LISIKU line mu November 1932, M’bale Joseph F. Rutherford ŵayice ku Mexico City. Cijuma cimo munyuma mwakwe, ŵandu ŵakupunda 1,000,000 ŵa ku Mexico City ŵakwete lung’wanu ni kuŵicidwa kwa maloboti mumsindawu. Nambo palisiku ali, ŵakwete lung’wanu ni kwika kwa M’bale Rutherford, juŵaliji jwakulongolela likuga lya Watch Tower Society. Ŵakulokota ngani ŵajigele yakwambulila ni kwawula kumalo gakwelela sitima, kukumjembeceya mlendo jwapajikaju. Ŵamboni ŵakweleko nombe nawo ŵapite kumaloko kuti akampocele m’baleju, juŵayikaga kukutendesya msongano wamasiku gatatu.

Magasini ja The Golden Age (Apano jikusakolanjikwa kuti Ajimuce!) jasasile kuti, “Ŵandu ngasawuliŵalila msonganowu mpaka kalakala kuti ni wuwakamucisye usyesyene kuti uwande m’cilambo ca Mexico.” Pamsonganowu paliji ŵandu 150. Nambo ligongo cici ŵandu ngasawuliŵalila mpaka kalakala?

Mkaniwutendekwe msonganowu, m’cilambo ca Mexico mwaliji Mboni syamnono. Kutandila mu 1919, m’cilambomu mwatendekwaga misongano jekulungwakulungwa, nambo m’yaka yakuyicisya ciŵalanjilo ca mipingo catandite kunandipa. Mu 1929 ŵataŵile ofesi ja nyambi ku Mexico City. Yeleyi yalimbikasisye abale ni alongo. Nambope, papali yakusawusya yine. Ofesi ja nyambi jatusalile kuti tukawanganyaga ya malonda ni kulalicila. Nambo mkopotala jwine, ligongo lyakunyalayidwa jwapanganyisye kakuga kakwe ka ŵakulijiganya Baibulo. Pandaŵi jakulandanajo, jwakulolela nyambi ŵatesile yindu yangaŵajilwa ni ŵasosekwaga kumtyosya. Pandaŵiji Mboni syakulupicika sya ku Mexico syasosekwaga cikamucisyo causimu.

Paŵayice m’bale Rutherford ku msongano mu 1932, ŵalimbikasisye mnope abale ni alongo ŵakulupicikaŵa. Ŵaŵecete ngani siŵili soni ngani sine abale ni alongoŵa ŵasipikanile pawailesi kumsongano kukoko. Kwa ndaŵi jandanda, mawailesi ga ku Mexico gagulwisye ngani syambone m’cilambo cosope. Pawamasile msonganowu, jwakulolela nyambi jwasambano jwalinganyisye yakuti ŵandu atandilesoni kulalicila mwamtawu. Mboni syamtawu syapatile macili soni Yehofa wajaliwe.

M’caka cakuyicisya kwatendekwe misongano jiŵili. Wandanda watendekwe mu msinda wa Veracruz, soni wine watendekwe ku Mexico City. Kulalicila mwamtawu kwakwete yakuyicisya yambone. Mu 1931 m’cilamboci mwaliji ŵakulalicila ŵakwana 82. Nambo pambesi pa yaka 10 paliji ŵakulalicila ciŵandika 1000. Mu 1941, ŵandu ŵakwana 1000 ŵayice ku Mexico City kukutenda msongano.

Mu 1943 Ŵamboni ŵalikolecele yipepala yakusala ya msongano wakuti “Mtundu Waufulu.” Msonganowu  watendekwe m’misinda 12 ja ku Mexico. * Yipepala yaŵalikolecelagayi, cine caŵaga kusogolo cine kumgongo. Ŵamboni ŵatandite kamulicisya masengo litala lyeleli kutandila mu 1936.

Magasini jine jasasile yakuyicisya ya masengo ga Ŵamboni gakwenda ni yipepala ku Mexico City. Jatite, “Palisiku lyandanda [lya Msongano], [Ŵamboni] ŵalimbikasisye kuti aŵilanjile ŵandu ŵajinji. Palisiku lyakuyicisya kwayice ŵandu ŵajinji mwamti ŵane ŵasoŵile pakutama.” Yakuŵilanjila ŵanduyi yasakalisye ŵa Calici ca Katolika, mpaka ŵatandite kwasisya Ŵamboniwo. Nambo abale ni alongo ŵangali woga nganawujila munyuma. Magasini jila jasasilesoni kuti, “Mumsinda wosope mwagumbele Ŵamboni, acalume ni acakongwe ŵakwe, ali alikolecele ‘yipepala’ yakwaŵilanjila ŵandu yila.” M’magasiniji mwalijisoni cipikica ca abale ali m’misewu ja ku Mexico City. Pasi pa ciwulilico ŵalembile kuti, “Kusyungula mumsinda.”

M’yaka yeleyo, Ŵamboni ŵajinji m’cilambo ca Mexico ŵasosekwaga kulipeleka mnope kuti ajawule ku misongano jekulungwakulungwa. Ŵajinji ŵatyocelaga ku misi kwene, kwakuti kwangapita sitima, soni kwangali misewu jekulungwa. Mpingo wine wasasile kuti kumangwawoko, kwangayika atamose sitima. Ŵandu ŵakwelaga bulu kapena kwenda wapasi kwa masiku gejinji kuti akayice kwakwelela sitima jakuti jikalece mumsinda waŵatendelaga msongano.

Ŵamboni ŵajinji ŵaliji ŵakulaga. Ŵane ŵalepelaga kupata atamose mbiya jakulipilila ulendo wakwawula kumsongano. Payice kumsonganoko, ŵajinji ŵatamaga ni Ŵamboni ŵakukoko, ŵaŵakundile kutama nawo ligongo lyakwanonyela. Ŵane ŵagonaga m’Nyumba sya Ucimwene. Pandaŵi jine, ŵandu ŵakwana 90 ŵayicile ku nyambi. Kweleko “ŵagonile payikatoni ya mabuku yekulungwakulungwa yakwana 20.” Buku japacaka jasasile kuti abaleŵa ŵatiji “ŵagonile pambone soni pakutukutila cenene kulekangana ni pasimenti.”

Ŵamboniŵa, ŵayiwonaga kuti yaliji yakuŵajilwa kutenda yiliyose yampaka akombole kuti akasimanikweje ku misonganoji. Mtima welewu upalipe mpaka apano. Lelojino ciŵalanjilo ca ŵakulalicila m’cilambo ca Mexico cikukwela mpaka kuŵandicilaga ku 1,000,000. * Mu 1949 nyambi ja Mexico jatumisye lipoti ku likulu lyakusala ya abale kuti, “Yakusawusya yakusimana nayo, ngayikwatendekasya kuwujila munyuma mwausimu ligongo msongano wuliwose wakutenda ukolaga ngani syakulimbikasya. Ndaŵi syosyope akuwusyaga kuti, Ana tucitendasoni cakaci msongano wine?” Mpaka apano abale ŵa ku Mexico ngakuwujilape munyuma.—Nganiji jityocele ku Central America.