Mwesi wa Malichi 2020, bungwe ja World Health Organization, japeleche chimanyisyo chakwayana ni mlili wa COVID-19. Ŵandu nganajembecheyaga kuti mliliwu mpaka ukwaye chilambo chosope soni mpaka ujigele ndaŵi jelewu. Mwamti yeleyi yitendekasisye kuti ŵandu ŵajinji kupwatikapo ŵa Mboni sya Yehofa, alagasicheje nganisyo soni asoŵeje yakusosechela ya paumi wawo. Ana gulu ja Mboni sya Yehofa jalinganyisye yamtuli pakusaka kwakamuchisya ŵandu mundaŵi jeleji?

 Mwakulongoleledwa ni Komiti ja Ŵakulondesya Masengo ga Likuga Lyakulongolela lya Mboni sya Yehofa, Makomiti Gakamuchisya Pangosi ja Chilengedwe gakupunda 950 ŵagatamilikasisye kuti gakamuchisye pachilambo chosope pandaŵi ja COVID-19. Pa yakutendekwa yine, jemanjaji ŵaliganyisye yakuti ŵakamuchisye ŵandu soni pa yakutendekwa yine abale ni alongo ŵapatile chikamuchisyo kutyochela ku boma. Komiti Jakamuchisya Pangosi ja Chilengedwe, jalinganyisyesoni yakuti apeleche chikamuchisyochi pachilambo chosope.

 Mwachisyasyo kwende tulole yayatendekwe ku Paraguay. Nyusipepala jine jasasile kuti ligongo lya mlili wa kolona, yitendekasisye kuti “ŵandu ŵajinji ku Paraguay akakola yakulya yakwanila.” Nambo Komiti Jakamuchisya Pangosi ja Chilengedwe jaliji jili jitandite kupeleka yakuwala, yakulya soni yindu yakolopela. Nambosoni liŵasa lya ŵandu mcheche ŵalipaga yindu yakwakamuchisya kuti aŵe ŵachasa. Chakuwala chimo ŵachisumaga madola gakwana 30 ga ku America.

 Ana ŵakamula masengo gakwakamuchisya ŵandu soni ŵane ŵatendaga yamtuli kuti akajigala ulwele wa COVID-19? Jemanjaji ŵawalaga masiki soni ŵatamaga mwakutalikangana. Makampani gaŵakamulichisyaga masengo pakunyakula yakulyayi, ŵalolechesyaga kuti yakulyayo yili yachasa soni ŵakupochela yakuwalayi, kuti akukuya malangiso gosope gakuŵambalila ulwelewu. Yayikupwatikapo kulolechesya kuti wosope ŵachakamule yakuwalayi awete yakuliteteyela, soni kuti yakuwalayo yisunjidwe pamalo pakuti nganaŵa ajigele ulwelewo. Pakumalisya, ŵandu ŵaŵapelekaga yakuwalayi kwa abale ni alongo ŵalolechesyaga kuti atemi mwakutalikangana.

 Pakwikaga mu Januwale 2021, Komiti ja Ŵakulondesya Masengo, jajitichisye kukamulichisya masengo mbiya syakupunda madola 25 miliyoni ga ku America pa ulwele wa COVID-19. Nyambi soni Makomiti Gakamuchisya Pangosi ja Chilengedwe, akukamulichisya masengo yakupeleka yetu mwalunda. Mwachisyasyo, ku Chile, abale ŵaŵalinganyisye yakuti apeleche chikamuchisye pajitendekwe ngosi ja chilengedwe, ŵasakaga kusuma makilogalamu 750 ga yakulya ya mu gulu ja mbwanda. Nambo pandaŵi jelejo mtengo wa yakulyayi, waliji uli ukwesile mnope. Pali pagambile kumala maawala gaŵili kutyochela pandaŵi jiŵakamulene kuti asume pa mtengo wakwelawo, jwakusumisya jula ŵasalile jemanjaji kuti jwakusuma jwine ŵapite kukuwusya yakulya ya mu gulu ja mbwanda. Myoyo m’malo mwakuti abaleŵa asume yakulyayi pamtengo wakwela ula, jwakusumisya jula ŵasalile kuti chiŵasumisye pa mtengo wakala.

 Nambo abaleŵa paŵasakaga kujigala yakulyayi, jwakusumisya jula jwatendaga yakuti achenje nganisyo ni kutanda kwajimba magambo gakuti akupeleka yakulyayi mwangali chilungamo mwakulekangana ni mwagakusatendela mabungwe gane. Ali apopesile chamumtima, jumo mwa abaleŵa ŵamsalile jwakusumisya jula kuti ŵaliji ali awungunyisye kala m’mipingo jele jikusosechela chikamuchisyo. Abaleŵa ŵasasilesoni kuti ŵachakapochele yakulyayi ali ŵakulekangana ndamo. Myoyo liŵasa lililyose chilikapocheleje yakulya yakamulana ni ndamo jawo. Pakumalisya jemanjaji ŵamsalile kuti yakupeleka soni masengo gaŵakamulaga ŵa Mboni sya Yehofa galiji gagamba kulipeleka. Paŵapikene yeleyi yamkwayiye mnope. Jwakusumisyaju nganagamba kutulusya mtengo wa yakulyayi nambo ŵasalile abaleŵa kuti chiŵape makilogalamu 400 ga yakulya pa ulendo wakuyichisya.

 Mundu jwine lina lyakwe Lusu ali jwachikulile. Jwalakwe akusatama ku Liberia yalumo ni ŵachibale ŵakwe msano. Lisiku lina ali mkulya chakulya cha kundaŵi soni paŵatendaga lilemba lyesiku, chisukulu chakwe juŵakwete yaka 7, jwamanyilile kuti pamlangopo nganakola yakulya. Jwalakwe jwawusisye kuti, “Ana chitulye chichi?” Lusu jwamsalile mwakusimichisya kuti apopesile kwa Yehofa kuti ŵakamuchisye mwamti jwakwete chikulupi chakuti chiŵape yakusosechela. Kaneko musi, Lusu jwapochele utenga kutyochela kwa achakulungwa ŵa mumpingo wakumsalila kuti ajawule akajigale yakulya. Jwalakwe jwatite, “Chisukulu changu chaŵechete kuti apano ngukulupilila kuti Yehofa akusapikana soni kwanga mapopelo getu.”

 Jwamkongwe jwine jwa ku Democratic Republic of Congo akusatama chiŵandika ni ŵa Mboni sya Yehofa. Jwalakwe panyuma pakuliwona liŵasali lili lipochele yakulya kutyochela ŵa ŵakulupilila achimjakwe jwatite, “Panyuma pa mlili wa kolona, tuchiŵa ŵa Mboni sya Yehofa. Ligongo lyakwe lili lyakuti jemanjaji aŵele ali mkwakamuchisya achimjawo mu ndaŵi jakusawusyaji.” Ŵamkwakwe ŵa jwamkongweju ŵamwusisye kuti, “Ana mkusaka kuŵa jwa Mboni sya Yehofa ligongo lya msaku wa mpunga?” Jwalakwe jwajanjile kuti, “Iyayi nambo yakulyayi uli umboni wakuti chili chinonyelo chisyesyene.”

 Ŵa Mboni sya Yehofa akusatenda yindu mwachitema pakupeleka yakusosechela kwa abale ni alongo mu ndaŵi ja mliliji. Nambo yeleyi yikukomboleka ligongo lya yakupeleka yawo. Tukwayamichila mnope ligongo lya yakupeleka yawo yakusapeleka pa donate.mt1130.com.