Cameron: Ravoravo ndraiky mahita anao John. Tiako mare fianaran̈a Baiboly ataontsika isaka herin̈iandra io. a Akory naninao ato?

John: Tsara fo, mersy.

Cameron: Ravoravo zaho maharen̈y zen̈y. Tamy zaho tatỳ farany in̈y, atsika nikoran̈a nan̈ino Vavolombelon̈o Jehovah mivolan̈a fa taminy 1914 Fanjakan̈any Zan̈ahary nanomboko nanjaka. b Avio atsika nahita porofo araiky tamy faminanian̈a amy bokiny Daniela toko 4 ao. Asa tsaroanao ino raha koran̈inizio?

John: Izio momba kakazo araiky maventy tamy nôfiny Nebokadnezara panjaka.

Cameron: Ia, ten̈a zen̈y. Tan̈atiny nôfinany, Nebokadnezara nahita kakazo araiky maventy mahatakatra firaka amy lan̈itry an̈y. Avio izy naharen̈y anjely araiky nan̈iraka hanapahan̈a kakazo io, fa fototronany ndraiky ambela amy tany iô. Izikoa fa afaka fepotoan̈a fito, kakazo io himpody haniry ndraiky.  c Hitantsika tamizin̈y koa fa indroe tanteraka faminanian̈a io. Asa tadidinao araiky voanalohany?

John: Izin̈y zay tamy raha nandalo tamy Nebokadnezara, tsy zen̈y? Tan̈atiny fito taon̈o izy nanjary adala.

Cameron: Ia zen̈y. Nanjary adala izy, ke nanjary tsy afaka nanjaka tan̈aty fotoan̈a lavalava. Fa avio, faminanian̈a io mbala tanteraka fan̈indroeny, fotony mira tsy nanjaka fo Zan̈ahary izikoa fa tsisy panjaka nisoloten̈a izy eky tambony tany tatỳ tan̈atiny fepotoan̈a fito. Efa hitantsika fa fepotoan̈a fito io nanomboko izikoa fa ravan̈a Jerosalema, tamy taon̈o 607 T.K. Nanomboko tamy zen̈y efa tsisy panjaka eky nitondra vahoakany Zan̈ahary tambony tany tatỳ. Fa izikoa fa tapitry fotoan̈a io, Zan̈ahary hanendry Pitondra vaovao hanjaka amy vahoakanany, ke andan̈itry an̈y misy Pitondra io. Izikoa fintin̈iny, lera tapitry fepotoan̈a fito io Fanjakan̈any Zan̈ahary hanomboko hanjaka andan̈itry an̈y. Atsika ziô fa nahita ombian̈a fepotoan̈a fito io nanomboko. Ke izikoa haintsika mahadin̈y firaka ombian̈a izio, ho haintsika edy ombian̈a Fanjakan̈any Zan̈ahary nanomboko nanjaka. Mazava aminao firaka iô?

John: Ia, efa azokazoko onon̈o amy zay koran̈antsika in̈y.

Cameron: Pare zen̈y. Alô amy zay basy atsika hiditry lalindalin̈y, hikoran̈intsika mahadin̈y firaka ombian̈a fepotoan̈a fito io. Vo baka namaky raha mikasiky zen̈y edy zaho io, amy zen̈y tsaroako hevitry maventy amizio. Alô eseieko hazavain̈a tsara izy.

John: OK.

Cameron: Tamy fahatantirahany faminanian̈a io voanalohany tamy Nebokadnezara in̈y, fepotoan̈a fito io nahadin̈y fito taon̈o arabakiteny. Fa amy Fanjakan̈any Zan̈ahary ty ndraiky, izio mahadin̈y elaela.

John: Nan̈ino anao mivolan̈a zen̈y?

Cameron: Karaha ty baka. Aleva onon̈o fa fepotoan̈a fito in̈y nanomboko izikoa fa ravan̈a Jerosalema tamy taon̈o 607 T.K. Safe izikoa atsika mikonty rango tamy zen̈y, tapitry fito taon̈o io tamy taon̈o 600 T.K. Kanefa tsisy raha niavaka nandalo tamy taon̈o io momba fitondrasan̈any Zan̈ahary. Sady karaha efa hitantsika in̈y koa, tamy Jesosy tambony tany tatỳ, taonjato maro tafaranizen̈y, hita tamy raha nivolan̈iny fa mbala tsendriky tapitry fepotoan̈a fito io.

John: An, ia azoko onon̈o amy zay!

Cameron: Dikanizen̈y fepotoan̈a fito io tsy fito taon̈o arabakiteny fa fotoan̈a lavalava.

John: Mahadin̈y firaka ombian̈a dikanizen̈y izio?

