Ana akusaganisya kuti Mlungu ŵagambile kutupa umi kuti tung’andeje, tukamuleje masengo, tulombeleje kapena kulombegwa, tukoleje ŵanace, kaneko ni kalambala? (Yobu 14:1, 2) Baibulo jikusalosya kuti atamose ŵandu ŵalunda mnope ŵaganisisyepo yeleyi.—Aŵalanje Mlaliki 2:11.

Ana umi wana cakulinga cilicose? Candanda, tukusosekwa kuliwusya kuti, Ana umi watandite uli? Panyuma pakumanyilila mwawuŵelele ututu soni cilu cetu cosope, ŵandu ŵajinji akusajiticisya kuti pana Mkupanganya jwalunda juŵatupanganyisye. (Aŵalanje Salimo 139:14.) Naga yili m’yoyo, nikuti jwalakwe ŵatupanganyisye ni cakulinga. Kumanyilila cakulinga celeci mpaka kutukamucisye kuti tuwuwoneje umi kuŵa wakusosekwa mnope.

Ligongo cici Mlungu ŵapanganyisye ŵandu?

Mlungu ŵalijaliwe liŵasa lyandanda ni kulipa masengo gakusangalasya mnope. Jwalakwe ŵasakaga kuti jemanjaji aŵelekane ni gumbala cilambo cosope, soni alinganye cilamboci kuŵa paladaiso soni kuti atame ni umi kwangamala.—Aŵalanje Genesis 1:28, 31.

Cakulinga ca Mlungu casokonecele pandaŵi jele ŵandu ŵajimucile ulamusi wakwe. Nambope Mlungu nganagamba kutuleka soni nganacenga cakulinga cakwe. Baibulo jikusatusimicisya kuti Mlungu cacakulupusya ŵandu ŵakulupicika soni kuti cakulinga cakwe pakwamba cilambo capasi cicikwanilicikwa. M’yoyo Mlungu akusaka kuti umi wetu ciwuŵe mpela muŵasacilaga pandanda. (Aŵalanje Salimo 37:29.) Alijiganye kutyocela m’Baibulo yampaka atende kuti casangalale ni yatulajisye Mlunguyi.