Watch Tower Bible and Tract Society of Pennsylvania (Fikamban̈ana Tilikambo Fiambenana) io fikamban̈ana natsangana tamy taon̈o 1884, mifan̈araka amy Lalàn̈any Pennsylvanie, an̈y Etazonia. Fikamban̈ana io tsy natao hitadiavambola. Izio ampiasainy Vavolombelon̈o Jehovah hampadihanan̈a asandro erantany, an̈isanizen̈y fan̈amboaran̈a ndreky fan̈aboahan̈a Baiboly, boky, baka io gazety.

Izikoa sata mifehy fikamban̈ana io zahan̈a, “han̈ano raha momba fivavahan̈a ndreky hampianatra, baka io han̈ano asa soa” ten̈a tanjon̈onizio, indraka eky fa “hitory ndreky hampianatra filazantsarany Fanjakan̈any Zan̈ahary indesiny Kristy Jesosy.” Ke zay olo voakaiky fo mahazo miditry pikamban̈a amy fikamban̈ana io, fa tsy miankiny aminy habezany vola amiany. Ke iro pikamban̈a ndreky iro pitantan̈a amizio man̈ampy Filankevipitantan̈any Vavolombelon̈o Jehovah.

Ankoatrany Watch Tower Bible and Tract Society of Pennsylvania, Vavolombelon̈o Jehovah manan̈a fikamban̈ana aradalàn̈a maromaro miparitaka amy firenena maro. “Watch Tower” na “Watchtower” (amy volan̈a angiley na volan̈a antoeran̈a) fikahian̈a sasany amy fikamban̈ana aby zen̈y.

Koa fa natsangana fikamban̈ana aradalàn̈a hafa aby io, ten̈a nan̈ampy zahay hahavita raha maro iro io. An̈isanizen̈y raha aby ty:

• Manoratra sady man̈aboaka boky ndreky gazety. Maro raha efa nataonay pirinty: Baiboly mandeha 220 tapitrisa, baka io boky ndreky gazety kadiriny 40 000 tapitrisa amy volan̈a mandilatra 700. Misy Baiboly amy volan̈a mandilatra 120 amy jw.org ao. Anao ndray tsisy vola, anao mety mamaky Baiboly amizio ao. Maro koa fan̈ontanian̈a momba Baiboly valin̈y ao, ohatra: “Ino ma Fanjakan̈any Zan̈ahary Zen̈y?”

• Mampianatra. Misy fampiofan̈ana isankarazany koa alamin̈inay hampianaran̈a Baiboly. Vavolombelon̈o Jehovah mandilatra 8 000 izioty efa nampiofan̈iny tamy Fianaran̈a Baiboly Atao a Gileada, nanomboko tamy taon̈o 1943. Ampiofan̈iny tsarabe iro baka iro ho loso misionera ndreky hahavita hampandeha asa ataonay erantany. Isaka herin̈iandra koa zahay miaraka mivory amy Tran̈o Fivorian̈anay, mianatra Baiboly. Ke olo antapitrisany man̈aton̈o izio, fa sasany tsy Vavolombelon̈o Jehovah. Zahay koa mandamin̈y kilasy fianaran̈a mamaky teny ndreky manoratra, ke efa misy boky fianaran̈a mamaky teny ndreky manoratra zen̈y naboaka, amy volan̈a mandeha 110.

• Man̈ano asa soa. Izikoa fa misy olo sahiran̈a mare, zahay man̈ampy iro. Ndraikindraiky raha mahazo iro zen̈y baka amy raha ataonolombelon̈o fo, karaha ataony fandripahan̈a foko ta Rwanda taminy 1994. Ndraikindraiky koa zen̈y nohony iro mipetraka amy tany nandalovany antambo, karaha ataony horohorontany tan̈y Haïti tamy 2010.

Marin̈y ndraiky fa maro raha vitanay rango zahay nanangana fikamban̈ana aby io, fa tsy miankiny amindro io zaraiky fo asa jiaby ataonay. Mifen̈y koa zahay mitory ndreky mampianatra vaovao tsara, fotony Zan̈ahary nan̈iraka Kristianin̈y tsiaraikiaraiky han̈ano zen̈y. (Matio 24:14; 28:19, 20) Ke zahay matoky fa Zan̈ahary tsy maintsy han̈ampy zahay aminy asa ataonay fo. Izy ten̈a “mampitombo”, ke zen̈y mahavy zahay matoky fa izy hanohan̈a zahay fo.—1 Korintianina 3:6, 7.