1, 2. Ana ŵandu ŵa Yehofa alosisye mtima watuli kwandaŵi jelewu?

KWANDAŴI jelewu, ŵakulambila ŵa Yehofa aŵele ali mkwembeceya kwanilicikwa kwa yakulocesya ya m’Baibulo. Mwambone, Yelemiya ŵalocesye kuti msinda wa Yuda ucijonanjikwa. Yakulocesyayi yakwanilicikwe mu 607 B.C.E, pandaŵi jele Ababulo ŵawujonasile msindawu. (Yer. 25:8-11) Yesaya, juŵalocesye kuti Yehofa cacakamucisya Ayuda kuti atyoce ku ukapolo ni kuwujila kumangwawo, ŵasasile kuti, ‘Ŵakusangalala ali ŵandu ŵakumjembeceya Yehofa.’ (Yes. 30:18) Mika, juŵalocesyesoni yakwamba ŵandu ŵa Mlungu, ŵasimicisye mumtima kuti, “cinjimjembeceya Yehofa.” (Mika 7:7) Kwa yaka yejinji, ŵakutumicila ŵa Mlungu ŵajembeceyagasoni kwanilicikwa kwa yakulocesya yakwamba Mesiya, kapena Klistu.—Luk. 3:15; 1 Pet. 1:10-12. *

² Ŵakutumicila ŵa Mlungu ŵa moŵa agano akwembeceyasoni kwanilicikwa kwa yakulocesya yine yakwamba Mesiya. Kupitila mu Ucimwene wa Mesiya, Yehofa cacimasya yakusawusya yosope ya ŵandu mwakonanga ŵandu ŵakusakala soni kwakulupusya ŵandu ŵambone ku cilambo cakusakala ca Satanaci. (1 Yoh.  5:19) M’yoyo, kwende wosope tuŵe mesope patukwembeceya kumala kwa cilambo cakusakalaci kwacikutendekwe pacangakaŵapa.

3. Ana ŵandu ŵaŵele ali mkwembeceya kumala kwa cilambo cakusakalaci kwandaŵi jelewu mpaka aliwusyeje ciwusyo catuli?

³ Ŵakutumicila ŵa Yehofawe, tukwembeceya mwalung’wanu ndaŵi jele lisosa lya Mlungu ‘licitendekwa pacilambo capasi, mpela kwinani.’ (Mat. 6:10) Nambope, ŵane ŵaŵele ali mkwembeceya kumala kwa cilambo cakusakalaci kwa ndaŵi jelewu, mpaka aliwusyeje kuti, ‘Ana tukwetepe magongo gakupikanika gakuti tujembeceyejepe?’

4. Ligongo cici tukusosekwa kwembeceyape?

⁴ Baibulo jikusatulimbikasya kuti tujembeceyejepe kumala kwa cilamboci kwacikutendekwe pacangakaŵapa. Yesu ŵasalile ŵakumkuya ŵakwe kuti ‘aŵeje mesope.’ (Mat. 24:42; Luk. 21:34-36) Yaŵasasile Yesuyi yili ligongo lyakwanila lyakututendekasya kuti tujendelecele kwembeceya. Likuga lya Yehofa liŵele lili mkutulimbikasyasoni kutenda yeleyi. Mwambone, mabuku galikusakoposya gakusatulimbikasya kuti ‘tujembeceyeje soni kumbucila ndaŵi syosope ya kuŵapo kwa lisiku lya Yehofa.’ Gakusatulimbikasyasoni kuti tuŵiceje nganisyo syetu pa cembeceyo ca cilambo casambano caŵatulajisye Mlungu.—Aŵalanje 2 Petulo 3:11-13.

5. Ligongo cici tukusosekwa kuŵa mesope mnopemnope m’ndaŵi jetu jino?

⁵ Aklistu ŵa m’yaka 100 yandanda ŵasosekwaga kwembeceya, nambo m’weji tukusosekwa kutenda yeleyi mnope. Ligongo cici? Ligongo lyakuti tukutama mundaŵi ja kuŵapo kwa Klistu. Yimanyilo ya kuŵapo kwakwe yatandite kuwonecela mu 1914. Yimanyiloyi yayikupwatikapo kusakala mnope kwa yakutendekwa ya m’cilamboci, soni masengo gakulalicila, yikulosya kuti tukutama mu ndaŵi ja “mbesi ja cilambo capasi.” (Mat. 24:3, 7-14) Pakuŵa Yesu nganasala kuti ndaŵi jambesi jiciŵa jelewu catuli, tukusosekwa kuŵa mesope ndaŵi syosope.

