YAA berei kaa ŋeniɛi su-ɓela tamaa ɣele da ŋwɛli la a gɛɛ nua di di siɣe a nuu mɛni-kpanaŋɔɔ e tɛɛ la diɓaraŋ-ŋa dia? A nɛ̃ɛ maŋ nua di tua a dia a bere sii ti, da nii ŋwɛli a gɛɛ di ɓaa-kɛ-maa tamaa sɔlɔ ɓo. Nua nyii-ŋai gili-ŋa-sia kɛɛ ŋi kaa diyeei kpaaŋɔɔi nɔ dikpiŋ mɛni ma, nyaŋ Ŋala-kɔlɔi e mo a gɛɛ bere nɔ ɓe nua tua-pere a pai kɛi la a ŋeniɛi kpɛɛ-ŋa tãi.—2 Te. 3:2.

Dɔ̃yai ɓa, nuu kɛɛ nɔ a gbaaŋɔɔ gbiŋ mɛni ma fe a mɛni nina. Gɔɔŋ-maa ɓa, Adaŋ da Ii di dikpɔɔi mɛni-kpɛtɛɛ kɛ a pa mɛni nyɔmɔɔ da mɛni lɛlɛɛ ma, nyaŋ nyiŋi e pa a mɔ̃lɛ-laa ku kelee kupɔ. Koraŋ tamaa tɛɛ polu ma, Zuda Kaloŋ Uzia e kɛ nɔ gaai yɛɛ maa nɛ̃ɛi di nɛɛ naa e kereŋ-sɛŋ kuŋ-nɛɛ kereŋ ŋala-pɛrɛi kɛtɛi la, kɛlɛ e kɛ pɔara-mɛni-maa kɛtɛ kɛi. (2 Kɔ. 26:​18, 19) Bere sii tɔnɔi ti su, e kɛ nɔ Faresii-ŋai da Sadusii-ŋai kili-ŋa a gɛɛ maa nɛ̃ɛi Ɣala e dimaa mɛni siɣe a gbanaŋɔɔ e tɛɛ la diɓaraŋ-ŋa dia kpɛni fei di kula Ɛberaɣɛ̃ɛ ŋɔsuui su.—Mf. 3:9.

Ŋeniɛi laa fɛɛi a nua nyii-ŋai di kpaaŋɔɔi nɔ dikpiŋ mɛni mai, nyaŋ kwa wala tãi siɣe, kwa pɔri pɛlɛi tuai yɛɛ dia. (Ga. 5:26) A pɔri kɛi kukili-ŋa a gɛɛ maa nɛ̃ɛi nua di tua a kua a pere sii ta nyii pai nɛi a gɛɛ kumaa mɛni kpanaŋɔɔi e tɛɛ la kuɓaraŋ-ŋa dia. Kwa pɔri gili-ŋa-sia kɛɛ ŋi maa laai leŋ? Maa nɛ̃ɛi ku Ziova ŋɔkili-ŋa-siai kɔlɔŋ e pilaŋ nyiŋi ma. Ŋala-kɔlɔi ŋɔtɔ̃ya-ŋuŋ-ŋai veerɛ a pai kpɔnii kua.

 Ziova nɔ ɓe maa nɛ̃ɛi e maa-kɛ-maai lɛ maa nɛ̃ɛi ku zɔlɔ ɓoi. Kwaa gɔɔŋ-maa taŋa kaa.

• Gaayɔɔi su, maa nɛ̃ɛi zurɔŋ e gaa a gɛɛ ŋɔnɛnii a ɓaa-kɛ-maa siŋɔɔ tɛɛ bɔ, nyaŋ maa nɛ̃ɛi nɛnii e gaa a gɛɛ ŋɔsurɔŋ a tɔ̃ya wɛli-kɛ-maa lɛ ma. (If. 5:33) Maa nɛ̃ɛi tua-laa su-ɓela di wɛli-kɛ-maa lɛ nɔ dikie-ni dia. (1 Kl. 7:3) Maa nɛ̃ɛi loŋ-kaa-ɓela di gaa a gɛɛ dinia-pɛlɛɛi da ɓaa-kɛ-maa tɛɛ dipɔ, nyaŋ maa nɛ̃ɛi nia-pɛlɛɛi dia maŋ di gaa a gɛɛ dikaa-ɓela da wɛli-kɛ-maa lɛ dia dikɛ dimɛi kaa.—2 Kl. 12:14; If. 6:2.

• Korai-toli-kpɔŋ su, maa nɛ̃ɛi ku ɓaa-kɛ-maa tɛɛ korai-toli-kpɔŋ laa-tuɛ-ɓelai pɔ ditii kpanaŋ-ŋai mɛni ma. (1 Tɛ. 5:12) Kɛlɛ wala-wala-laa fe diyeei bɔlɔ da sisɛ-ŋai dimɛni-kpɛtɛɛ-ŋai mɛi.—1 Pi. 5:​2, 3.

• Ɣala aa wala-wala-laa tɛɛ nuu-kpune gɔmɛti pɔ a gɛɛ di ŋuŋ-fela-fe kula, di ɓaa-kɛ-maa sɔlɔ ɓo diyee-mu-ɓelai yeei.—Lo. 13:​1, NWT, 6, 7.

