Yesu jwatujiganyisye kuti tutameje mwamtedele ni achimjetu. Nambope, pandaŵi jine jwalakwe jwasalile ŵandumetume ŵakwe kuti, “Mkaganisya kuti yiche kukupeleka mtendele pa chilambo chapasi pano. Nganiyika kupeleka mtendele, nambo [upanga]. Une nayiche kukulekanganya mwanache jwamlume ni babagwe, mwanache jwamkongwe ni mamagwe, jwamkongwe ni akwegwegwe.” (Mat. 10:34, 35) Ana pelepa Yesu jwagopolelaga chichi?

Yesu nganagopolelaga kuti jwayiche ni chakulinga chakuti jwalekanganyeje ŵandu m’maŵasa. Nambo jwalakwe jwamanyililaga kuti yaŵajiganyaga mpaka yitendekasye kuti m’maŵasa gane ŵandu atendeje yindu mwakulekangana. Myoyo ŵandu ŵakusachilila kuŵa ŵakulijiganya ŵa Klistu, soni ŵayiche pakubatisidwa akusasosekwa kumanyilila kuti ndaŵi sine ŵandu ŵa mwiŵasa mwawo nganaŵa asangalele ni yasagwileyo. Ndaŵi sine mjawo jwa mu ulombela kapena ŵandu ŵane ŵa mwiŵasa mwawo mpaka ŵasisyeje jemanjaji. Yeleyi mpaka yasokonasyeje pakutenda yindu mwakamulana ni yaŵajiganyisye Yesu.

Baibulo jikusalimbikasya Aklistu ‘kutama mwamtendele ni ŵandu wosope.’ (Alo. 12:18) Nambope, m’maŵasa gane yindu yaŵajiganyisye Yesu yikusaŵa mpela [“upanga,” NWT]. Yeleyi yikusatendekwa naga mwiŵasamo mundu jwine asagwile kutenda yindu yaŵajiganyisye Yesu nambo ŵane mwiŵasa pemo akuŵengana nayo. Payitendekwe yeleyi, ŵandu ŵakuŵengana ni yaŵajiganyisye Yesuyi akusaŵa “amagongo” ŵa mundu jwasagwile kulijiganya usyesyenejo.—Mat. 10:36.

Ndaŵi sine ŵakulijiganya ŵa Klistu ŵakusatama m’maŵasa gakulekangana dini, akusasosekwa kulimba mtima kuti asagule kutenda yindu yakumsangalasya Yehofa ni Yesu, kapena yakwasangalasya ŵachibale ŵawo. Mwachisyasyo, ŵachibaleŵa mpaka ŵakanganichisyeje jemanjaji kutenda nawo yisangalalo ya maholide ga dini. Ŵandu ŵalijiganyisye usyesyene akusasosekwa kusagula jwakusaka kumsangalasya. Yesu jwatite, “Mundu jwakwanonyela babagwe kapena mamagwe kupunda une, ngakuŵajilwa kuŵa jwakulijiganya jwangu.” (Mat. 10:37) Pelepa Yesu nganagopolelaga kuti mundu jwasagwile kuŵa jwakulijiganya jwakwe ngakusosekwa kwanonyelaga achinangolo ŵakwe. Mmalomwakwe jwasalile ŵakulijiganya ŵakwe kuti akusosekwa kusagula yindu yakusosekwa mnope paumi wawo. Naga ŵachibale ŵetu ŵangakulupilila akutusisya ngatukusaleka kwanonyela. Nambope tukusamanyilila kuti chindu chakusosekwa mnope chili kumnonyela Yehofa.

Kusala yisyene kusisya kwa ŵandu ŵa mwiŵasa mwetu kukusaŵa kwakupweteka mnope. Nambope ŵakulijiganya ŵa Yesu akusakumbuchila maloŵe gakwe gakuti, “Mundu jwangakutwichila [chitela chakwe chakulagachisya] ni kunguya une, ngakuŵajilwa kuŵa jakulijiganya jwangu.” (Mat. 10:38) Kuŵecheta kwine, naga ŵandu ŵa mwiŵasa mwawo akwasisya, Aklistu akusosekwa kukuwona kuŵa mbali ja yakusawusya yakusosekwa kuyipililaga ŵakulijiganya ŵa Klistu. Nambosoni akusakulupilila kuti ndamo syawo syambone mpaka syatendekasye ŵachibale ŵawo ŵangakulupilila kuti atande kulijiganya Baibulo.—1 Pet. 3:1, 2.