“Robaka mare toetrandra ke manjary tsy azo iain̈ana eky ambony tany.”​—Piambin̈y (angiley).

 Baka amy raha ataonolombelon̈o fo mahavy problemo maventy izioty io. Ankamarozandro manampahizan̈a momba siansy aby io man̈eky fa baka amy raha ataonolo fo mahavy tany mafana mare. Vokatranizen̈y, manjary niova toetrandra, ke nanjary naviany problemo maventy. Ty ohatra amy zen̈y:

•   Matetiky mikorontan̈a mare toetrandra, ke iô fo mafana mare andra, avio misy haintany, na mahalen̈y be. Manjary misy tondradrano na motro mandravan̈a tanàna.

•   Ravan̈a lagilasy, karaha ataony lagilasy amy Tendrontany Avaratra an̈y.

•   Manonga mare habosany ranomasin̈y.

 Efa tany jiaby tatrany toetrandra miova io. Karaha ty nivolan̈iny gazety New York Times, izikoa fa nan̈azava raha misy amy firenena mandeha 193: “Mangataka vonjy tany.” Maro mare koa olo marary ndreky maty, baka amy toetrandra miova. Baka amy zen̈y nahavy Fikambanana Iraisam-pirenena Momba Fahasalamana nivolan̈a fa fiovoany toetrandra io atahoran̈a ho raha ten̈a hamparary olo.”

 Fa izikoa raha koran̈iny Baiboly zahan̈a, mbala misy fan̈antinan̈a. Raha miboaka aminy andra izioty io efa nambarany Baiboly rango efa ela. Ao koa man̈azava antony mahavy atsika matoky fa Zan̈ahary han̈ano raha. Koran̈iny Baiboly koa raha hataony Zan̈ahary baka atsika ho tsara ny amaraintsika.

 Ia. Raha efa ampoizin̈y ho hisy fiovoany toetrandra baka amy fanongany hafanan̈any tany io, izikoa zahan̈a raha efa nikoran̈iny Baiboly.

 Faminanian̈a: “Aminy andra farany an̈y, hisy fotoan̈a sarotro tsy mora hatrefin̈y. Olo ho tia ten̈a, ho tia vola, ... tsy ho men̈atra mivadiky, ... tsy ho tia havany, tsy mety hifan̈arahan̈a, ... ho pamadiky, ho mierin̈y olo.”​—2 Timoty 3:1-4.

 Baiboly efa nivolan̈a rango efa ela fa olo hanjary ratsy toetry. Zen̈y mahavy olo mandrobaka tontolo iain̈ana. Maro fanjakan̈a ndreky olo pan̈ano raharahambarotro tsy mijery taranaka avy afara, fotony iro tia vola loatra. Iro ndray tihitambatra han̈ano raha hampijanon̈o fanongany hafanan̈any tany, iro tsy mitovy hevitry foeky, amy raha tokony hatao amizio.

 Izikoa raha koran̈iny faminanian̈a io zahan̈a, efa olo efa tsy antinain̈y hiova ndreky hiaro tany ty eky. Baiboly foeky mivolan̈a fa “hahairatsy fo” iro olo tia ten̈a aby io.​—2 Timoty 3:13.

 Baiboly mivolan̈a fa Jehovah a Zan̈ahary niasa lan̈itry ndreky tany io ten̈a tia atsika olombelon̈o ndreky tia tany niasainy io. Ty misy toko sy andininy telo ahitantsika fa Zan̈ahary han̈ano raha ankitin̈y.

1.  1. ‘Tsy raha tsisy antony niasany tany io fa nataony hipitrahanolo.’​—Isaia 45:18.

    Zan̈ahary han̈atanteraka fikasan̈anany momba tany ty. (Isaia 55:11) Izio tsy hambelany ho potiky ke tsy hipitrahan̈a zen̈y eky.

2.  2. “Olo pandefitry fo handova tany ty, ke ho ravoravo amy fiadan̈ana. Olo marin̈y handova tany, ke hipetraka iô tsisy farany.”​—Salamo 37:11, 29.

    Zan̈ahary mampan̈anten̈a fa olo ho velon̈o tsisy farany ambony tany eto, ke hilamin̈y tany ty amy zen̈y.

3.  3. “Fa olo ratsy fan̈ahy ndraiky hadoso ke tsy ho hisy eky ambony tany.”​—Ohabolana 2:22.

    Zan̈ahary mampan̈anten̈a fa mbala haripany iro olo tsy vôly man̈ano ny ratsy, an̈atinizen̈y iro olo mandrobaka tany ty.

 Akory hataony Zan̈ahary baka ho tanteraka fampan̈antinan̈any momba tany ty? Izy hampiasa fitondrasan̈a araiky, Fanjakan̈any Zan̈ahary. (Matio 6:10) Baka andan̈itry an̈y izio hitondra tany ty. Izio tsy mila man̈ano fifan̈arahan̈a amy fanjakan̈anolombelon̈o baka hampatsara tany ty ndreky tontolo iain̈ana. Izio hisolo fanjakan̈anolombelon̈o jiaby.​—Daniela 2:44.

 Fanjakan̈any Zan̈ahary io han̈ano raha tsara ninolombelon̈o ndreky tontolo iain̈ana. (Salamo 96:10-13) Diniha baka raha hataony Jehovah Zan̈ahary, Fanjakan̈anany io koa fa mitondra.

•   Hilamin̈y tontolo iain̈ana

   Raha koran̈iny Baiboly: “Ho ravoravo tany dezera ndreky tany paiky. Ho ravoravo koa lemaka paiky sady hamolera karaha safrona.”​—Isaia 35:1.

   Ino ma dikanizen̈y? Jehovah hankavao tany ty. Ho voamboatrany tsara fo nata tany sasany efa robaka mare nazonolombelon̈o.

•   Ho voafehinizio toetrandra

   Raha koran̈iny Baiboly: ‘Izy mampangin̈y tsiko maresaka be, ke tsy mihetsiky mare eky darobandranomasin̈y.’​—Salamo 107:29.

   Ino ma dikanizen̈y? Tsy hijaly baka amy fiovoany toetrandra eky atsika, fotony Jehovah mahafehy angovony natira.

•   Hampianatra olo hikarakara tsarabe tany

   Raha koran̈iny Baiboly: “Zaho han̈ano raha hahavy anao hahadiniky raha, baka io hambarako anao lalan̈a tokony himboanao.”​—Salamo 32:8.

   Ino ma dikanizen̈y? Fikarakaran̈a tany io andraikitry namiany Jehovah olombelon̈o. (Genesisy 1:28; 2:15) Izy hampianatra atsika akory han̈anaovan̈a tsarabe andraikitry zen̈y, amy zen̈y tsy ho robaka tany ndreky tontolo iain̈ana.