1. Ana tukutama mundaŵi jatuli?

TUKUTAMA mundaŵi jakusawusya mnope. Kutandila mu 1914 pagatandite “moŵa gambesi,” yindu pacilambopa yisakele mnope kupunda kalakose. (2 Tim. 3:1-5) Yindu ciyijendelecele kusakala ligongo Baibulo jalocesye kuti “ŵandu ŵakusakala soni ŵakulambucisya cacisakalilape.”—2 Tim. 3:13.

2. Ana ŵandu ŵajinji akunonyela yakusangalasya yatuli? (Alole ciwulili cacili penanici.)

² Ŵandu ŵajinji moŵa agano akunonyela yakusangalasya yakutindana ni malamusi ga m’Baibulo mpela yakuwulasyana, yamsese, yamisimu soni yine yejinji. Mwambone, pa Intaneti, pa TV, m’mafilimu, soni m’mabuku akusalosya kuti yakuwulasyana kapena yamsese yili yindu yambone. Yilambo yine apanopano yikundile kuti ŵandu atendeje yindu yayawonekaga kuŵa yangaŵajilwa. Nambo yeleyi ngayikulosya kuti Mlungu akundile kuti ŵandu atendeje yangaŵajilwayo.—Aŵalanje Aloma 1:28-32.

3. Ana ŵandu ŵa m’cilambo akusiŵawona wuli ŵandu ŵakusakuya ndamo syambone sya Mlungu?

³ M’yaka 100 yandanda, ŵakumkuya Yesu ŵaŵambalaga yakusangalasya  yakusakala. Ligongo lya yeleyi soni kuya ndamo syambone sya Mlungu, ŵandu ŵane ŵaŵecetelaga yacipongwe soni ŵalagasyaga. Ndumetume Petulo ŵalembile kuti, ‘Ligongo lyakuti jemanja [Aklistu] ngamkutenda nawo ndamo syakusakala, ŵandu ŵam’cilambo ŵangapikanicisya ni ligongo lyakwe akusamnyosya.’ (1 Pet. 4:4) Moŵa aganosoni, ŵandu ŵakusakuya ndamo syambone sya Mlungu akusiŵawona mpela ŵakuloŵela. Konjecesya pelepa, “wosope ŵakusaka kola umi wakulipeleka kwa Mlungu mwa Klistu Yesu cacalagasya.”—2 Tim. 3:12.

4. Ana Malemba gakusasala yatuli pakwamba ya kunonyela cilambo?

⁴ Malemba gakusasalila ŵandu ŵakusaka kutenda lisosa lya Mlungu kuti akanonyelaga cilambo kapena yitendo yakwe. (Aŵalanje 1 Yohane 2:15, 16.) Ŵadini, ŵandale soni ŵamalonda ali pasi pa ulamusi wa “mlungu jwa ndaŵi ajino,” jwali Satana. (2 Akoli. 4:4; 1 Yoh. 5:19) M’yoyo, m’weji Aklistu tukusosekwa kusamala mnope ni ŵandu ŵatukusasyoŵekana nawo. Maloŵe ga Mlungu gakusatukalamusya kuti, “Jwalijose akalambusya. Kusyoŵekana ni ŵandu ŵakusakala kukusajonanga ndamo syambone.”—1 Akoli. 15:33.

5, 6. Ana ngatukusosekwa kusyoŵekana ni ŵani soni ligongo cici?

⁵ Kuti tukajonanga ndamo syetu syambone, tukusosekwa kuŵambala kusyoŵekana ni ŵandu ŵa yitendo yakusakala. Yeleyi ngayigopolelape ŵandu ŵangalambila Yehofa nambo yikupwatikasoni ŵakulambila ŵa Yehofa ŵakusakasa mwamele malamusi gakwe. Ngatukusosekwa kusyoŵekana ni Mklistu jwalijose jwakusatenda yakulemweceka yekulungwa nambo jwangapitikuka mtima.—Alo. 16:17, 18.