Cameron: Han̈ampy atsika hahay zen̈y bokiny Apokalypsy, fotony mifampiankiny mare raha koran̈inizio ndreky bokiny Daniela. Volan̈iny ao fa fepotoan̈a telo sy tapany io 1 260 andra. d Ke izikoa fepotoan̈a telo sy tapany io ampitombosin̈y aroe, man̈amia fepotoan̈a fito, na 2 520 andra. Mazava firaka iô?

John: Ia mazava. Fa tsy azoko amy karakory zen̈y man̈aboaka fa Fanjakan̈any Zan̈ahary nanomboko nanjaka taminy 1914.

Cameron: Aon, diasa fa zahavantsika ino hifandraisanizen̈y. Hitanao, ndraikindraiky amy faminanian̈a amy Baiboly ao, andra araiky mira taon̈o araiky. e Koa zen̈y arehan̈a, fepotoan̈a fito io 2 520 taon̈o. Ke izikoa anao mikonty 2 520 taon̈o manomboko amy 607 T.K, anao avy amy taon̈o 1914. f Karaha zen̈y nahaizanay fa fepotoan̈a fito io tapitry taminy 1914, salakady taminio koa Jesosy nanjary Panjakany Fanjakan̈any Zan̈ahary. Maharikian̈a fa nanomboko taminy 1914, niboaka man̈erantany raha jiaby efa nivolan̈iny Baiboly fa hiboaka aminy andra farany.

John: Ino ohatra?

Cameron: Aleva onon̈o baka raha nikoran̈iny Jesosy amy Matio 24:7. Ao izy mikoran̈a mikasiky raha handalo lera izy fa manomboko manjaka andan̈itry an̈y. Karaha ty ho Jesosy: “Hisy firenena hiady firenena, hisy fanjakan̈a hiady fanjakan̈a. Hisy mosary ndreky horohorontany koa amy tany maro.” Aleva onon̈o fa Jesosy nivolan̈a fa hisy mosary ndreky horohorontany amy fotoan̈a zen̈y. Tsy hitanao nahainaro fo raha aby zen̈y man̈erantany, tan̈atiny 100 taon̈o tato zay?

John: Ia ia.

Cameron: Aminy andininy io koa Jesosy nivolan̈a fa lera izy manjary Panjakany Fanjakan̈any Zan̈ahary, hisy ady. Mankamafy raha zen̈y amy bokiny Apokalypsy. Koran̈iny ao fa an̈atiny fotoan̈any farany, hisy ady, ary tsy amy tany sasany fo hisy izio fa erantany. g Asa tadidinao ombian̈a nisy Ady Lehibe Voanalohany?

John: Taminy 1914. Taminio baka araiky nivolan̈inao fa Jesosy nanomboko nanjaka in̈y! Zaho tsiary nieritreritry fa raha aby zen̈y nisy ifandraisany.

Cameron: Izikoa fa ampifandraisin̈y raha koran̈indro faminanian̈a amy Baiboly ao, karaha araiky momba fepotoan̈a fito in̈y ndreky faminanian̈a hafa momba andra farany, manjary azonao tsara raha tiandro koran̈iny. Zahay Vavolombelon̈o Jehovah ten̈a resy lahatra fa taminy 1914 Jesosy nanjary Panjakany Fanjakan̈any Zan̈ahary, avio mbala tamy taon̈o io fo koa nanombohany andra farany. h

John: Mbala tsy ten̈a mazava aminaka tsarabe fan̈azavan̈a aby in̈y ay!

Cameron: Normaly zen̈y ke. Ndray zaho koa ho zaho taminao in̈y, mba elaela koa vo ten̈a nahazo dikanizio. Fa farafaharatsiny fo, zaho matoky fa koran̈antsika in̈y nan̈ampy anao hahazo fa nata amy Baiboly ao tsisy ladaty 1914 io, raha inoanay Vavolombelon̈o Jehovah momba taon̈o io ndraiky ten̈a baka an̈atiny Baiboly.

John: Ia, fa ela foeky zaho niremarke raha zen̈y. Na ino na ino raha volan̈inaro, tsy maintsy tohan̈anaro aminy andininteny fo, fa tsiary ke hevitrinaro tompiny fo ambaranaro. Fa raha mampandiniky zaho fo, nan̈ino ma tsy direkty nisoratiny Zan̈ahary amy Baiboly ao fa aminy 1914 Jesosy hanomboko hanjaka andan̈itry an̈y?

Cameron: Tsara fan̈ontanian̈anao zen̈y John. Maro foeky raha tsy koran̈iny Baiboly direkty. Fa izikoa tianao, hikoran̈intsika amy man̈araka nan̈ino nataony Zan̈ahary mila fandinihan̈a mare, vo hay hevitry an̈atiny Baiboly ao. Pare aminao?

John: Pare tsarabe.