6. Ana tukumanyilila catuli kuti cilambo cicisakale mnope pajikuŵandicila mbesi?

⁶ Baibulo jikusasala kuti “m’moŵa gambesi” ŵandu cacisakala mnope pacilambopa. (2 Tim. 3:1, 13; Mat. 24:21; Ciu. 12:12) M’yoyo tujembeceyeje kuti yindu ciyijendelecele kusakala mnope. Ana nikuti “mbesi ja cilambo” jigopolela ndaŵi jele yindu yicisakala mnope pacilambo capasi?

7. Ana lilemba lya Matayo 24:37-39 likusalosya kuti yindu yiciŵa wuli m’moŵa gambesi?

⁷ Nambo ana yindu yiciŵa wuli “yisawusyo yakogoya” mkaniyitande? (Ciu. 7:14) Ana mpaka tujile kuti m’cilambo cilicose mucitendekwaga ngondo, ŵandu wosope cacisoŵaga yakulya soni ulwele ucisimanikwaga panyumba jilijose? Yikaŵe kuti yindu yiciyika pelepa, nikuti mundu jwalijose, atamose ŵangakulupilila Mlungu, akamanyilile kuti yakulocesya ya m’Baibulo yikwanilicikwa. Nambo Yesu ŵasasile kuti ŵandu ŵajinji ‘ngasamanyilila’ ya kuŵapo kwakwe. Jemanjaji cacitamaga mpela mwaŵatamilaga masiku gosope ni cacisupuka mnope lisiku lya Yehofa lili liyice. (Aŵalanje Matayo 24:37-39.) Malemba gakusalosya kuti m’moŵa ga mbesi yindu ngasiyisakala mwakupundanganya mwati ŵandu nikutanda kulupilila kuti mbesi jiŵandicile.—Luk. 17:20; 2 Pet. 3:3, 4.

8. Ana ŵandu ŵakusapikanila maloŵe ga Yesu gakuti “aŵeje mesope” ngakukayicila ya cici?

⁸ Nambope, kuti ŵandu ŵaŵele ali mkupikanila maloŵe ga Yesu gakuti, “aŵeje  mesope” camanyilile kuti yakulocesya yakwamba moŵa gambesi yikwanilicikwa, yakulocesyayo yicisosekwa kuwonecela mnope. (Mat. 24:27, 42) Yakulocesyayi yiŵele yili mkukwanilicikwa kutandila mu 1914. Mwangakayicila, agano gali “moŵa gambesi.” Yehofa asigele panandi konanga cilambo cakusakalaci.

9. Ligongo cici tukusosekwa kwembeceyape mbesi jacilambo cakusakalaci?

⁹ Sambano, ligongo cici tukusosekwa kwembeceyape? Ligongo tukusapikanila Yesu Klistu, soni tukuwona kwanilicikwa kwa yimanyilo ya kuŵapo kwakwe. Tukulupilila kuti mbesi jiŵandicile ngaŵaga ligongo lya yindu yakwamba kuyipikana nambo ligongo lyakuti tukulupilila kuti yakulocesya ya m’Baibulo yikwanilicikwa. M’yoyo patukwembeceya mbesi jacilamboci tukusosekwa kuŵa mesope.

10, 11. (a) Ligongo cici Yesu ŵasalile ŵakumkuya ŵakwe kuti “aŵeje mesope”? (b) Ana Yesu ŵasalile ŵakumkuya ŵakwe kuti atendeje cici naga atandite kuyiwona kuti mbesi jikucelewa? (Alole ciwulili cacili kundanda kwa nganiji.)

¹⁰ Aklistu ŵajinji pasikati petu aŵele ali mesope mwausimu kwa yaka yejinji. Nambo tukakunda kuti kulewupa kwa ndaŵiji kututendekasye kuti tulece kwembeceya. Tukusosekwa kosecela kwika kwa Yesu kukumasya yakusakala yosope. Akaliŵalila kuti Yesu ŵakalamwisye ŵakumkuya ŵakwe kuti, “Aŵeje mesope, aŵeje ŵacile, pakuŵa ngakumanyilila kuti ndaŵi jakwe jiciyika cakaci. Yili mpela mundu jwakwawula kucilambo cine juŵalesile nyumba jakwe m’miyala mwa ŵamasengo ŵakwe, jwalijose mwakamulana ni masengo gakwe ni ŵamlamwile mlonda jwa pacipata kuti aŵeje mesope. M’yoyo aŵeje mesope, pakuŵa ngakumanyilila lisiku lyacaciyika msyene nyumba. Ngakumanyilila naga caciyika musi, pasikati cilo, kumasikusiku, kapena kundaŵi kuti pacaciyika mwakusisimucisya, akaja kwasimana ali mlugono. Nambo yangwasalila jemanjayi, ngwasalila wosope kuti, Aŵeje mesope.”—Maliko 13:33-37.