⁶ Naga tukusyoŵekana ni ŵandu ŵangapikanila malamusi ga Mlungu, mpaka tujigalile yitendo yawoyo pakusaka kuti atunonyeleje. Mwambone, naga tukusakunguluka mnope ni ŵandu ŵakusanonyela yamsese, nombe m’weji mpaka tulinjikwe kutenda nawo yamseseyo. Yeleyi yatendecele Aklistu ŵane ŵabatiswe mwati ŵane mwa jemanjajo ŵanganapitikuka mtima ŵatyosisye mumpingo. (1 Akoli. 5:11-13) Naga Mklistu atesile cakulemweceka nambo ngakupitikuka mtima, yitendo yakwe yikusalandana ni yaŵayisasile Petulo.—Aŵalanje 2 Petulo 2:20-22.

7. Ana tukusosekwa kusyoŵekana mnope ni ŵani?

⁷ Atamose kuti tukusasosekwa kwatendela yambone ŵandu ŵangakuya malamusi ga Mlungu, nambo tukusosekwa kulolecesya kuti akaŵa acimjetu ŵapamtima. M’yoyo, ngaŵa lunda kwa jwa Mboni sya Yehofa jwanganaŵa paulombela kutanda uganja ni mundu jwangalipeleka soni jwangakulupicika kwa Mlungu kapena jwangakuya malamusi gakwe. Kuŵa ŵagoloka pameso pa Mlungu kuli kwambone mnope kupunda kusaka kumanyika ni ŵandu ŵangakuya malamusi ga Yehofa. Tukusosekwa kusyoŵekana mnope ni ŵandu ŵakusatenda lisosa lya Mlungu. Yesu ŵatite, “Jwalijose jwakusatenda lisosa lya Mlungu, jwelejo ni mlongo mjangu, mlumbwangu soni mama ŵangu.”—Maliko 3:35.

8. Ana Ayisalayeli catendecele cici ligongo lyakusyoŵekana ni ŵandu ŵakusakala?

⁸ Ayisalayeli ŵasimene ni yakogoya ligongo lyakusyoŵekana ni ŵandu ŵakusakala. Yehofa ali ŵagopwele ku ukapolo ku Iguputo ni kwawula nawo kuti Cilambo ca Cilanga ŵasalile kuti, “Mkatindiŵalila milungu jawo kapena kujitumicila, soni mkakuya yitendo yawo. Mmalo mwakwe, mkusosekwa kuyijonanga ni kasa yipilala yawo yeswela. Mkusosekwa kumtumicila Yehofa Mlungu jwenu.” (Eks 23:24, 25) Nambo Ayisalayeli ŵajinji nganapikanila malamusi ga Mlungu. (Sal. 106:35-39) Ligongo lyakuti nganapikanila Mlungu, Yesu ŵasalile kuti, “Apikane sambano! Mlungu atyosile ni kwalecela nyumba jawoji.” (Mat. 23:38) Yehofa ŵalesile Ayisalayeli ni  ŵasagwile mpingo wa Ciklistu kuti uŵe ŵandu ŵakwe.—Mase. 2:1-4.

9. Ligongo cici yindu ya pa Intaneti, TV, wailesi soni m’mabuku mpaka yiŵe yakogoya?

⁹ Yindu yejinji yayikusasimanikwa pa Intaneti, pa TV, pa wailesi, soni m’mabuku mpaka yiŵe yakogoya kwa Aklistu. Yindu yeleyo yangakamucisya kulimbisya cikulupi cetu mwa Yehofa soni yilanga yakwe. Mmalo mwakwe yikusalimbikasya ndamo syakusakala syasiwandile m’cilambo ca Satanaci. M’yoyo, tukusosekwa kusamala mnope kuti tukasagulaga yindu yampaka yitutendekasye ‘kumbila yapacilambo.’—Tito 2:12.

