Zaho tombo tamy lakartie maromaro ta Los Angeles, a Etazonỳ. Izio lakartie malaza misy latropiny barbô ndreky mivarotro jamala. Tsiota mianadahy zahay kibo araiky, zaho faharoe.

Zahay nindesiny mamanay nivavaka taminy arapilazantsara. Fa zaho koa fa nahaibe, zaho naditry. Izikoa fa dimansy, zaho nihira tamy kôraliny leglizy, fa taminy andavanandra ndraiky, fety, jamala, fijangajangan̈a, io fo fiain̈ananaka.

Farandraha mora meloko sady kafiry eky zaho. Izikoa zaho fa miady aminolo, samboriko zay raha azony tan̈ako baka zaho mandresy. Tsisy vokany taminaka foeky raha nianarako ta leglizy tan̈y. Ho zaho matetiky: “Valy faty io niny Zan̈ahary … ke zaho fitaovan̈a ampiasainy amy zen̈y!” Nisy fikambanan̈a arapolitiky zay ten̈a nahalian̈a zaho tamy zaho tamy lise, taloha heliny 1970. Black Panthers an̈arany fikambanan̈a io. Izio niady zony vahoaka. Niditry tamy fikambanan̈any pianatra miaro zony vahoaka zaho. Zahay matetiky nan̈ano lagrevy. Ke isaka teteky, nanjary mifody elaela lise.

Azony zaho kafiry loatra, tsy hitako nahampy zaho foeky lagrevy nataonay in̈y. Ke zaho nandeha nan̈ano asa ratsy. Haratsiampan̈ahy fo mikômandy. Matetiky ohatra, zaho ndreky kamaradiko aby io nandeha tamy sinema, nizaha filma momba fampijalian̈a navoa andevo afrikain aby io ta Etazonỳ. Tsy rariny raha navoa iro. Ke romotronizin̈y zahay, nipoponay tan̈y iro tanora zanakanolo fotsy tamy sinema tao. Avio zahay nandeha tamy lakartienolo fotsy aby io, misy hamopohanay olo hafa koa.

Tamy zaho kadiriny 20 taon̈o tio, zahay ndreky iry rahalahiko aby io efa loso barbô aminy ankitin̈y. Nian̈iny polisy fo zahay. Araiky tamindro zandriko aby io nanjary mambrany fikambanan̈any barbô nalaza zay. Ke zaho niaraka tamindro. Nahay tsisy raha nanjary fo fiain̈ananaka.

Nisy namako araiky zay zanaka Vavolombelon̈o Jehovah. Tandraraiky, zaho niainvitendro hivory, ke zaho nan̈eky. Direkty hitako fa iro tsy mira olo jiaby. Kila olo nisy Baiboly, avio izio nampiasaindro lera nivory. Firaka amy tanora nan̈ano anjara taloha tarỳ. Lany fan̈ahy zaho nahay fa Jehovah an̈arany Zan̈ahary. Rikian̈a aby zaho maharen̈y iro mampiasa an̈aran̈a io. (Salamo 83:18) Parkarazany koa olo tao, kanefa iro tsy nifan̈avakavaka foeky.

Tiako oe nivory niaraka tamy Vavolombelon̈o Jehovah. Fa zaho tamy voanalohany fo tsy tihianatra Baiboly tamindro. Nandeha nivory zaho taminy ariva araiky zay, fa ry namako sasany ndraiky loso nandeha baly. Nisy tsaiky lelahy zay tan̈y, nipopopondro firaka izy naty, fotony izy tsy nety nan̈amia iro paltonany vita taminy hoditry. Vantara iro amarainizin̈y nitantara izio. Nataondro fimoezan̈a koa izin̈y izikoa fa natao tribinalindro. Ankamaraozandro voaheloko higadra firaka iro maty. Nakiry izy zaho tsy niaraka tamindro ay! Ke zaho tapakevitry hiova ndreky hianatra Baiboly.

