Izikoa fa misy fan̈afihany terôrista, anao mety loso diniky karaha ty: ‘Zan̈ahary edy mba mijery atsika? Nan̈ino ma misy raha karaha ty? Mbala hifaran̈a edy terôrisma a io? Raha mba ho vita edy miain̈y an̈aty tahotro karaha ty fo?’ Amy Baiboly ao ahitantsika valiny mahafapô amy fan̈ontanian̈a aby io.

 Farandraha halany Zan̈ahary eky hakafirianan̈a ndreky terôrisma. (Salamo 11:5; Ohabolana 6:16, 17) Jesosy solonten̈any Zan̈ahary. Izy koa mba nivolan̈a mare iro pianatranany aby io izikoa iro fa nitady hikafiry olo. (Matio 26:50-52) Sasany amindro terôrista aby io mivolan̈a fa aminy an̈arany Zan̈ahary zen̈y an̈anaovandro asa ratsy io, kanefa Zan̈ahary tsiary nan̈amia lalan̈a iro han̈ano raha karaha io. Ndray vavakandro aby tsy tandrin̈esany foeky.​—Isaia 1:15.

 Zan̈ahary mikarakara lan̈iany olo mijaly, tafiditry amy zen̈y olo aby miatriky fan̈afihany terôrista. (Salamo 31:7; 1 Petera 5:7) Baiboly koa mivolan̈a fa handeha hifoan̈any Zan̈ahary hakafirianan̈a io.​—Isaia 60:18.

 Baiboly mivolan̈a fa ten̈a fototro aviany terôrisma io ty: “Olo nanjaka mare taminolo, ke nampiditry jaly tamindro.” (Mpitoriteny 8:9) Efa rango zay, man̈ano terôrisma iro olo manan̈a fahifan̈a aby io mba hampiory olo, fa olo aby io mamaly ke man̈ano terôrisma koa.​—Mpitoriteny 7:7.

 Zan̈ahary mampan̈anten̈a han̈afoan̈a tahotro ndreky hakafirianan̈a, baka io hampisy fiadan̈ana ambony tany. (Isaia 32:18; Mika 4:3, 4) Ty raha hataony:

•   Hadosony fototro aviany terôrisma io. Fanjakan̈any Zan̈ahary hisolo fanjakan̈anolombelon̈o jiaby, ke izio hanjaka erantany. Jesosy Kristy pitondra amy fanjakan̈a io. Izy han̈ano ny rariny aminolo jiaby salakady handeha han̈adoso fampijalian̈a ndreky hakafirianan̈a. (Salamo 72:2, 14) Amy fotoan̈a zen̈y, efa tsisy eky terôrista. Olo jiaby “ho ravoravo amy fiadan̈ana.”​—Salamo 37:10, 11.

•   Hifoan̈any koa vokadratsiny terôrisma io. Zan̈ahary han̈avotro atsika amy vokadratsy jiaby nindesiny terôrisma io, tafiditry amy zen̈y vatan̈a ndreky fô maratra. (Isaia 65:17; Apokalypsy 21:3, 4) Ndray izy aby nampan̈anten̈a hamelon̈o olo aby efa naty aby in̈y, ke iro hiain̈y amy fiain̈ana milamin̈y tsarabe ambony tany eto.​—Jaona 5:28, 29.

 Nan̈ino atsika matoky fa efa tsy ho ela eky Zan̈ahary han̈ano raha? Fotony Baiboly man̈amia antony maro hatokisantsika zen̈y. Fa ndray zen̈y, anao mety han̈ontany: “Nan̈ino ma mbala tsendriky ifoan̈any Zan̈ahary fo terôrisma io?” Koa tianao ho hay valinizen̈y, zahava video Nan̈ino Tsy Adosony Zan̈ahary Jaly Io?