10. Ana kuŵalanga soni kulolela yakogoya cikujendelecelepe?

¹⁰ Pacangakaŵapa kuŵalanga kapena kulolela yindu yakogoya cikumale. Yosopeyi ciyimale pacicijonanjikwe cilambo ca Satanaci. Maloŵe ga Mlungu gakusasala kuti, “Cilambo capasi cikwawula yimpepe ni yakumbila yakwe, nambo mundu jwakutenda lisosa lya Mlungu cacitama kwangamala.” (1 Yoh. 2:17) Jwamalumbo ŵajimbilesoni kuti, “Ŵakutenda yakusakala cacawulaga, nambo ŵakwembeceya Yehofa cacipocela cilambo capasi. Ŵakulinondiya cacapa cilambo capasi. Nipo cacisangalala ni mtendele wejinji.” Ana cacisangalala ni yeleyi kwandaŵi jelewu catuli? Baibulo jikusajanga kuti, “Ŵakulungama cacipocela cilambo capasi. Ni cacitamaga mwelemo kwandaŵi josope.”—Sal. 37:9, 11, 29.

11. Ana Mlungu akusiŵapa catuli cakulya causimu ŵandu ŵakwe?

¹¹ Mwakulekangana ni yindu yacikusakoposya cilamboci, yindu yalikusakoposya likuga lya Yehofa m’moŵa gambesi gano yili yakutukamucisya kuti tukapate umi wangamala. Yesu ŵapopesile kuti, “Pakuti umi wangamala caciwupata pakulijiganya ni kumanyilila ya ŵalakwe, Mlungu jwakuwona, soni ya Yesu Klistu jwele wawojo ŵamtumile.” (Yoh. 17:3) Kupitila mu likuga lyakwe, Yehofa akutupa yakulya yausimu yejinji yayikusatulimbikasya. Tukusasangalala kola magasini, tumabuku, mabuku, mafidiyo soni Webusayiti yayikusalimbikasya kulambila kusyesyene. Likuga lya Mlungu likusatulinganyila misongano jajikusatendekwa m’mipingo jakupunda 110,000 pacilambo cosope. Pamisongano jeleji soni jine jekulungwakulungwa tukusalijiganya ngani sya m’Baibulo syasikusalimbisya cikulupi cetu pa Mlungu soni yilanga yakwe.—Ahe. 10:24, 25.

12. Ana maloŵe ga m’Baibulo gakuti kulombela kapena kulombegwa “mwa Ambuje” gakusagopolela cici?

¹² Aklistu ŵakusaka kulombela kapena kulombegwa akusosekwa kusagula mwalunda ŵakusaka kulombana nawo. Maloŵe ga Mlungu gakusasala mwangasisya kuti, “Akataŵigwa m’likongwa ni ŵandu ŵangakulupilila. Ana pana ulongo watuli pasikati pa cilungamo ni ungapikanila malamusi? Kapena pana mkamulano watuli pasikati pa lilanguka ni cipi?” (2 Akoli. 6:14) Baibulo jikusasalila ŵakutumicila ŵa Mlungu ŵakusaka kupata mjawo jwa mu ulombela kuti alombeleje kapena kulombegwa “mwa Ambuje.” Yeleyi yigopolela kuti akusosekwa kupata mundu jwakusatumicila Yehofa jwaŵabatiswe soni jwakusakuya yagakusasala Malemba. (1 Akoli. 7:39) Kulombana ni jwakulupilila mjetu kukusatukamucisya kupata mjetu jwakulipeleka kwa Yehofa soni jwampaka atukamucisye kwendelecela kuŵa ŵagoloka kwa Mlungu.

