Dami ali akwete yaka 6, babagwe ŵajasice ni ulwele wakuyimba mitasi. Nombe najo Derrick ali akwete yaka 9, babagwe ŵajasice ni ulwele wamtima. Jeannie ali akwete yaka 7, mamagwe ŵajasice ni ulwele wakansa ja m’ciŵelecelo pambesi pakulwala kwa caka cimo. *

Ŵandu ŵatatu ŵatwakolasileŵa, ŵajasile ŵandu ŵaŵanonyelaga. Ana wawojo pakwete payatendecele yampela yeleyi? Naga yili m’yoyo, ngani ajino cijakamucisye kumanyilila yampaka atende kuti apilile ciwa ca mundu jwakusamnonyela. * Nambo candanda, kwende tulole yakwamba canasa catukusakola ligongo lya ciwa.

Pana matala gejinji gakulosya canasa. Yeleyi yigopolela kuti tukusalosya canasa m’matala gakulekanganalekangana. Buku jine jakusala yampaka atende ŵacinyamata kuti apilile ciwa ca mlongo mjawo jatite, “Yampaka atende mundu jwine kuti apilile ciwa ca mlongo mjakwe mpaka yilekangane ni yampaka atende mundu jwinesoni.” Nambo cindu cakusosekwa cili kwasalila ŵane yayikutulagasya nganisyo. Ligongo cici? Ligongo lyakuti . . 

Kulepela kwasalila ŵane yayikutulagasya nganisyo mpaka kuŵe kwakogoya. Jeannie, jwatumkolasile kundanda jula, jwatite, “Naganisisye yakuti ngamsalila mpwanga munapikanilaga mumtima. Atamose masiku agano, ngusasisa yayikundagasya nganisyo, nambope ngumanyilila kuti yeleyi mpaka yitandikasye yakusawusya yine.”

Buku jine jasasile kuti, “Naga tukusisa yayikutulagasya nganisyo, yakuyicisya yakwe mpaka yiwonecele pasogolo. Mwine mpaka yitendekasye kuti tutumbilejetumbileje, kapena mpaka tulwalejelwaleje.” Mundu jwakusiŵasisila ŵane yayikumlagasya nganisyo mpaka atande kumwa mnope ukana kapena mitela jakusokonasya mtwe, pakulingalinga kuti ayiliŵalile yakusawusyayo.

Kulagasika nganisyo mpaka kutusokonasye mtwe. Mwambone, mundu pajasice, ŵandu ŵane akusamtumbilila mnope mundujo paganisya kuti ŵatisile. Ŵane akusamjimba magambo Mlungu paganisya kuti jwalepele kumposya munduyo. Ŵanesoni akusalijimba magambo ligongo lya yindu yaŵamtendele kapena kum’ŵecetela mundujo mkanawe. Jemanjaji akusaganisya kuti pangali yampaka atende kuti akamulane najosoni.

 Yosopeyi yikulosya kuti mundu jwatukusamnonyela pajasice yindu yangajenda cenene. Sano, ana cici campaka cakamucisye kupilila?

Ŵasalileje ŵane mwakupikanila mumtima. Ŵane pacakamwile canasa ŵanganonyela kutenda yindu ni acimjawo. Nambope, kwasalila ŵamwiŵasa mwawo kapena acimjawo yayikwalagasya nganisyo mpaka yakamucisye kumalana ni yakusawusyayo.—Lilemba lyakamucisya: Miyambo 18:24.

Alembe yakwamba mundujo. Alembe yakwamba nangolo juŵajasicejo. Mwambone, ana cici cacasangalasyaga mwa mundujo? Alembe ndamo syakwe syambone. Ana ndamo japi jakusaka kujigalila?

Naga akwete nganisyo syakulemweceka, mwambone, naga akuganisyape yaŵam’ŵecetele nangolo jwawo mkanawe, alembe mwakupikanila mumtima, soni ligongo lyakwe akupikana m’yoyo. Mwacisyasyo mpaka alembe kuti, “Ngusinalijimba magambo ligongo lyakuti natandene ni baba mkanawe.”

Kaneko, atende yakuti amasye kulijimba magamboku. Buku jine jatite, “Ngakusosekwa kulijimba magambo payindu yakuti nganamanyililaga kuti paciŵasoni upile wakupepesya. “Ngaŵa lunda kuganisya kuti nganituŵa tuŵecete kapena kutenda yindu yakuti panyuma pakwe tucisosekwa kupepesya.”—Lilemba lyakamucisya: Yobu 10:1.

Asamalileje cilu cawo. Agoneje mwakwanila, atendeje masewela gakulimbisya cilu, soni alyeje yakulya yakamucisya m’cilu. Naga ngakusaka kulya, alinjeje kulya yakulya yamwanamwana mpaka pacacitandilasoni kusaka kulyako. Akanonyelaga kulya yakulya yangakamucisya m’cilu kapena kumwa ukana. Yeleyi mpaka yigambe konjecesya yakusawusya.

Amsalileje Mlungu yakusawusya yawo kupitila mwipopelo. Baibulo jikusati, “Amtulile Yehofa yakusawusya yawo, ni jwalakwe cacakamucisya.” (Salimo 55:22) Ngatukusapopela ni cakulinga cakuti tugambe kutamika mtima pasi. Nambo lipopelo lili litala lyakuŵecetelana ni Mlungu ‘jwakusatutondoya mu yakulingwa yetu yosope.’—2 Akolinto 1:3, 4.

Litala limo lyakusakamulicisya masengo Mlungu pakwatondoya ŵakuwilwa, lili kupitila m’Maloŵe gakwe, Baibulo. M’yoyo, tukwaŵenda kuti alijiganye yajikusajiganya Baibulo pakwamba ya ŵawe soni ya cembeceyo cakuti ŵawe cacijimuka. *—Lilemba lyakamucisya: Salimo 94:19.