Ziova aa wɛli-kɛ-maa tamaa lɛ kua nyii maa fe nɛ̃ɛ ni ku zɔlɔ ɓoi. Ee ku kaa a sɔnyɔŋ ɓelai, maa nɛ̃ɛi nɔ ku saa. (Lo. 6:23) Kɛlɛ, Ziova ŋɔwɛli-kɛ-maai sarai aa luwa tamaa laa kua. (Ŋu. 103:​10, 11) Nuwa-ŋai kpaa dii lɛlɛɛ kelee kwa zɔlɔ ɓo nyeei, kaa a ɓɛlɛ-see nyii maa fe nɛ̃ɛ ni ku zɔlɔ ɓoi.—Lo. 12:​6-8; If. 2:8.

Tãi siɣe a gɛɛ ife pɛlɛ ikili-ŋa siai yɛɛ ŋeniɛi ŋi su-ɓela. Kwa wala tãi siɣe, kwa pɔri pɛlɛi kukili-ŋa siai a gɛɛ kumaa mɛni kpanaŋɔɔi e tɛɛ kuɓaraŋ-ŋa dia. Zisɛ e tii kɛ a mɛni-kɔɔŋ-maa ta a gɛɛ e berei lɛ gili-ŋa-sia kɛɛ ŋi a pɔri pai lai. Mɛni-kɔɔŋ-maai pilaŋɔɔi tii-kɛ-ɓela taŋa dia nyii-ŋai di difela fe a seleŋ tɔnɔi. Dii-kɛ-ɓelai taŋa di pɛlɛ tii kɛi e siɣe ɣele-wala ma e too ɣele-wulii ma; di taŋa di tii kɛ nɔ a aɓa tɔnɔ. Nuu-kpului maa-ŋuŋ dikɛ gaai nɔ yɛɛ ee di tii tamaa kɛi, difela-fei a pai kɛi a damaa e tɛɛ diai lɛɛ polui dia. (Mf. 20:​1-16) Zisɛ e tii kɛ a mɛni-kɔɔŋ-maa ŋi a gɛɛ e nɛ ŋɔpolu-ɓelai dia a gɛɛ maa nɛ̃ɛi dilii e kɛ a naa a zɛŋ kelee Ɣala a dɛɛ dipɔi.

Sɛɣɛi fe tɛɛ, kɛɛ ife gaa yɛɛ maa nɛ̃ɛi nua di ɓɛlɛ-see kɛ yɛɛ. (1 Tɛ. 5:18) Kwaa kɛ yɛɛ zia-nuui Pɔɔ, nyii ve Kɔlɛŋ-ɓela mare kɛ ni a gɛɛ di zãai tɛɛ bɔ nyii maa nɛ̃ɛi kɛ di dɛɛ bɔi. (1 Kl. 9:​11-14) Maa nɛ̃ɛi ku yee-see-mu lɛ nuwa-ŋai kelee mɛni ma  kwa zɔlɔ ɓoi, nyaŋ ve kɛ kukili-ŋa a gɛɛ maa nɛ̃ɛi nua di ɓɛlɛ-seei kɛ kuɛ.

Kɛ a maa yeŋ-nuu. Nuu nyii a gbiŋ siɣe a gɛtɛɛ, a pɛlɛ gaai yɛɛ maa nɛ̃ɛi nua di ɓaa-kɛ-maa tamaa tɛɛ bɔ e tɛɛ la maraŋ-ŋa dia. Kɛɛ maa-yeŋ-laa a pai kpɔnii kua a gɛɛ kufe wɔlɔ kukili-ŋa sia a bere sii nyɔmɔɔ kɛɛ ti.

Ɣala ŋɔlono-kɛ-nuui Dania e mɛni-kɔɔŋ-maa lɛlɛɛ lɛ a pa maa-yeŋ-laa lɛɛ ma. E kɛ a dareɛ, nɛlɛɛ, nyaŋ e kula kaayɔɔ su nyii kapa tamaa e kɛ diyeei, gɛ ɓo a tii lɛlɛɛ takpɛni-ŋa kɛ-pere kɔlɔŋɔɔ. Mɛni ma nyiŋi eei pɔri gɛi e pɛlɛ gaai yɛɛ ŋɔtarei kpaa ŋɔlɛlɛɛ-laai ɓe gɛ dikɛ tii lɛlɛɛ-ŋa tɛɛ bɔ. (Da. 1:​3, 4, 19, 20) Kɛlɛ Dania e lɛɛ a maa-yeŋɔɔ, nyaŋ dua-pere lɛlɛɛi ŋi ɓe gɛ Ziova kɛ ŋwɛli a ŋanaa.—Da. 2:30; 10:​11, 12.

Kwaa kɔ a pere sii kelee a gɛɛ kufe kɛ nɔ a ku kpaaŋɔɔ kukpiŋ mɛni ma kpaa kukɛ kukpiŋ siɣe a gɛtɛɛ; tua-pere nyii damaai saa ŋeniɛi sui. Kɛlɛ, kwa ŋwɛlii ku kanaŋ lii-nɛ̃ɛ sɔlɔ ɓoi nuwa-ŋai kelee su nyii Ziova a dɛɛ kupɔ ŋɔɓɛlɛ-seei sarai.