika mahazo hatsaran̈a be baka amy raha vakintsika amy Volan̈an’ny Zan̈ahary ao.

⁸ Diniha baka ty: Mahalen̈y raha ten̈a ilain’ny raha maniry. Fa izikoa latsaka mare loatra izio an̈atin’ny fotoan̈a fôhiky, tsy ho tafiditry an̈atin’ny tany an̈y rano, fa hidabaka an̈abo iô. Ke ranon’ny mahalen̈y be loatra tsy mampanjary raha maniry. Mila fotoan̈a baka tany io mitsentsitry rano, baka hampiasain’ny raha maniry. Karaha zen̈y koa atsika koa fa mamaky Baiboly. Atsika tsy tôkony hamaky izio malakilaky, fôtony atsika koa tsy manokan̈a fotoan̈a hangalan̈a onon̈o, atsika tsy ho tafieritreritry ndreky hahatsiaro, aviô hampiasa raha vakintsika io.​—Jak. 1:24.

9. Ino raha tôkony hataontsika, izikoa fa haintsika fa atsika zatra mamaky Baiboly malakilaky?

⁹ Fahitanao izy ma, ndraikindraiky anao milomoay loatra izikoa fa mamaky Baiboly? Izikoa zen̈y, akôry tôkony hataonao? Ataova  miadan̈a famakianao izio. Mifen̈a hieritreritry raha vakinao, na raha baka vakinao. Tsy sarotro man̈ano zen̈y. Anao mety manapa-kevitry mankalava fotoan̈a fianaranao, amy zen̈y anao afaka misaintsain̈y. Fa anao koa mety mifidy hamaky andininy vitsivitsy, aviô manokana fotoan̈a tavela amizin̈y hieritriretanao raha baka nivakinao. Karaha ty ho Victor, araiky nikoran̈intsika taloha tarỳ in̈y: “Zaho koa fa mamaky Baiboly, ataoko fôhifôhiky fo raha vakiko, na ataoko toko araiky fo. Maraindrain̈y zaho mamaky Baiboly, ke afaka misaintsain̈y raha nivakiko io fo zaho an̈atin’ny andra araiky io.” Anao mety mifidy zay fomba tianao hamakian̈a Baiboly, fa ny raha ten̈a maventy, anao mahavita mamaky miadan̈a, amy zen̈y anao mahavita mangala onon̈o tsara raha vakinao io.​—Sal. 119:97; zahava koa efajoro “ Fan̈ontanian̈a Mila Dinihin̈y.”

10. Man̈ameza ohatra han̈azavanao akôry mety han̈arehanao raha ianaranao. (1 Tesalonianina 5:17, 18)

¹⁰ Na lera karakôry anao mamaky Baiboly, na karakôry fotoan̈a laninao hamakian̈a izio, diniha karakôry han̈arehanao raha vakinao aby io. Anao koa fa mamaky tapany amy Baiboly ao, man̈ontania ten̈a: ‘Akôry mety han̈arehako fan̈azavan̈a ty iziôty na tsy ho ela?’ Ohatra, famakian̈a Baibolinao iziôty amy 1 Tesalonianina 5:17, 18. (Vakia.) Anao koa fa baka mamaky izio, mijanòna hely mandiniky impiry mivavaka anao an̈atin’ny andra araiky, aviô asa mba lalin̈y vavaka ataonao. Aviô diniha ino aby raha mety hankasitrahanao Jehovah. Mety manapa-kevitry anao han̈ano mersy Jehovah amy raha telo voafaritry tsara! Na an̈atin’ny minity vitsivitsy fo anao mangala onon̈o fianaran̈a nazonao tamin’ny andininy nivakinao tamy Baiboly io, han̈ampy anao hahay tsarabe ndreky han̈araka raha koran̈in’ny Baiboly raha zen̈y. Diniha habezan’ny hatsaran̈a ho azonao, izikoa anao zatra man̈ano karaha zen̈y izikoa fa mamaky tapany amy Baiboly isan’andra! Ho hitanao fa izikoa mandeha fotoan̈a, anao hanjary ho zatra man̈araka Volan̈an’ny Zan̈ahary. Fa izikoa anao mahatsapa fa karaha maro oe raha mila hatsarainao izikoa fa mamaky Baiboly, ino raha mila hataonao?

MAN̈APITRAHA TANJON̈O METY TAKARIN̈Y

11. Nan̈ino anao mety hahatsapa fa sarotro fan̈arahan̈a raha vakinao amy Baiboly ndraikindraiky? Man̈ameza ohatra.

¹¹ Ndraikindraiky anao mety ho kivy, fôtony hitanao karaha maro raha mila hivoanao amy fiain̈ananao. Diniha baka ty: Ohatra, famakian̈a Baibolinao niany mikoran̈a momba torohevitry mampitandrin̈y anao amy fan̈avakavahan̈a. (Jak. 2:1-8) Hitanao fa mila hivoanao fomba fitondrasanao olo, ke anao manapa-kevitry fa han̈ova. Ten̈a tsara! Fa amarain’ izin̈y ndraiky, vaky Baibolinao mampitandrin̈y fa mila mitandrin̈y anao amy raha volan̈inao. (Jak. 3:1-12) Azonao onon̈o amy zay fa ndraikindraiky anao tsy tsara fan̈ahy izikoa fa mivolan̈a, na koa tia mivolan̈a raha tsy mankahery. Ke anao manapa-kevitry fa anao han̈ano volan̈a mankahery izikoa fa mikoran̈a amin’olo. Amarain’izin̈y ndraiky, vaky Baibolinao mikoran̈a momba fampitandreman̈a amy fikamaradianan̈a amin’olo amy donia ty. (Jak. 4:4-12) Hitanao baka amy zen̈y fa anao mila mitandrin̈y amy raha zahavanao, vakinao ndreky tandrin̈esanao. Andra fan̈araka izin̈y amin-jay, anao mety hieritreritry fa ho sarotro aminao han̈ano raha jiaby mila hivoanao io.