13. Ana Yehofa ŵalamwile cici Ayisalayeli pakwamba ya ulombela?

¹³ Yehofa akusamanyilila yindu yayili yambone  kwa m’weji, soni aŵele ali mkusala nganisyo syakwe pakwamba ya ulombela kutandila kalakala. Mwambone, alole yaŵasalile Ayisalayeli kupitila mwa Mose. Pakwamba ya mitundu jajasyungulile Ayisalayeli, Yehofa ŵatite, “Mkatenda mkamulano waulombela ni jemanjaji. Mkapeleka ŵanace ŵenu ŵacakongwe kwa ŵanace ŵawo ŵacalume soni mkajigala ŵanace ŵawo ŵacakongwe ni kwapeleka kwa ŵanace ŵenu ŵacalume. Pakuŵa cacasepusya ŵanace ŵenu ŵacalume kuti akanguya soni cacitumicila milungu jine. Pelepo lutumbilo lwa Yehofa licimyicila nipo cacimjonanga mwacitema.”—Deut. 7:3, 4.

14, 15. Ana cici cicamtendecele Solomoni ligongo lya ungapikanila lilamusi lya Yehofa?

¹⁴ Mwanace jwa Daudi, Solomoni ali agambile kutanda kulamulila ŵam’ŵendile Mlungu kuti ampe lunda. Mlungu ŵajanjile lipopelo lyakwelyo pakumpa lunda lwejinji. M’yoyo, Mwenye Solomoni ŵamanyice kuŵa jwakulamulila jwalunda mnope. Ndaŵi jine, mwenye jwamkongwe jwa ku Seba ŵayice kumkulola Solomoni. Panyuma pakwe jwatite, “Nganingulupilila yanayipikene, kwikana apano piyice ni kulola ni meso gangu, soni nayiweni kuti nagambile kupikana litikape. Lunda lwawo soni lumbili lwawo lupundile yanayipikene.” (1 Maf. 10:7) Nambo yaŵatesile Solomoni panyuma pakwe mpaka yitukamucisye kumanyilila kogoya kwa ungakuya lilamusi lya Mlungu lyakuti tulombaneje ni ŵakulupilila acimjetu.—Mlal. 4:13.

¹⁵ Atamose kuti Mlungu ŵamtendele yindu yejinji Solomoni, nambo jwalakwe nganapikanila lilamusi lya Mlungu lyakuti akalombela acakongwe ŵamitundu jine ŵanganalambilaga Yehofa. Solomoni “ŵanonyele acakongwe ŵacilendo ŵajinji” mwati ŵakwete acakongwe 700, soni ŵane ŵapambali ŵakwana 300. Ana yakuyicisya yakwe yaliji yatuli? Ali akalambele, acakongwe ŵacikusawo “ŵasepwisye mtima wakwe mwati ŵatandite kuya milungu jine. . . . M’yoyo Solomoni ŵatandite kutenda yindu yayaliji yakusakala m’meso mwa Yehofa.” (1 Maf. 11:1-6) Kusyoŵekana ni ŵandu ŵakusakala kwamtendekasisye Solomoni kuleka kulambila Yehofa. Celeci cili cisyasyo cakwakalamusya wosope ŵakuganisya ya kulombana ni mundu jwanganonyela Yehofa.

16. Ana Baibulo jikusasalila cici ŵakutumicila ŵa Mlungu ŵali paulombela ni ŵangakulupilila?

¹⁶ Nambi wuli naga mundu aŵele jwakulambila Mlungu ali alombene kala ni mundu jwangakulupilila? Baibulo jikusati, “Jemanja acakongwe, mwapikanileje aciŵamkwenu, kuti naga ali ŵangapikanila maloŵe ajigalice, ngaŵa ni maloŵe nambo ni ndamo syawo.” (1 Pet. 3:1) Maloŵega gakwawula kwa acakongwe, nambo mpaka gakamulesoni masengo kwa jwamlume jwaŵele jwakulambila Yehofa ali alombene kala ni jwangakulupulila. Baibulo jikusasala mwakupikanika cenene kuti aŵeje jwamlume kapena jwamkongwe jwambone, soni akuyeje malamusi ga Mlungu gakwamba ya ulombela. Ŵandu ŵane atandite kulambila Mlungu ligongo lyakuti aciŵamkwawo ŵacenjile ndamo syawo ali atandite kamulicisya masengo malamusi ga Mlungu.

