Ŵandu mpaka awusye chakulinga cha umi m’matala gakulekanganalekangana. Mwachisyasyo, ŵane mpaka awusye kuti Ligongo chichi twapali? kapena Ana umi wangu ukwete chakulinga chamtuli? Baibulo jikusalosya kuti chakulinga cha umi wetu chili kuŵa paunasi ni Mlungu. Kwende tulole usyesyene wajikusajiganya Baibulo panganiji.

•   Mlungu ni juŵatupanganyisye. Baibulo jikusati, Mlungu “ni ŵiŵatupanganyisye.”​—Salimo 100:3; Chiwunukuko 4:11.

•   Mlungu jwapanganyisye chilichose ni chakulinga, kupwatikapo m’weji.​—Yesaya 45:18.

•   Mlungu ŵatupanganyisye ni mtima wakuti tusacheje kumanyilila ‘yakusosechela yetu yausimu.’ Yeleyi yikupwatikapo kuŵa ni mtima wakusaka kola umi wambone. (Mateyu 5:3, NWT.) Jwalakwe akusasaka kuti tukwanilisye yakumbila yeleyi.​—Salimo 145:16.

•   Naga tukuŵa paunasi ni Mlungu, tuchikwanilisya yakusosechela yetu yausimu. Kwa ŵane kuŵa paunasi ni Mlungu mpaka kuwonecheje kuŵa kwangakomboleka. Nambope Baibulo jikusatulimbikasya kuti, ”Mwaŵandichile Mlungu, nipo ŵalakwe tachimŵandichila jemanja.”​—Yakobo 4:8; 2:23.

•   Kuti tuŵe paunasi ni Mlungu, tukusosekwa kutendaga yindu mwakamulana ni chakulinga chaŵatupanganyichisye. Chakulinga chaŵatupanganyichisye Mlungu akusachisala pa Jwakulalichila 12:13. Lilembali likusati, “Mumjogope Mlungu, soni mpikanileje malamusi gakwe, chelechi ni chakulinga chaŵatupanganyichisye.”​—Good News Translation.

•   Kusogoloku tuchimanyilila chenene chakulinga cha Mlungu chaŵapanganyichisye ŵandu. Tuchimanyilila yeleyi pachachityosyaga kusakala kosope soni kupeleka umi wangamala kwa ŵandu ŵali najo paunasi, wosope ŵakusamtumichila jwalakwe.​—Salimo 37:10, 11.