12. Nan̈ino anao tsy tôkony ho kivy, izikoa famakian̈a Baibolinao hahatsapanao fa maro raha tôkony hivoanao? (Zahava koa lamariky amy pazy ambany.)

¹² Izikoa hitanao fa misy raha maro mila hivoanao tamin’ny anao namaky Baiboly, aza kivy. Fôtony nan̈ino? Zen̈y baka man̈aboaka fa anao olo manetry ten̈a ndreky vôn̈ono hiova. Atsika koa manetry ten̈a, lera atsika mamaky Baiboly, atsika mizaha raha mila hankatsaraintsika. a Aleva onon̈o koa fa fisikinan̈a “toetry vaovao” zen̈y raha mitohy. (Kol. 3:10) Ke ino raha han̈ampy anao baka anao hanjary mpan̈araka Volan̈an’ny Zan̈ahary fo?

13. Ino fomba araiky tsara atao, izikoa tianao han̈araka raha nianaranao? (Zahava koa sary.)

¹³ Anao koa fa mieritreritry han̈ano raha mila ivoanao io, aza atao indraiky mipaka jiaby. Takara tsihelihely tanjon̈onao. (Ohab. 11:2) Karaha ty hevitry mety hatao: Ataova listy raha jiaby iritriretinao mila hivoanao, aviô fidiana araiky na aroe amindrô io hataonao voanalohany, zay anao vo man̈ano lambiny. Ke aia hanombohanao izy?

14. Tanjon̈o karakôry tianao hatao voanalohany?

 ¹⁴ Mety hanapa-kevitry anao fa tanjon̈o mora takarinao fidinao hatao voanalohany. Na mety hifidy araiky hitanao ten̈a mila hivoanao in̈y anao. Ke izikoa fa voafidinao raha zen̈y, man̈anaova fikarohan̈a amy bokintsika. Anao mety mampiasa Fanondroana Bokin’ny Vavolombelon’i Jehovah na Fitaovana Fikarohana ho an’ny Vavolombelon’i Jehovah. Mivavaha momba tanjon̈onao koa, ke angataha Jehovah han̈amia anao “fan̈irian̈a ndreky angôvo han̈anaovan̈a zen̈y.” (Fil. 2:13) Aviô areha raha nianaranao. Izikoa hitanao fa anao nahavita nan̈ano fan̈ovoan̈a araiky, na nankatsara toetrinao, hanjary hisy korazy anao hanohy fan̈ovoan̈a ataonao io. Ho moramora aminao koa han̈ano fan̈ovoan̈a hafa amy fiain̈ananao.

AMBILÀ VOLAN̈AN’NY ZAN̈AHARY ‘HISY VOKANY AMINAO’

15. Nan̈ino vahoakan’i Jehovah tsy mira olo maro izikoa fa mamaky Baiboly? (1 Tesalonianina 2:13)

¹⁵ Olo sasany mitôron̈o fa efa matetiky nahavita mamaky Baiboly firaka amparany. Fa irô ma ten̈a mino raha ampianarin’ny Baiboly? Irô ma man̈araka raha volan̈in’izio ndreky man̈ambela izio hisy vokany amy fiain̈anandrô? Mampalahelo fa irô tsy man̈ano zen̈y. Fa vahoakan’i Jehovah tsy karaha zen̈y foeky. Karaha irô Kristianin̈y tamy taonjato voanalohany, atsika man̈eky fa Baiboly io “Volan̈an’ny Zan̈ahary ankitin̈y.” Aviô koa, mifen̈y atsika man̈araka torohevitrin’ny Baiboly io amy fiain̈anantsika.​—Vakia 1 Tesalonianina 2:13.

16. Ino raha han̈ampy atsika hanjary mpan̈araka Volan̈a?

¹⁶ Tsy voatery ho mora fo mamaky ndreky man̈araka raha koran̈in’ny Baiboly. Mety miady mare atsika vo mahita fotoan̈a hamakian̈a izio. Na mety tihamaky malakilaky fo atsika amy Baiboly io fa tsy hangala onon̈o raha vakintsika. Mety hieritreritry koa atsika fa sarotro amintsika han̈ano raha mbala mila hivoantsika. Fa na ino na ino fan̈ovoan̈a mbala mila hataonao, izio ho vitanao fo, fôtony Jehovah man̈ampy. Irarian̈a atsika ho tapa-kevitry han̈eky fan̈ampian̈a amezany, ndreky hanjary mpan̈araka Volan̈an’ny Zan̈ahary fa tsy mpitandren̈y fo. Tsy isalasalan̈a fa arakarakan’ny hamakiantsika Volan̈an’ny Zan̈ahary io ndreky han̈arehantsika izio amy fiain̈anantsika, hahay ho sambatra fo atsika.​—Jak. 1:25.