Nisy Foarany Boky Erantany ta Toronto natao tamy 13-16 Novambra 2014 ta Metro Toronto Convention Centre. Maro boky naboaka, na izy vita pirinty zen̈y na elektroniky. Ke nisy olo mandilatra 20 000 nan̈aton̈o foara io, natao tan̈atiny efatra andra.

Vavolombelon̈o Jehovah an̈isany mba nan̈aboaka raha tamy foara io. Iro nampiasa standy tsara sady manaitry olo, ke araiky amy standy zen̈y natao han̈aboahan̈a aminolo fomba fampiasan̈a tranonkala jw.org.

Nisy lelahy araiky an̈isany miandraikitry foara io nivolan̈a: “Tranonkalanaro io ten̈a moderiny. Fahitako izy, tokony hangala tahaka raha ataonaro koa olo jiaby man̈aboaka raha amy foara ty.” Maro aminolo nizaha izio koa nivolan̈a fa ten̈a tsara tranonkala io sady mora ampiasain̈y, baka io hita ao koa valiny fan̈ontanian̈a fapetrakanolo. An̈isany raha nahalany fan̈ahy olo maro koa, izio ten̈a nan̈ampy olo maro izikoa fa nisy raha manahiran̈a na nampiasa loha iro.

Raha hitandro Vavolombelon̈o Jehovah niasa antsitrapo tamy standy io izikoa fa nikoran̈a taminolo, vo sambany tamy foara io olo aby io naharen̈y raha momba jw.org zen̈y. Ankamarozolo nizaha izio nangala karty momba jw.org na trakty Aia Ahitantsika Valiny Fan̈ontanian̈a Sarotro Momba Fiain̈anantsika? Maro tamindro io nivolan̈a fa himpody hizaha tranonkala io ndraiky, fa sasany ndraiky nan̈iry hitsidihiny Vavolombelon̈o Jehovah.

Andra joma tamy foara io “Natokana Niny Tsaiky”, ke nisy sarisary baka tamy jw.org naboaka. Ke nisy tsaiky maromaro niaraka tamy papianatrandro nandalo tao, nizaha.

Nisy lelahy araiky baka Chicago, miasa aminy orinasa pan̈amboatra Baiboly, ravoravo nahita hatsaran̈any Baiboly Ny Soratra Masina—Fandikan-tenin’ny Tontolo Vaovao naboaka tao. Ke tiany ho hita tany man̈amboatra Baiboly io. Izy koa fa namian̈a karty momba jw.org, izy nangala.

Tamy volan̈a mandilatra 700 misy amy tranonkala io, olo nitsidiky standiny Vavolombelon̈o Jehovah nahavita nizaha raha tamy volan̈a 16. An̈isanizen̈y volan̈a amharique, bengali, sinoa, angiley, fransay, griky, gujarati, hindi, korenianina, portogey, espaniola, soedoà, tamoul, tigrigna, urdu, ndreky vietnamianina.

Araiky tamy Vavolombelon̈o Jehovah nandray olo navy tamy standy io nivolan̈a fa tsy mitovy foeky mivolan̈a raha momba tranonkala io ndreky man̈aboaka izio aminolo. Izy nivolan̈a: “Ravoravo mare zahay nahavita nan̈aboaka tranonkala io taminolo.”