Mu ngani jandanda tuyiweni kuti Mwenye Croesus jwalusile ngondo jakulimbana ni mwenye jwa ku Pelesiya. Jwalakwe jwalusile ligongo lyakupikanila yakulochesya yaunami ya jwambopesi jwa ku Delphi. Nambope mwakulekangana ni yeleyi, Baibulo jikusasala yakulochesya yakwamba mwenye jwa Pelesiya yayakwanilichikwe yisyesyene.

Yaka chiŵandika 200 mwenye Kolesi mkanapagwe, jwakulochesya jwa Chihebeli, Yesaya, jwasasile chilepe lina lyakwe soni mwachachigomechela msinda wakulimba wa Babulo.

Pa Yesaya 44:24, 27, 28 pakusati, “Yehofa akuŵecheta kuti, . . . ‘Une ni jwangugasalila mesi gakusokoka kuti, “Mjumule, soni sulo syenu syosope tinjisijumusya.” Une ni jwangusala ya Kolesi kuti, “Jwalakwe ali mkuchinga jwangu, soni chachikwanilisya chenene yosope yangusaka.” Une ni jwangusala ya Yelusalemu kuti, “Chachitaŵidwasoni,” nambosoni yakwamba, “Kutaŵidwa kwa yilimbilimbi” ya nyumba jakulambilila.’”

Mwakamulana ni jwakulemba mbili jwa Chigiliki Herodotus, asilikali ŵa Kolesi ŵasepwisye mesi ga m’Lusulo lwa Filate, lwalwasyungulile msinda wa Babulo. Pulani jakweji jakamuchisye kuti asilikaliŵa ajomboche lusulolu. Paŵasumwile msindawo, Kolesi jwagopwele Ayuda ku ukapolo ku Babulo ni kwakunda kuti awujile kumangwawo, nambosoni kuti akataŵe Yelusalemu, juŵaŵele masame kwa yaka 70.

Pa Yesaya 45:1 pakusati, “Une Yehofa mbechete kwa jwamsagulwe jwangu Kolesi, junamkamwile mkono wakwe wamlyo kuti ngomeche mitundu ja ŵandu pameso pakwe, kuti ngopole mauchimwene, kuti nam’wugulile milango ja matanga gaŵiligaŵili soni yipata yichiŵa yangawugala.”

Asilikali ŵa Kolesi ŵajinjile mumsindawo kupitila pa matanga gaŵili ga yisyano ligongo lyakuti ŵagalesile gangawugala. Yikaŵe kuti ŵandu ŵa mumsinda wa Babulo ŵagamanyililaga mapulani ga Kolesi, akawugele yipata yosope yakwinjilila mumsindawo, yayaliji kumbali ja lusulo. Nambope mpela mwaŵaŵechetele Yesaya, yipata ya msindawo yaliji yangawugala.

Yakulochesya yeleyi yili yine mwa yakulochesya yejinji yayakwanilichikwe, yayikusimanikwa m’Baibulo. a Ndaŵi syejinji yakulochesya ya ŵandu yikusalongoleledwa ni milungu jaunami, nambo ya m’Baibulo yikusatyochela kwa Yehofa. Jwalakwe akusati, ‘Une ngusalochesya ya mbesi kutandila pandanda, soni kutandila kalakala, ngusaŵecheta yanganiyiŵe kutendekwa.’—Yesaya 46:10.

 Mlungu jwakuwona, jwele lina lyakwe ali Yehofa ni jwampaka akombole kutenda yeleyi. Lina lyakwe likusagopolela kuti, “Akusatendekasyaga.” Yeleyi yikulosya kuti jwalakwe akwete machili gakumanyilila yamsogolo, soni kuyitendekasya kuti yikwanilichikwe mwakamulana ni lisosa lyakwe. Yeleyi yikutusimichisya kuti jwalakwe chachikwanilisya yosope yatulaguchisye.

Ana akusaka kumanyilila yakulochesya ya m’Baibulo yakwamba masiku getu gano? Yaka 2,000 yipiteyo, Baibulo jasasile kala kuti ‘masiku gambesi jichiŵa ndaŵi japajika soni jakusawusya.’ Ana mbesi ja chichi? Ngaŵa mbesi ja chilambo chapasi kapena ŵandu wosope, nambo mbesi ja ngondo, yindu yangalwe soni yipwetesi yiliyose yalasile nayo ŵandu kwa yaka yejinji. Kwende tulole yakulochesya yine yakulosya kuti tuli “m’masiku gambesi.”