¹¹ Ŵakumkuya Yesu paŵamanyilile kuti Klistu atandite kulamulila mu 1914, ŵatandite kosecela acimanyililaga kuti mbesi mpaka jiyice ndaŵi jilijose. Jemanjaji ŵakosecelaga mwakutenda yejinji pamasengo gakulalicila ya Ucimwene. Yesu ŵasasile kuti cacikomboleka kwika “kumasikusiku kapena kundaŵi.” Yikaŵe kuti caciyika ndaŵi jelejo, ana ŵakumkuya ŵakwe akasosekwe kutenda cici? Jwalakwe ŵatite, “Aŵeje mesope.” M’yoyo, kwembeceya kwandaŵi jelewu ngakukugopolela kuti mbesi jili kutali mnope kapena kuti ngasijiyikasoni.

12. Ana Habakuku ŵam’wusisye cici Yehofa, soni ana ŵamjanjile wuli?

¹² Kwende tulole cisyasyo ca Habakuku juŵamlamwile kuti alocesye ya konasika kwa Yelusalemu. Jwalakwe ŵatandite masengo gakwe gakulalicila ya konasika kwa msindawu ŵane ali alalicile kala kwa yaka yejinji. Pandaŵijo yindu yakusakala soni yangali cilungamo yatupile mnope. Ligongo lya yeleyi Habakuku ŵawusisye kuti, “Wawo Yehofa, ana cinjililila cikamucisyo cawo mpaka cakaci?” Atamose kuti Yehofa nganamsalila lisiku lisyesyene lyele mbesi jiciyika, jwalakwe ŵamsalile kuti ‘ngajicelewa.’ Ŵamsalilesoni kuti ‘ajembeceyejepe.’—Aŵalanje Habakuku 1:1-4; 2:3.

13. Ana Habakuku akakombolece kola nganisyo syatuli, soni ligongo cici yeleyo yikaliji yakogoya?

¹³ Agambe ganisya yayikatendekwe yikaŵe kuti Habakuku atengwice ni atandite ganicisya kuti, ‘Mbele ndili mkupikana yakwamba konasika kwa Yelusalemu kwa yaka yejinji.  Wuli naga mbesi ngajiyika pacangakaŵapa? Ngangusosekwa kulalicila yakwamba mbesi mpela kuti msindawu ciwujonanjikwe pacangakaŵa. Calalicileje ŵane.’ Yikaŵe m’yoyo, nikuti Habakuku akajasile upile wakwe wakuŵa paunasi ni Yehofa, soni mwangakayicila akajonanjikwe pandaŵi jele Ababulo wajonangaga msinda wa Yelusalemu.

14. Ligongo cici tucim’yamicila Yehofa pakutusalila kuti tujembeceyejepe kwika kwa mbesi?

¹⁴ M’cilambo casambano, tucikumbucilaga yakulocesya yosope yakwamba mbesi ja cilamboci ni kulola kuti yikwanilicikwe. Kuganicisya yeleyi kucilimbisya cikulupi cetu mwa Yehofa, soni kucitukamucisya kulupilila kuti yilanga yine ciyikwanilicikwepe. (Aŵalanje Yoswa 23:14.) Pandaŵijo tucim’yamicila Yehofa ligongo lyakuyikasya mbesi pandaŵi jakwe soni ligongo lyakwasalila ŵandu kuti ajembeceyejepe kwika kwa mbesi.—Mase. 1:7; 1 Pet. 4:7.

15, 16. Ligongo cici masiku agano tukososekwa kamula masengo gakulalicila mwamtawu?

