Liŵasa Soni Kuŵa Paunasi ni Achimjetu
Ŵandu ŵajinji yikusiyasawusya kuŵa paunasi wambone ni ŵandu ŵane. Kwende tulole yiwundo yine ya m’Baibulo yampaka yitukamuchisye kuŵa paunasi wambone ni ŵane.
TUKALINONYELAGA
CHIWUNDO CHA M’BAIBULO: “Mkagambaga kusaka yindu yayikumnonyelesya m’mwejo jikape, nambo soni yayikwanonyelesya ŵane.”—Afilipi 2:4.
ANA YELEYI YIKUGOPOLELA CHICHI?: Kuŵa paunasi wambone ni ŵane kukusapwatikapo kuŵa ŵakoloŵa magasa ngaŵa kwambaga kupochela. Naga tukuŵa ŵakulinonyela mpaka tujonanje unasi wetu ni ŵane. Mwachisyasyo, mundu jwakulinonyela mwiŵasa mpaka aŵe jwangakulupichika kwa ŵamkwakwe. Konjechesya pelepa, pangali mundu jwakusasaka kuŵa paunasi ni mundu jwakusalikwesya ligongo lya yindu yakwete kapena yakusamanyilila. Buku jine jatite, “Ŵandu ŵakulinonyela akusasimana ni yakusawusya yejinji.”
YATUKUSOSEKWA KUTENDA:
-
Twakamuchisyeje ŵane. Ŵandu ŵali paunasi wambone akusadalilanaga soni akusaŵaga ŵakoseka kamusyangana. Kuwungunya kwine kulosisye kuti ŵandu ŵakusiŵakamuchisya ŵane ngakusalaga mnope nganisyo soni akusaliwonaga kuti ali ŵandu ŵakusosekwa.
-
Tuŵeje ŵachanasa. Kwatendela ŵane chanasa kukusagopolela kukwayidwa mumtima mpela mwakupikanila ŵanewo. Naga tuli ŵachanasa, tuchiŵambala ngwelegulo syampaka syakuŵasye ŵane.
Kwatendela ŵane chanasa kuchitukamuchisyasoni kuŵa ŵakundilila. Nambosoni tuchiŵambala kuŵa ŵalusagu soni tuchikola achimjetu ŵakutyochela m’mitundu jine ja ŵandu.
-
Tupateje ndaŵi jakunguluka ni ŵandu. Patukupata ndaŵi jakunguluka ni ŵandu ŵane, ni patukusitwamanyilila chenene. Naga tukusaka kupata achimjetu ŵambone tuŵecheteje yindu yakusayinonyela achimjetuwo soni tuŵeje ŵakupikanila ŵambone. Tulosyeje lung’wanu ni yakusaka ya ŵane. Ŵakuwungunya ŵane apatile kuti “kuŵechetana yindu yakamuchisya mpaka kwatendekasye ŵandu kuŵa ŵakusangalala mnope.”
TUSAGULEJE ACHIMJETU MWALUNDA
CHIWUNDO CHA M’BAIBULO: “Kusyoŵekana ni ŵandu ŵakusakala kukusajonanga ndamo syambone.”—1 Akolinto 15:33.
ANA YELEYI YIKUSAGOPOLELA CHICHI?: Ŵandu ŵakusakungulukaga nawo mpaka ŵatendekasye kola ndamo syambone kapena syakusakala. Ŵakusalijiganya ndamo sya ŵandu akusasala kuti yitendo ya ŵandu ŵawukusakungulukaga nawo mpaka yikwaye umi wa mundu. Mwachisyasyo, jemanjaji akusasala kuti naga mundu akusanonyela kunguluka ni ŵandu ŵakusanonyela kwemba sona kapena kuleka malombela, nombe najo mpaka atande ndamosi.
YATUKUSOSEKWA KUTENDA: Tukusosekwa kungulukaga ni ŵandu ŵakwete ndamo syambone syatukusasikumbila. Mwachisyasyo, tusoseje achimjetu ŵakusiŵaganichisyaga ŵane, ŵaulemu, ŵakoloŵa magasa soni ŵakwapochela chenene achalendo.
YIWUNDO YINE YA M’BAIBULO
Aloleleje mafidiyo gakusala ya m’Baibulo gakwakamuchisya ŵalombane, ŵachinyamata soni ŵanache kuti maŵasa gajendeje chenene
TUŴAMBALEJE MALOŴE GACHIPONGWE.
“Mundu jwakusaŵecheta mwangasamalila, maloŵe gakusasoma mpela upanga.”—MISYUNGU 12:18.
TUŴEJE ŴAKOLOŴA MAGASA.
“Mundu jwakupeleka tachisichila.”—MISYUNGU 11:25.
TWATENDELEJE ŴANE YINDU YATUKUSAKA KUTI M’WEJI ATUTENDELEJE.
“Mwatendeleje . . . ŵane mpela mumkusachila kuti ŵane amtendeleje jemanja.”—MATEYU 7:12.
