Aklistu akusakulupilila kuti Yesu ŵawile ligongo lya yakulemwa yetu. (1 Petulo 3:18) Nambope kuti mundu akulupuche pakusasosekwa yejinji ngaŵaga kwamba kulupilila Yesu. Yiŵanda nombe nayo yikusamanyilila kuti Yesu “ali mwanache jwa Mlungu” nambo ngasiyikulupuka.—Luka 4:41; Yuda 6.

•  Ana ngusosekwa kutenda yamtuli kuti ngulupuche?

•  Uli pakwamba ya “Lipopelo lya Mundu Jwakulemwa”?

•  Ana “Lipopelo lya Mundu Jwakulemwa” lyatyochele kwapi?

• Akusosekwa kukulupilila kuti Yesu ŵapeleche umi wakwe ligongo lya yakulemwa yetu. (Masengo 16:30, 31; 1 Yohane 2:2) Yeleyi yikupwatikapo kukulupilila kuti Yesu jwaliji mundu jusyesyene soni kuti yajikusasala Baibulo pakwamba jwalakwe yili yisyesyene.

• Alijiganye yisyesyene yajikusasala Baibulo. (2 Timoteo 3:15) Baibulo jikusasala kuti ndumetume Paulo soni Sila ŵamsalile jwakulolela nyumba ja akayidi kuti, “Mkulupilile Ambuje Yesu, nipo timchikulupuka.” Ali amalisisye kuŵecheta yeleyi, jemanjanji ŵatandite kulalichila “maloŵe ga Mlungu” a kwa jwakulolela nyumba ja akayidi jula. (Masengo 16:31, 32) Yeleyi yikulosya kuti jwakulolela nyumba ja akayidiju, ngamkaniyikomboleka kuti akumkulupilila Yesu mpaka ali apikanichisye yijiganyo yandanda ya Maloŵe ga Mlungu. Jwalakwe jwasosechelaga kumanyilila yisyesyene yakutyochela m’Malemba.—1 Timoteo 2:3, 4.

• Apitikuche mtima. (Masengo 3:19) Akusosekwasoni kupitikuka mtima kapena kuti kulitendela mnope chanasa mu mtima mwawo payindu yaŵele ali mkutenda munyumamu. Kupitikuka mtima kweleku kuchiwonechela kwa ŵane naga akuleka kutenda yindu yakusayiŵenga Mlungu nikutendaga “masengo gakulosya kuti apitikwiche mtima.”—Masengo 26:20.

• Abatisidwe. (Mateyu 28:19) Yesu jwasasile kuti wosope ŵakusaka kuŵa ŵakulijiganya ŵakwe akusosekwa kubatisidwa. Jwakulolela nyumba ja akayidi jwatumkolasile jula jwabatisidwe. (Masengo 16:33) Mwakulandana ni yeleyi, ndumetume Petulo panyuma pakulalichila ngani syambone syakwamba Yesu kwa ŵandu ŵajinji, “ŵandu ŵaŵapikanile maloŵe gakwego ŵakulupilile ni ŵabatisidwe.”—Masengo 2:40, 41.

• Apikanileje malangiso ga Yesu. (Ahebeli 5:9) Yesu ŵatulamwile kuti tuchiŵa ŵakulijiganya ŵakwe naga tukutenda ‘yosope yele yaŵatulamwile.’ (Mateyu 28:20) Patukutenda yeleyi ngasituŵa ‘ŵakugapikanape maloŵe ga Mlungu, nambo kutenda yigakuŵecheta maloŵego.’—Yakobo 1:22.

• Apilile mpaka pambesi. (Maliko 13:13) Ŵakulijiganya ŵa Yesu akusosekwa “kupimilila” kapena kuti kupilila ni chakulinga chakuti akulupuche. (Ahebeli 10:36) Mwachisyasyo, ndumetume Paulo jwapikanilaga mwakusamala chilichose chiŵamjiganyaga Yesu soni ndaŵi syosope jwaliji jwakulupichika kwa Mlungu. Jwalakwe jwalosisye kupililaku kutandila paŵaŵele Mklistu mpaka pachiwa chakwe.—1 Akolinto 9:27.

Dini sine sikusasala kuti pana “Lipopelo lya Mundu Jwakulemwa” soni “Lipopelo Lyachikulupusyo.” Ndaŵi syejinji ŵandu ŵakusapolelaga lipopeloli akusajitichisya yakulemwa yawo soni akusalosyaga kuti akusakulupilila kuti Yesu ŵawile ligongo lya yakulemwa yawo. Jemanja akusapopela kwa Yesu kuti ajinjile m’mitima jawo. Nambo Baibulo jangasalaga soni kwitichisya “Lipopelo lya Mundu Jwakulemwa” lyele ŵandu akusagamba kulitenda mwachisyoŵe.

Ŵandu ŵane akusaganisya kuti naga mundu akukolanga mwakuwilisyawilisya maloŵe ga mu “Lipopelo lya Mundu Jwakulemwa,” nikuti mundujo mwangakayichila mpaka akulupuche. Nambo lipopelo pajika nganiliŵa limkamuchisye mundu kuti akulupuche. Ŵanduwe tuli ŵakulemwa soni ndaŵi syosope tukusalemwesya yindu. (1 Yohane 1:8) Ni ligongo lyakwe Yesu ŵasalile ŵakulijiganya ŵakwe kuti apopeleje ndaŵi ni katema pakusaka kuti yakulemwa yawo yikululuchidweje. (Luka 11:2, 4) Aklistu ŵane ŵaŵakwete chimbecheyo chakulupuka, ŵajasile upile welewu ligongo lyakuti ŵalesile kumtumichila Mlungu.—Ahebeli 6:4-6; 2 Petulo 2:20, 21.

Ŵakulemba mbili jakala akusalaga yindu yakulekanganalekangana pakwamba kulyatyochele “Lipopelo lya Mundu Jwakulemwa.” Ŵane mwa jemanjaji akusaganisya kuti yeleyi yatandite kuwanda pandaŵi jele ŵandu ŵatandite kujijimuchila dini ja Chikatolika. Ŵandu ŵane akusakulupilila kuti ŵandu ŵatandite kusala ya Lipopelo lya Mundu Jwakulemwa pandaŵi jele mipingo jine jasambano jatandaga m’yaka ya m’ma 1700 soni 1800. Baibulo jangalimbikasyaga kuti tusaleje mwakuwilisyawilisya maloŵe ga mu, “Lipopelo lya Mundu Jwakulemwa” ligongo chijiganyo chelechi changasimanikwaga m’Baibulo.