ŴANDU AKUSASACILILA KUNONYELANA. Pangali ulombela, liŵasa, kapena mkamulano wampaka ujendelecele pali pangali cinonyelo. Ni ligongo lyakwe cinonyelo cili cakusosekwa mnope kuti mundu aŵeje jwakusangalala yisyesyene. Nambo ana “cinonyelo” cili cici?

Atamose kuti cinonyelo ca pasikati pa jwamkongwe ni jwamlume cili cakusosekwa, nambo cinonyelo catukwambaci cili cakulekangana ni celeci. Cinonyelo celeci cili cakupunda cinonyelo ca pasikati pa jwamkongwe ni jwamlume mwamti cikusamtendekasya mundu kuganicisya yakusosecela ya ŵane kupunda yakwe. Cinonyeloci cikusalongoleledwa ni malamusi ga Mlungu soni cikusatyocela mumtima.

Malemba pakusala ya cinonyeloci gakusati, “Cinonyelo cili cakuwusimana mtima soni cacanasa. Cinonyelo cangatenda wiwu, cangalilapilila, cangalikwesya, cangatenda yangaŵajilwa, cangasamala yakusaka yakwepe, cangatumbila, cangasunga magongo. Cangasangalala ni yangalungama, nambo cikusasangalala ni usyesyene. Cikusasilila yindu yosope, . . . cikusajembeceya yindu yosope, cikusapilila yindu yosope. Cinonyelo cangamala.”—1 Akolinto 13:4-8.

Cinonyelo celeci cili “cangamala” m’litala lyakuti cikusajendelecela ndaŵi syosope. Nambosoni mkupita kwa ndaŵi cikusaŵa cakulimba mnope. Pakuŵa cinonyeloci cili cakuwusimana mtima, cacanasa, soni cangasunga magongo, ni ligongo lyakwe “cikusakamulanya ŵandu mwamacili kupunda cindu cilicose.” (Akolose 3:14) Naga ŵandu akunonyelana mwamti m’yiyi, akusaŵa ŵakamulana soni ŵakusangalala yisyesyene  atamose kuti ali ŵangali umlama. Mwambone, kwende tulole pakwamba ya mkamulano wa mu ulombela.

Yesu Klistu jwasasile yindu yakamucisya pakwamba ya ulombela. Mwambone, jwalakwe jwatite, “‘Jwamlume cacaleka babagwe ni mamagwe ni kulipwatika kwa ŵamkwakwe, mwamti ŵaŵiliwo caciŵa cilu cimo’ . . . M’yoyo, yayilumbikenye Mlungu pampepe, mundu jwine akayilekanganya.” (Matayo 19:5, 6) Lilembali likusala yindu yiŵili yakamucisya mnope.

“ŴAŴILIWO CACIŴA CILU CIMO.” Mu ulombela, gali malo gambone gakulosyana cinonyelo pasikati pa jwamlume ni jwamkongwe, soni naga ŵalombanewo akunonyelana yisyesyene akusaŵambala ungakulupicika kwa jwine ni mjakwe. Jwamlume, kapena jwamkongwe nganaŵa aŵele “cilu cimo” ni mundu jwine kulekapo ŵamkwakwe. (1 Akolinto 6:16; Ahebeli 13:4) Ungakulupicika ukusasokonasya mkamulano soni mpaka umasye ulombela. Nambosoni naga yeleyi yitendekwe mwiŵasamo muli mwana ŵanace yikusasokonasya nganisyo syawo ligongo akusalipikana kuti ngakunonyeledwa, kusamalilidwa soni akusaŵa ŵakutumbila.

“YAYILUMBIKENYE MLUNGU PAMPEPE.” Mkamulano wa mu ulombela wuli wapajika. Ŵalombane ŵakusacimbicisya ulombela akusalingalinga kuti alimbisye mkamulano wawo. Ngakusasosasosa magongo gakumacisya ulombela wawo pasimene ni yakusawusya. Akusaŵa ŵakunonyelana soni ŵakupilila. Cinonyelo celeci “cikusasilila yindu yosope,” mwakumasya yakusawusya yawo, yayikusakamucisya kuti ŵalombane ajendelecele kuŵa ŵakamulana soni pamtendele.

Naga acinangolo akusatenda yakomboleka pakunonyelana yisyesyene, yikusaŵa yakamucisya kwa mwanace jwalijose m’liŵasamo. Msikana jwine lina lyakwe Jessica jwatite, “Baba ni mama ŵangu akusanonyelana soni kucimbicisyana yisyesyene. Pangusinawona mama ali mkwacimbicisya baba, mnopemnope pakutenda yindu ni ŵanacewe, ngusasacilila kuti unejisoni cindendeje yeleyi.”

Jimo mwa ndamo syakusosekwa mnope sya Mlungu jili cinonyelo. Ni ligongo lyakwe Baibulo jikusasala kuti, “Mlungu ali cinonyelo.” (1 Yohane 4:8) Yeleyi yikusamtendekasya Yehofa kumanyika kuti ali “Mlungu jwakusangalala.” (1 Timoteo 1:11) M’wejisoni tuciŵa ŵakusangalala naga tukusalingalinga kusyasya ndamo sya Mkupanganya jwetu mnopemnope cinonyelo. Lilemba lya Aefeso 5:1, 2 likusati, “Amsyasyeje Mlungu, mpela ŵanace ŵakwe ŵakunonyelwa, soni ajendeje m’cinonyelo.”