Baka amy raha ianaranay amy Baiboly ao mahavy zahay Vavolombelon̈o Jehovah tsy man̈ano politiky. Zahay tsy manohan̈a antoko politiky, baka io zahay koa tsy milahatra handrongana fanjakan̈a. Ino mahavy zahay man̈araka raha koran̈iny Baiboly momba raha zen̈y? Misy antony maromaro ty:

•   Zahay man̈araka modeliny Jesosy. Izy tsy nan̈ano politiky. (Jaona 6:15) Jesosy nivolan̈a fa pianatranany “tsy an̈isany donia ty.” Zen̈y nahavy iro tsy nan̈ano politiky.​—Jaona 17:14, 16; 18:36; Marka 12:13-​17.

•   Zahay tsy mivadiky amy Fanjakan̈any Zan̈ahary. Karaha ty raha nambarany Jesosy momba izio: “Hambara amy tany jiaby misy olo antsendriky vaovao tsara mikasiky Fanjakan̈a ty.” (Matio 24:14) Amy maha solonten̈any Fanjakan̈any Zan̈ahary io zahay mahavy zahay mikoran̈a aminolo momba izio ndreky tsy man̈ano politiky, ndray aia ndray aia tany misy zahay.​—2 Korintianina 5:​20; Efesianina 6:​20.

•   Nony zahay tsy man̈ano politiky mahavy eritreritrinay madio koa fa man̈ambara aminolo vaovao tsara momba Fanjakan̈any Zan̈ahary io. Aboakanay amy raha volan̈inay ndreky ataonay fa Fanjakan̈any Zan̈ahary zaraiky fo mahavita man̈adoso raha jiaby manahiran̈a olo erantany.​—Salamo 56:11.

•   Nony zahay tsy man̈ano politiky koa mahavy zahay jiaby mifankatia karaha olo kibo araiky, ndray aia ndray aia tany misy zahay. (Kolosianina 3:​14; 1 Petera 2:​17) Tsy zen̈y ndraiky raha ataonolo amy fivavahan̈a sasany, fotony iro man̈ano politiky, ke baka amy zen̈y mahavy olo mivavaka amindro ao tsy fankahazo.​—1 Korintianina 1:​10.

 Man̈aja fanjakan̈a. Zahay ndray tsy man̈ano politiky, zahay man̈aja fanjakan̈a ndreky manampahifan̈a amy tany misy zahay. Zen̈y raha irahiny Baiboly atao: “Olo jiaby samy mila man̈eky manampahifan̈a.” (Romanina 13:1) Zahay man̈aja lalàn̈a amy tany misy zahay, karaha ataony fan̈ifan̈a latety. Zahay tsy milahatra handrongana fanjakan̈a. Zahay man̈araka raha koran̈iny Baiboly, man̈iraka atsika hivavaka ‘momba olo jiaby an̈isanizen̈y iro manampahifan̈a pitondra’, indraka eky fa izikoa misy fanapahankevitry tsy maintsy raisindro mety hanakatsakana fanompoanay Zan̈ahary.​—1 Timoty 2:​1, 2.

 Ndray zen̈y, zahay man̈aja safidinolo, fotony anjarany tsiaraikiaraiky mifidy na izy han̈ano politiky na tsy han̈ano. Zahay tsy misakana olo amy fanapahankevitrinany, izikoa fa misy fifidianan̈a.

 Izio ma raha vo betibety fo zahay tsy man̈ano politiky io? Tsy zen̈y. Na iro apostoly na iro Kristianin̈y tamy voanalohany tan̈y samy tsy nan̈ano politiky. Karaha ty nambarany boky araiky nisoratiny Doug Bandow: ‘Iro nan̈eky fa tsy maintsy hajain̈y pitondra fanjakan̈a aby io, kanefa ndray izy manan̈o zen̈y, iro tsy nety nan̈ano politiky foeky.’ Mitovy amy zen̈y koa raha koran̈iny boky “Mandeha amy Fandrosoan̈a”(angiley): ‘Iro koa tsy nety foeky hamian̈a toeran̈a misy ifandraisany politiky.’

 Ke hilamin̈y fo tany ty izikoa anaro tsy man̈ano politiky? Ia, hilamin̈y. Tsisy raha tokony hatahorany fanjakan̈a zahay, fotony zahay tia fihavan̈ana. Karaha ty raha nivolan̈iny gazety araiky naboakany Akademia Iokrenianina Momba Siansa tamy 2001: ‘Aminandra izioty, maro olo tsy ravoravo amy Vavolombelon̈o Jehovah, an̈atinizen̈y iro pitondra pan̈ano didijadon̈o Nazia ndreky Koministy, fotony Vavolombelon̈o Jehovah tsy nan̈ano politiky.’ Ndray tamy fotoan̈any Sovietiky aby io nitondra, Vavolombelon̈o Jehovah aby io ‘mbala nan̈aja lalàn̈any tany misy izy fo. Iro man̈ano ny marin̈y, iro mahay miaraka miasa aminolo na tamy tany fitarimian̈a biby zen̈y na tamy tany fitsaboan̈a raha. Baka io iro tsy nan̈ano raha foeky handroganan̈a fitondrasan̈a koministy io.’ Karaha zen̈y koa aminandra izioty. Gazety io koa mbala mivolan̈a karaha ty: ‘Iro tsy man̈ano raha hampisy korontan̈a ndreky handrongana fanjakan̈a foeky, na aia na aia tany misy iro.’