¹⁵ Likuga lya Yehofa cilijendelecele kutukumbusya kuti tutumicileje Mlungu mwamtawu. Yalikusatukumbusya likugayi ngayikusagamba kutukamucisya kuŵa ŵamtawu patukutumicila Mlungu, nambo yikusatukamucisyasoni kumanyilila kuti yimanyilo ya kuŵapo kwa Klistu yikwanilicikwa sambano jino. Sambano, ana cindu cakusosekwa mnope campaka tutende pakulosya kuti tukusapikanila yalikusasala likugali cili cici? Tukusosekwa kusosasosa candanda Ucimwene, soni cilungamo ca Mlungu mwakamula nawo masengo gakulalicila ngani syambone mwamtawu.—Mat. 6:33; Maliko 13:10.

¹⁶ Mlongo jwine ŵatite, “Kamula nawo masengo gakulalicila ngani syambone syakwamba ya Ucimwene wa Mlungu,  . . mpaka kukamucisye kwakulupusya ŵandu kuti akawa pandaŵi jakogoya jajikwisaji.” Mlongoju ŵasasile yakulupukayi ligongo ndaŵi jine jwalakwe ni ŵamkwakwe ŵakulupwice pandaŵi jele sitima jine jatiŵilaga m’mesi m’caka ca 1945. Ngosi jelejo jaliji jakogoya mnope kupunda ngosi syosope sya sitima sya pamesi. Nambo atamose pandaŵi jakogoya mpela jelejo, ŵandu ŵane nganamanyililaga cindu cakusosekwa mnope. Mlongojo ŵakumbucilaga jwamkongwe jwine ali mkugumila kuti, “Amawone! Cikwama cangu! Cikwama cangu! Yindu yangu yakatala yikwawula basi!” Mwakulekangana ni jwamkongwe jwelejo, ŵandu ŵane ŵaŵakwesile sitimajo ŵaŵisile umi wawo pangosi pakwakulupusya ŵandu ŵane ŵaŵagwilile m’nyasa. M’wejisoni tukusatenda yosope yampaka tukombole pakwakamucisya ŵandu. Tukusakamula masengo gakulalicila mwamtawu ni cakulinga cakwakamucisya ŵandu kuti  cakulupuce pandaŵi jakogoya mnope jajikwisa kusogoloku.

17. Ligongo cici tukulupilila kuti mbesi cijiyice ndaŵi jilijose?

¹⁷ Yayikutendekwa pacilamboyi yikulosya cenene kuti yajalocesye Baibulo yakwamba moŵa ga mbesi yikwanilicikwa, soni kuti mbesi ja yindu yakusala yosope jiŵandicile mnope. M’yoyo, tujembeceyeje kuti pacangakaŵapa “misengo likumi” soni “cilombo” yayikolasile pa Ciunukuko 17:16 ciyijimucile Babiloni Jwamkulungwa jwali dini syosope syawunami. Tukaliŵalila kuti Mlungu ‘caŵice m’mitima jawo’ nganisyo syakumjimucila Babilonisi. Yeleyo ciyitendekwe mwacitema soni ndaŵi jilijose. (Ciu. 17:17) Mbesi ja cilambo cakusakalaci jiŵandicile mnope. M’yoyo mpaka tutende cenene kupikanila maloŵe ga Yesu gakuti, “Asamale kuti mitima jawo jikasitopelwa ni kulya mnope, kumwa mnope ni kudandawula mnope ya umi, kuti lisikulyo likaja kwayicila mwakusisimucisya mpela citega.” (Luk. 21:34, 35; Ciu. 16:15) Kwende tusimicisye mtima kumtumicila Yehofa mwamtawu, tuli tukwete cikulupi cakuti jwalakwe ‘akusakamucisya jwalijose jwakusamjembeceya.’—Yes. 64:4.

18. Ana mungani jakuyicisya tucitagulilana ciwusyo capi?

¹⁸ Patukwembeceya mbesi ja cilambo cakusakalaci, kwende tupikanileje maloŵe ga Yuda gakuti, ‘Jemanja ŵakunonyelwa, alilimbisye pa cikulupi cawo ceswela mnope, soni apopeleje m’macili ga msimu weswela kuti ajendelecele kuŵa m’cinonyelo ca Mlungu. Atendeje yeleyi pakwembeceya kuti canasa ca Ambuje Yesu Klistu cawugulile litala lyakuti akapocela umi wangamala.’ (Yuda 20, 21) Sambano, ana mpaka tulosye catuli kuti tukwembeceya mwalung’wanu kwanilicikwa kwa cilanga ca Mlungu ca cilambo casambano? Tucitagulilana yeleyi mungani jakuyicisya.