Ana pakwete papite kumalilo ni kwalema kumtondoya mundu jwakulila? Yeleyi yikusatendekwa mwine ligongo lyakusoŵa cakuŵeceta kapena mwampaka aŵecetele yine yakwe. Akadandawula, pana yampaka atende.

Pandaŵiji cacikusasosekwa mnope ni kusimanikwa kumaliloko, soni kuŵeceta maloŵe gamnono gakutamika mtima pasi mpela gakuti, “Pepani.” M’yilambo yine kumkumbatila jwakulilajo kapena kumkamula ligasa kukusalosya kuti tukusamnonyela. Jwakulilajo pakuŵeceta tukusosekwa kumpikanila cenene. Yinesoni yampaka atende yili kulikamucisya masengo liŵasalyo, mpela kuteleka yakulya, kojesya ŵanace, kapena yindu yine. Kutenda yeleyi kuli kwakamucisya mnope kulekangana ni kuŵeceta maloŵe gejinji.

Pacaciyika lisiku line kukwalola ŵakulilawo, mwine mpaka alinje kuŵeceta yindu yine yambone yaŵatendaga mundu juŵawilejo. Yeleyi mpaka yimtondoye jwakulilajo mwinesoni mpaka atande kumwemwetela. Cisyasyo panganiji cili ca jwamkongwe jwine lina lyakwe Pam. Ŵamkwakwe lina lyawo Ian ŵajasice yaka 6 yipiteyo. Pam ŵatite, “Ndaŵi sine ŵandu akusaŵeceta yindu yambone  yaŵatendaga ŵamkwangu. Yine yikusaŵa yakuti nganinayimanyililaga kose. Yeleyi yikusandamika mtima pasi.”

Ŵandu ŵane paŵawungunyisye ŵapatile kuti malilo pasicile, ŵandu ŵajinji ŵangayikasoni lisiku line kukwatondoya ŵakulilawo. M’yoyo tukwalimbikasya kuti atendeje yakomboleka kuti akaloleje ŵakulilawo ndaŵi ni katema. Mpaka alinganye ndandanda jakutendela yeleyi. * Ŵandu ŵajinji akusayamicila kwatondoya kwati m’yiyiku soni canasa cawo cikusanandipa.

Kwende tulole cisyasyo ca jwamkongwe jwine jwa ku Japan lina lyakwe Kaori. Mamagwe ŵajasice, kaneko pali papite miyesi 15 mkulugwe ŵajasicesoni. Nambo mundu jwine lina lyakwe Ritsuko ŵamkamucisye. Ritsuko ali jwamkulungwa kupunda Kaori, mwati ŵaŵele ali kumkamucisya mpela mjakwe jwapamtima. Kaori ŵatite, “Kusala yisyene, nganisangalalaga kuti Ritsuko kapena mundu jwine jwalijose aŵe mpela akwinjila mmalo mwa mama ŵangu. Nambo ligongo lyakuti Ritsuko ŵangamucisyaga cenene, natandite kumnonyela. Cijuma cilicose, twajawulaga yimpepe kukulalicila soni ku misongano ja mpingo. Ritsuko ŵambilangaga kuti tukamwe yimpepe yakumwa, soni kulya yimpepe. Ndaŵi syejinji ŵalembelaga yikalata. Ritsuko ŵaliji mpela mama ŵangu, mwati yaŵatendagayi yangamucisye mnope.”

Apano yimasile yaka 12 ciwile mamagwe Kaori. Jwalakwe pampepe ni ŵamkwakwe akusamalila ndaŵi jejinji ali mkulalicila. Kaori ŵatite, “Ritsuko akwendelecelape kungamucisya. Pambite kumusi, ngusajawula kwa Ritsuko kuti ngamlole, mwati akusalimbikasya kwabasi.”

Cisyasyo cine cili ca jwamkongwe jwine Jwamboni sya Yehofa jwa m’cilambo ca Cyprus lina lyakwe Poli. Ŵandu aŵele ali kumkamucisya Poli kutyocela paŵajasice ŵamkwakwe a Sozos ni ulwele wa mu ututu. Ŵamkwakwewo ŵaliji mundu jwambone. Mpela mkucinga Jwaciklistu, ŵaŵilangaga ŵanace ni acakongwe ŵamasije kukunguluka soni kulya yimpepe cakulya kumangwakwe. (Yakobo 1:27) A Sozos ŵajasice ali ni yaka 53. Poli ŵatite, “Twaŵele mwiŵasa kwa yaka 33. Ngusinalila ŵamkwangu ligongo ŵaliji mundu jwakulupicika.”

Paŵasicile malilo, Poli ŵasamile ku Canada pampepe ni mwanagwe jwamlume jwa yaka 15 lina lyakwe Daniel. Kweleko ŵatanditesoni kusongana ni Ŵamboni sya Yehofa. Poli ŵatite, “Ku mpingo wasambanoku, acimjetu nganamanyililaga yakusawusya yatwasimene nayo. Nambo ŵatulimbikasyagape soni kutukamucisya. Cikamucisyoci caliji ca pandaŵi jakwe ligongo mwanangu Daniel ŵasoŵaga babagwe. Acakulungwa ŵa mumpingo ŵam’nonyelagasoni mwananguju. Mwati jumo mwa acakulungwaŵa ŵam’ŵilangaga Daniel kukunguluka kapena kuputa mpila ni acimjakwe.” Poli ni mwanagwe apano yindu yikwajendela cenene.

Pana yindu yejinji yampaka tutende pakwakamucisya, soni kwatondoya ŵakulila. Baibulo jikusatutondoyasoni pakusala ya cembeceyo ca ŵawe.