Azony zaho efa niain̈y loatra tan̈aty fan̈avakavahan̈a io, loso rikian̈a zaho izikoa fa niaraka tamy Vavolombelon̈o Jehovah. Ohatra, tandraraiky, nisy olo fotsy araiky zay, tsy maintsy nandeha tantany hafa, ke zanakanany nampitanany lafaminolo joby. Avio tandraraiky koa, nisy tsaiky lelahy joby zay nalainy lafaminolo fotsy aby zay hipetraka tamindro, fotony izy tsisy tany nipitrahan̈a. Raha aby zen̈y nan̈ikiako ankitin̈y fa iro Vavolombelon̈o Jehovah aby io ten̈a man̈araka volan̈any Jesosy amy Jaona 13:35 ty: “Baka amy zen̈y ahaizanolo fa anaro pianatranaka ankitin̈y, izikoa anaro mifankatia.” Tsapako fa zaho nahita fianakavian̈any pirahalahy ten̈a mifankatia.

Hitako tamy fianaran̈a Baibolinaka fa zaho mila man̈ova toetsain̈inaka. Zaho tsy maintsy miova izikoa tiako han̈ano raha hampihavan̈a, ndreky han̈eky fa zen̈y fiain̈ana farany tsara. (Romanina 12:2) Zaho baka tio nandroso tsihelihely. Avio zaho natao batisa tamy Zanvie 1974, ke loso Vavolombelon̈o Jehovah.

Nata efa tafarany batisanaka, zaho mbala tsy maintsy niezaka fo hifehy helokonaka. Ohatra baka tandraraiky zay, tamy zaho nandeha nitory isaka tran̈o, nisy olo nangalatra radiony tomobilinaka. Ke nian̈iko pangalatra io. Izikoa fa hely tavela tsy hatakarako izy, natsipiny tan̈y radio in̈y avio izy nilefa. Nitantaraiko tamy pitory namako aby io raha zen̈y, avio antipan̈ahy araiky zay nan̈ontany zaho karaha ty: “A Stephen, ino eky raha nataonao izy koa takanao?” Tontohitry zaho fa zaho mbala mila miezaka fo baka tsy ho mora meloko, ke zaho tapakevitry han̈ano zen̈y.

Taminy Oktobra 1974 zaho nanjary pitory manontolo andra; manokana zato lera isaka fanjava mba hampianaran̈a olo Baiboly. Tafara tatỳ, zaho nan̈ano asa antsitrapo tamy Foibeny Vavolombelon̈o Jehovah a Brooklyn, a New York. Fa taminy 1978, zaho nimpody ta Los Angeles fotony mamako tsy salama. Ke zaho nandeha nikarakara izy. Avio taon̈o aroe tafaranizen̈y, zahay roeny Aarhonda nan̈ano mariazy. Tiako mare vadiko io. Zahay roe niaraka nikarakara mama firaka izy naty. Aarhonda ten̈a nanohan̈a zaho. Koa fa nandeha fotoan̈a, zahay nan̈ano Sekoliny Gileada, avio zahay navoatendry misionera a Panama eto. Mbala misionera atỳ fo zahay firaka ziô.

Letry tafarany batisanaka in̈y, maro raha nandalo tamy fiain̈ananaka ke mety nahavy zaho ho mora masiaka. Fa zaho fo niezaka tsy nipetaka taminolo mitady han̈ano raha hampameloko zaho, avio koa zaho nitady fomba hafa hampilamin̈y problemo. Maro olo nidera zaho tamy zen̈y, an̈isanizen̈y vadiko. Ary tsy nampoiziko foeky zaho hahavita zen̈y! Koa angovonaka tompiny izio tsy vitako, fa efa Baiboly fo ny ten̈a man̈ova olo. Hitako tsarabe raha zen̈y!​—Hebreo 4:12.

Baka amy Baiboly nahavy fiain̈ananaka ziô loso misy dikany. Izio koa nampianatra zaho tsy ho mora meloko. Amizioty zaho efa tsy miady aminolo eky. Fa zaho ziô efa man̈ampy iro ho janga arapan̈ahy. Ndray zaho aby nampianatra Baiboly tsaiky lelahy zay, kanefa zahay tsy fankahazo mare tamy lise! Nisy fotoan̈a aby tafarany batisanany, zahay roe niaraka nipetraka foeky. Mbala kamarady mare zahay ziska ziô. Firaka ziô, efa mandeha 80 olo nampianarinay roeny vadiko Baiboly ke loso Vavolombelon̈o Jehovah.

Zaho ten̈a man̈ano mersy Jehovah, fotony loso misy dikany fiain̈ananaka. Ravoravo mare koa zaho izioty fotony an̈isany fianakavian̈any pirahalahy ten̈a mifankatia.