Matetiky olo koa fa jamba zen̈y tsy jirenolo, intsaka eky amy tany mahantra. Zen̈y mahavy iro sahiran̈a man̈ano velonten̈a, karaha ataony mandeha bazary, mangala bisy, baka io koa mikonty vola. Tsy basinizen̈y fo fa tsy mora amindro koa mamaky teny. Vitsy fo mahay soratra Braille. Sasany ndray mahay, iro tsisy boky amy volan̈a mahazatra iro, amy soratra Braille.

Tsy karaha zen̈y amy Vavolombelon̈o Jehovah. Efa mandilatra 100 taon̈o zay iro man̈amboatra boky momba Baiboly ninolo jamba aby io. Karaha ataony a Malawi an̈y, misy an̈arany volan̈a zay an̈y Chichewa. Iro Vavolombelon̈o Jehovah aby an̈y efa nahazo raha fan̈anovan̈a pirinty soratra Braille ndreky raha manambatra boky, baka ta Holandy, han̈amboaran̈a boky amy volan̈a chichewa io.

Misy Vavolombelon̈o Jehovah araiky zay, Leo an̈arany. Baka amy birony sampan̈a Vavolombelon̈o Jehovah a Brezily an̈y izy, fa nandeha ta Malawi, nampianatra ekipy araiky misy olo dimy. Tiany iro io hahay han̈amboatra boky amy raha fan̈amboaran̈a soratra Braille io. Misy programo araiky zay namboariny Vavolombelon̈o Jehovah, ke asanany io mamadiky lahatsoratra amy volan̈a chichewa, manjary soratra braille amy volan̈a io. Nan̈amboatra tablo araiky antsendriky iro, baka mahavita mampiasa programo io. Nisoratin̈y tao soratra Braille mifanandrify amy soratra efa mahazatra amy volan̈a chichewa io. Programo io koa mahavita mamadiky lahatsoratra hanjary Braille ndreky man̈amboatra sorasorany boky io, baka tsy sarotro aminolo jamba mamaky izy. Zahava raha koran̈inolo jamba a Malawi an̈y momba boky aby amy soratra Braille io.

Misy man̈angy araiky, kadiriny 30 taon̈o mandilatra, Munyaradzi an̈arany. Jamba izy, pivolan̈a amy radio asanany. Izy koa manokan̈a 70 lera isaka fanjava, ampianaran̈a olo Baiboly. Volan̈iny karaha ty: “Taloha, boky amy soratra Braille amy volan̈a angiley fo azoko, fa izioty izy natao amy volan̈a amy Braille chichewa. Io ten̈a miditry an̈aty fonaka, fotony izio volan̈a mahazatra zaho. Ten̈a mankasitraka iro Vavolombelon̈o Jehovah nan̈ano izio zaho, ndreky iro nandany vola, baka zahay mahazo boky amy volan̈anay. Ten̈a ravoravo zahay, fotony mbala misy olo mahatsiaro zahay ndreky man̈isy kontiny zahay.”

Misy Vavolombelon̈o Jehovah araiky jamba koa mipetraka an̈y avaratra Malawi an̈y, Francis an̈arany. Taloha izy tsy mahavaky boky, izikoa tsisy olo mamaky izy aminany. Izy amy zay koa fa nahazo boky amy soratra Braille amy volan̈a chichewa io, izy nivolan̈a: “Mira nofy zalahy e! Tsisy raha tsaratsaranizay!”

Misy man̈angy araiky jamba koa, Loyce an̈arany. Izy pitory teny man̈ariva andra, ke efa nan̈ampy olo 52 hahita ny marin̈y amy Baiboly. Akory nan̈anovany zen̈y? Izy koa fa mampianatra Baiboly, olo ampianariny mitana bokinolo mahita fo, fa ninany ndraiky boky amy soratra Braille. Vavolombelon̈o Jehovah nan̈amboatra boky jiaby ampianaran̈a olo jamba aby zen̈y.

Karaha ty nivolan̈iny Leo, nikoran̈intsika tan̈abo tarỳ in̈y: “Isaka zaho man̈amia olo boky momba Baiboly amy soratra Braille io, ravoravo zaho mahita fandraisandro raha io, fotony tiandro mare izio io natao amy volan̈andro. Ankamarozandro ravoravo man̈ano mersy Jehovah, fotony iro tompiny nanjary nahavita man̈oman̈a fivorian̈a ndreky fitorian̈a. Efa tsy mila naman̈a eky iro mamaky teny. Karaha zen̈y koa fianaran̈a manokan̈a. Iro zaraiky ankitin̈y man̈ano izy, fa tsy iarasan̈a aminolo eky. Manjary mahavita man̈ampy fianakavian̈andro hihavan̈a tsarabe amy Zan̈ahary koa iro, baka amy boky aby io.”