Buku jine jakutagulila ya yindu yakuwukulidwa m’masame (Biblical Archaeology Review) jasasile kuti yaŵapatile ŵandu ŵakuwukula yikusimicisya kuti ŵandu “ciŵandika 50” ŵakolanjidwa m’Malemba ga Cihebeli ŵapali. Pa ŵanduŵa pana mayimwene 14 ga Yuda ni Isalayeli, kupwatikapo mayimwene gakumanyika mnope mpela Daudi ni Hesekiya, soni gane gangamanyika mnope mpela Menahemu ni Peka. Panasoni ndandanda ja mayimwene msano ga ku Iguputo, soni mayimwene 19 ga ku Asiliya, Babiloni, Mowabu, Pelisiya ni ga ku Asuli. Baibulo, soni yakuwukulayi yikusalosya kuti kwapali ŵakulamula, ŵambopesi, acimlembela, soni acakulungwakulungwa ŵa boma.

Bukuji jatite, “ŵandu ŵamlijiganye mnope akusajiticisya” yakuti ŵanduŵa ŵapali. Malemba ga Cigiliki ga Ciklistu gakusasala ya ŵandu ŵakala ŵakumanyika mnope, soni yakuwukula m’masame yikusalosya kuti ŵanduŵa yisyene ŵapali. Ŵandu ŵakwe mpela Helodi, Pontiyo Pilato, Tibeliya, Kayafa, soni Seligiyo Paulo.

Lelo jino m’mikuli jajikolasile m’Baibulo masimba gamasile. Nambo Baibulo jikusasala ya masimba maulendo gakwana 150 yayikulosya kuti ŵakulemba Baibulo ŵagamanyililaga cenene. Syejinji mwa nganisi sikusatagulila ya masimba mwakuwanicisya, nambo sine ya masimba gasyesyenego. Mwambone, Baibulo jikusasala yakuti Samusoni, Daudi ni Benaya ŵawuleje masimba. (Oweruza 14:5, 6; 1 Samueli 17:34, 35; 2 Samueli 23:20) Jikusasalasoni ya ŵandu ŵane ŵaŵawulajidwe ni masimba.—1 Mafumu 13:24; 2 Mafumu 17:25.

Kalakala, mtundu wine wa masimba (Panthera leo persica) wasimanikwaga ku Asia Minor, Gilisi, Palesitina, Siliya, Mesopotamia, soni ku India. Ŵandu ŵakweleku ŵanonyelaga kwambula masimbaga ligongo lyakuti ŵagajogopaga, soni kugacimbicisya. Cisyasyo cimo cili ciwulili ca lisimba caŵajambwile pa lipupa mungulugulu msewu wine wekulungwa wakwawula kwa mwenye ku Babiloni.

Mbili jikusalosya kuti m’yaka ya m’ma 1100 asilikali ŵaŵaputaga ngondo pakwacisya ŵandu kuti ajinjile ciklistu ŵasakulaga masimba ku Palesitina. Yikuwoneka kuti kumaloku masimbaga gamasile cakundanda kwa yaka ya m’ma 1300. Nambope, ŵandu akusasala kuti masimba gasimanikwagape ku Mesopotamia ni ku Siliya mpaka m’yaka ya m’ma 1800, soni ku Iran ni Iraq gasimanikwagape mpaka m’yaka ya m’ma 1900.