MALO gejinji m’cilambo ca Spain gali gakwela soni mwana ŵandu ŵa mitundu jakulekanganalekangana. Mbali jekulungwa ja cilamboci jikwete migunda ja tiligu, mipeleya soni maolifi. Kum’mwela kwa cilamboci kwana nyasa jakulekanganya cilamboci ni Africa. Nyasaji jili ja makilomita 14 kutyocela lisi line kuja kwika lisi line.

Cilambo ca Spain cili cimo mwa yilambo yayili kumwela cakungapilo lyuŵa kwa Europe. Ŵandu ŵane ŵakusatama mu yilamboyi ŵatyocele m’cilambo ca Foinike, Greece, soni mumsinda wa Carthage wawuli kumpoto kwa Africa. Aloma paŵatandite kulamulila mu yaka ya m’ma 200 B.C.E., mkuli wosope wa yilambo ya kumwela cakungapilo lyuŵa kwa Europe, watandite kukolanjikwa kuti Hispania. Kaneko ŵandu ŵamtundu wa Visigoths soni wa Moors ŵatandite kutamasoni mu mkuliwu, wosopeŵa ŵalesile ndamilo syasikwendelecela mpaka lelojino.

Mu caka cine capacangakaŵapa ŵandu ŵakupunda 68,000,000 ŵapite kukulola cilambo ca Spain. Ŵandu ŵajinji  akusayika m’cilamboci kukotela lyuŵa, kukulola yakupentapenta ni yakwambula, yindu ya mbili jakala soni yakusepasepa. Ŵandu ŵane akusayika ligongo lyakunonyela yakulya ya m’cilamboci. Yine mwa yakulyayi yili ya m’nyasa, nyama ja liguluŵe jelinganye cenene kuti jikajonasika, nyama jetelece, saladi, soni liponda lyetelece kapena lyetaje mauta ga maolifi. Ŵandu ŵajinji pacilambo cosope akusayinonyela yakulya ya ku Spain mpela mandanda gekalanje, mpunga wetelece wewanganye liponda ni somba kapena nyama, soni yakulya yine yakusayilinganya mpela tumbale.

Ŵandu ŵa ku Spain ali ŵagopoka soni ŵakungulucika. Ŵandu ŵajinji m’cilamboci akusasala kuti ali ŵa dini ja Cikatolika, nambo ŵamnonope ni ŵakusatenda nawo Misa. Mu yaka yapacangakaŵapa ŵandu ŵane ŵa m’yilambo ya mu Africa, Asia, soni Latin America asamile kwawula ku Spain. Ŵandu ŵajinji m’cilamboci akusasangalala kutagulilana ya yikulupi yawo ya dini soni ndamilo syawo. Ŵanduŵa akusaŵa ŵagopokasoni kutagulilana ni Ŵamboni sya Yehofa, yeleyi yikamucisye kuti ŵamboniŵa ŵajiganyeje ngani syakulekanganalekangana sya m’Baibulo.

Mu caka ca 2015, Ŵamboni sya Yehofa ŵakupunda 10,500 ŵalipelece pakamucisya nawo masengo gakutaŵa, soni kulinganya nyumba syakwana 70 syakutendela misongano jawo. Nyumbasi akusasikolanga kuti Nyumba sya Ucimwene. Malo gane gakutaŵa nyumbasi, ŵapelekaga ŵakulolela matawuni soni misinda. Pakusaka kwakamucisya ŵandu ŵa m’yilambo yine, Ŵamboni sya Yehofa akusatenda misongano jawo m’yiŵeceto yakupunda 30 kupwatikapo Cisipanishi. Mu 2016, ŵandu ŵakupunda 186,000 ŵasimanikwe pamsongano Ŵamboni sya Yehofa wakumbucila ciwa ca Yesu Klistu.