BAIBOLY man̈ambara mazava fa ten̈a man̈ampy panompony Zan̈ahary tsy mivadiky vavaka io. (Lioka 22:40; Jakoba 5:13) Hazahoan̈a hatsaran̈a maro izio, na aminy arapan̈ahy na aminy arapihetsehampo na arabatan̈a foeky. Amy fomba karakory eky?

Ohatra izioty misy olo man̈amia kadô zanakanao. Tsaiky io koa han̈ano mersy, hataony mangin̈y an̈atiny fônany ao fo mersy io sa tokony hivolan̈iny aminolo io? Ten̈a mila mivolan̈a izy ke. Karaha zen̈y koa atsika. Ten̈a ilaintsika mivolan̈a amy Zan̈ahary raha an̈atiny fontsika ao. Atsika koa man̈ano ambaka zen̈y, han̈ody haintsika fo raha an̈atiny fontsika ao, avio hahaihitombo fo fihetsehampo tsapantsika. Karaha zen̈y raha ho hisy, izikoa atsika mivavaka. Handiniky ohatra sasany baka atsika izioty.

Vavaka an̈anaovan̈a mersy. Atsika koa man̈ano mersy Zan̈ahary lera atsika mivavaka, tsy ho adin̈antsika raha tsara aby namiany atsika. Hahaihankasitraka izy fo atsika, ke ho sambatra ndreky hizaha lafy tsarandraha fo.​—Filipianina 4:6.

Ohatra: Jesosy nan̈ano mersy Jehovah nohony izy nitandren̈y ndreky namaly vavakanany.​—Jaona 11:41.

Vavaka angatahan̈a familankeloko. Atsika koa mangataka familankeloko amy Zan̈ahary, hiasa tsara eritreritrintsika sady hahay hanen̈iny atsika izikoa nan̈ano raha tsy mety. Ho tsapantsika tsarabe fa ten̈a ratsy fahotan̈a io. Atsika koa mivavaka, tsy han̈ameloten̈a eky atsika.

Ohatra: Davida nivavaka nan̈aboahany fa nibebaka ndreky nanen̈iny izy.​—Salamo 51.

Vavaka angatahan̈a taridalan̈a ndreky fahendrena. Atsika koa mangataka taridalan̈a ndreky fahendrena amy Jehovah, ho moramora amintsika hanetry ten̈a. Fan̈anaovan̈a zen̈y baka mampatsiaro atsika fa misy erany fo raha mety ho vitantsika, ke mila mitavandra Babantsika andan̈itry an̈y atsika.​—Ohabolana 3:5, 6.

Ohatra: Solomona nanetry ten̈a ke nangataka taridalan̈a ndreky fahendrena, baka izy hahay hitondra iro Israelita aby io.​—1 Mpanjaka 3:5-12.

Vavaka ataonolo mijaly. Atsika koa mitantara raha manahiran̈a atsika amy Zan̈ahary, hahatsiaro hahivankivan̈a atsika. Tsy han̈ano ny haintsika fo atsika fa hitavandra Jehovah.​—Salamo 62:8.

Ohatra: Panjaka Asa nivavaka koa fa hiady tamy fahavalo nampavozo izy mare.​—2 Tantara 14:11.

Vavaka ninolo sahiran̈a. Vavaka karaha zen̈y man̈ampy atsika tsy ho tia ten̈a, hahay hahinakinaka olo ndreky hahay hiaraka ravoravo aminolo na hiaraka halahelo aminolo.

Ohatra: Jesosy nivavaka niny pianatranany aby io.​—Jaona 17:9-17.

Vavaka fideran̈a. Atsika koa midera Jehovah nohony raha niasainy ndreky toetrinany tsara aby io, hanjary hankasitraka izy ndreky han̈aja izy fo atsika. Hahavy atsika hifandray marikitry amy Zan̈aharintsika sady Babantsika io koa raha zen̈y.

Ohatra: Davida tamy fônany jiaby nidera Zan̈ahary niasa raha jiaby.​—Salamo 8.

An̈isany hatsaran̈a ho azontsika atsika koa mivavaka, “fiadan̈ana Zan̈ahary, bebeny eritreritry jiaby.” (Filipianina 4:7) Tsy fohita amy donia tsy milamin̈y ty fiadan̈ana io. Mahatsara vatan̈antsika izio. (Ohabolana 14:30) Hikoran̈intsika fan̈araka ty fa tsy baka aminy ezaka ataonolo hazahoan̈a izio.