Pa 2 Timoteyo 3:1-5 pakusati, “Masiku gakumalisya . . . , ŵandu chachiŵa ŵakulinonyela, ŵakunonyela mbiya, ŵakulipikana, ŵakulikwesya, ŵakunyosya, ŵangapikanila achinangolo, ŵangayamika, soni ŵangakulupichika. Chachiŵasoni ŵanganonyela achalongo achimjawo, ŵangasaka kukamulana ni ŵane, ŵakwalambuchisya achimjawo, ŵangalilekasya, ŵakogoya, ŵanganonyela yindu yambone, ŵakwapeleka achimjawo kwa adani, ŵangapikana ya ŵane, ŵakunyada, soni ŵakunonyela yakusangalasya mmalo mwakumnonyela Mlungu. Nambosoni chachiwonekaga mpela ŵandu ŵakulipeleka kwa Mlungu nambo umi wawo uchiŵa wakutindana ni kulipeleka kwawoko.”

Ana wawojo ngakwitichisya kuti yeleyi yitupile mnope masiku agano? Ana ngakusayiwona kuti ŵandu ŵatusyungulile akusalinonyela achimsyene, akusanonyela mnope mbiya soni ali ŵakulikwesya? Ana ngakusayiwona kuti ŵandu ŵangasamala ya ŵane soni ŵangakamulana ni achimjawo? Mwangakayichila akusayiwona kuti ŵandu ŵajinji ngakusiŵapikanila achinangolo, soni akusanonyela yindu yakusangalasya mmalo mwakumnonyela Mlungu. Nambosoni lisiku lililyose yindu yikwendelechelape kusakala.

Pa Mateyu 24:6, 7 pakusati, “Chimchipikana masegwe ga ngondo chapakuŵandika soni ngani syakwamba ngondo. . . . Pakuŵa mtundu uchijimuchilana ni mtundu ujakwe soni uchimwene ni uchimwene ujakwe.”

Kuwungunya kwine kwalosisye kuti kutandila mu 1914, ŵandu ŵakupunda 100 miliyoni awile pangondo. Chiŵalanjilo chelechi mpaka chipunde winji wa ŵandu m’yilambo yejinji. Agambe ganisya kulila, chanasa soni yipwetesi yalasile nayo ŵandu ligongo lya winji wa chiŵalanjilo cha ŵandu ŵawile pangondo syelesi. Ana ŵandu alijiganyisye chilichose pa yeleyi kuti amasye ngondo?

Pa Mateyu 24:7 pakusati, “Kuchiŵa sala.”

Bungwe Jakulolela Yakulya Pachilambo Chosope jatite, “Atamose kuti pachilambopa pakusaŵa yakulya yakwanila kulisya jwalijose, nambope ŵandu 815 miliyoni, kapena kuti mundu jumo pa ŵandu 9 ŵaliwose akusagona ni sala lisiku lililyose. Konjechesya pelepo, mundu jumo pa ŵatatu ŵaliwose akusalwala ulwele wakusoŵa yakulya yakwanila m’chilu.” Yikuwoneka kuti chaka chilichose, ŵanache ŵakwana 3 miliyoni akusawa ligongo lya sala.

Pa Luka 21:11 pakusati, “Kuchiŵa yisichinya yekulungwa.”

M’yaka ya pachangakaŵapa, ŵandu aŵele ali mkulaga ni yisichinya yekulungwakulungwa chiŵandika 50,000. Yisichinya chiŵandika 100 mwa yeleyi yajonasile mnope majumba, soni chaka chilichose pakusatendekwa chisichinya chimo chamachili mnope. Mwakamulana ni yakuwungunya, yikuwoneka kuti yaka ya pasikati pa 1975 mpaka 2000, yisichinya yawuleje ŵandu ŵakwana 471,000.

Pa Mateyu 24:14 pakusati, “Ngani syambone asi syakwamba ya Uchimwene sichilalichidwa pachilambo chosope chapasi kuti uŵe umboni kwa ŵandu ŵamitundu josope, kaneko mbesi jichiyika.”

Ŵamboni sya Yehofa ŵakupunda 8 miliyoni, aŵele ali mkulalichila ngani syambone syakwamba Uchimwene wa Mlungu m’yilambo yakwana 240 pachilambo chosope. Akusalalichila ngani syambone m’misinda, m’misi soni palipose papakusimanikwa ŵandu. Mlungu pachachijikutila ni masengoga, yakulochesyayi yikusati, “Kaneko mbesi jichiyika.” Ana yeleyi yichigopolela chichi? Yichigopolela kumala kwa maulamusi ga ŵandu soni kutanda kwa Uchimwene wa Mlungu. Ana yakulochesya yapi yayichikwanilichikwa mu Uchimwene wa Mlungu? Ajendelechele kuŵalanga magasiniji kuti amanyilile yeleyi.