17, 18. Ligongo cici Nowa soni Aklistu wa m’yaka 100 yandanda ŵakulupuce?

¹⁷ Kusyoŵekana ni ŵandu ŵakusakala kukusajonanga ndamo syambone nambo kusyoŵekana ni ŵandu ŵambone kukusaŵa ni yakuyicisya yambone. Mwambone, kwende tulole cisyasyo ca Nowa. Jwalakwe ŵatamaga m’cilambo cakusakala mnope nambo nganasakaga kuti ŵandu ŵaŵapali pandaŵijo aŵe acimjakwe. Pandaŵijo, “Yehofa ŵayiweni kuti kusakala kwa ŵandu kutupile mnope pacilambo capasi, soni kuti  nganisyo syosope sya m’mitima ja ŵandu syaliji syakusakala ndaŵi syosope.” (Gen. 6:5) M’yoyo, Mlungu ŵasimicisye mtima konanga cilambo cakusakalaco pakamulicisya masengo cigumula. Nambope, “Nowa jwaliji jwakulungama. Jwaliji jwangali cakulemwa pasikati pa ŵandu ŵa mundaŵi jakwe. Nowa ŵajesile ni Mlungu jwakuwona.”—Gen. 6:7-9.

¹⁸ Mwangakayicila, Nowa nganasakaga kuti asyoŵekaneje ni ŵandu ŵangalambila Mlungu. Jwalakwe pampepe ni ŵandu 7 ŵamwiŵasa mwakwe ŵakamulaga mwamtawu masengo gaŵapele Mlungu kupwatikapo kutaŵa combo. Pandaŵijo Nowa ‘ŵalalicilagasoni yacilungamo.’ (2 Pet. 2:5) Nowa ŵamalilaga ndaŵi jelewu ali mkutenda yindu yakumsangalasya Mlungu mpela kulalicila, kutaŵa combo, soni kunguluka ni ŵamwiŵasa mwakwe. Yakuyicisya yakwe Nowa ni liŵasa lyakwe ŵakulupwice cigumula. Tukusosekwa kuyamicila Nowa, ŵamkwakwe, ŵanace ŵakwe soni aciŵamkwawo ligongo wosopewe tuli ŵanace ŵa ŵandu ŵakulupicikaŵa. Mwakulandana ni Nowa soni liŵasa lyakwe, Aklistu ŵa m’yaka 100 yandanda nganasyoŵekanaga ni ŵandu ŵangalambila Mlungu. Yeleyi yakamucisye kuti akulupuce pawajonanjikwaga msinda wa Yelusalemu mu 70 C.E.—Luk. 21:20-22.

19. Ana tukusosekwa kutenda cici kuti Mlungu atunonyeleje?

¹⁹ Mpela ŵakulambila ŵa Yehofa, tukusosekwa kuya cisyasyo ca Nowa, liŵasa lyakwe soni Aklistu ŵa m’yaka 100 yandanda. Tukasyoŵekanaga ni ŵandu ŵakusakala nambo tukusosekwa kusyoŵekana ni Aklistu acimjetu ŵakulupicika ŵampaka atulimbikasye. Kusyoŵekana ni ŵandu ŵakusakunda kuti lunda lwa Mlungu lwalongoleleje kucitukamucisya kuŵa ‘ŵakulimba m’cikulupi’ m’masiku gakusawusya gano. (1 Akoli. 16:13; Miy. 13:20) Agambe ganisya mwayiciŵela yakusangalasya kulupuka mbesi jacilambo cakusakalaci ni kutama m’cilambo casambano ca Mlungu. Yeleyitu yicikomboleka naga tukusaŵambala kunguluka ni ŵandu ŵakusakala.