Yaka 3,000 yipiteyo, Daudi ŵalembile kuti: “Mwambanganyisye mwakusimonjesya.” (Salimo 139:14) Ana wawojo ŵangasimonga ni mwakusakulila mwanace kutyocela pa kaselo kamo? Ŵandu ŵajinji akusayamicila Mlungu mwaŵayipanganyicisye yindu yosope yaumi.—Aŵalanje Salimo 139:13-17; Ahebeli 3:4.

Mlungu juŵapanganyisye yindu yosope, soni cilambo capasi kuti ŵandu atamejemo, ni juŵapanganyisyesoni umi. (Salimo 36:9) Jwalakwe ŵaŵecete ni ŵandu kalako kuti atusalile yakwamba jwalakwejo.—Aŵalanje Yesaya 45:18.

Yilu yetu yikusalandana ni ya yinyama pa yindu yine. Yili m’yoyo ligongo lyakuti Mkupanganya ni juŵayipanganyisye yosopeyi kuti yitameje pacilambo. Jwalakwe nganapanganya mundu jwandanda kutyocela ku cinyama, nambo kutyocela ku litaka.—Aŵalanje Genesis 1:24; 2:7.

Yinyama ni ŵandu yikusalekangana m’matala gaŵili gekulungwa. Candanda, ŵandu akusakombola kummanyilila Mkupanganya, kumnonyela, soni kumcimbicisya. Caŵili, ŵandu ŵapanganyisye kuti atameje kwangamala, nambo yinyama nganayipanganya mwati m’yoyo. Nambo apanopano, ŵandu wosope akusawaga ligongo lyakuti mundu jwandanda ŵakanile kuti Mkupanganya amlongoleleje.—Aŵalanje Genesis 1:27; 2:15-17.