Riyul’ ni Bible e Thin Rok Got ni Ke Thagthagnag, Fa?

MANG e ri be yip’ apostal Paul fan u nap’an ni yog ni thin ni bay u Bible e “Got e yib i pi’ nga laniyan’ e girdi’ ngar yoloyed”? (2 Timothy 3:16) I yol Paul ni thin ni Greek me fanay bbugithin ni be yip’ fan “athon l’ugun Got.” Re bugithin ni yog Paul ney e be yip’ fan ni fanay Got gelngin nib thothup ni nge pow’iy e girdi’ ngar yoloyed e n’en ni baadag ni ngar yoloyed nga Bible.

 I yog apostal Peter ni piin nra yoloyed e Bible e yib i ying gelngin Got nib thothup ngorad “ngar weliyed e thin ni ke yib rok Got.” (2 Peter 1:21) Aram fan nrayog ni nge yog apostal Paul ni fapi babyor u Bible e ba “thothup ni ir e rayog ni nge tamilangnigem u rogon ni yima thap ngak Got, ni ma yog u daken e michan’ ngak Kristus Jesus.”​—2 Timothy 3:15.

Boor e girdi’ ni yad ma yog ni gathi thin rok Got e bay u Bible. Yad ma gathibthibnag murung’agen e Bible ma yad ma darifannag e thin riy. Boch i yad e ma yog ni thin nu Bible e “kemus ni bogi yat nde riyul’.”

Mu Fal’eg i Yaliy e Mich Riy

Ere gur, rayog ni nge pagan’uy ko Bible? Ba fel’ ni ngam turguy lanin’um riy. Mang fan? Ya faanra thin rok Got e bay u Bible ma en ra darifannag e bbalyang. Faan ga ra sap ngay ni kemus ni thin ko girdi’ ma gathi Thin rok Got, ma aram e dabiyog ni ngam pag ni nge pow’iyem me michan’um ngay.​—1 Thessalonika 2:13.

Uw rogon ni ngam dugliy ko nge pagan’um ko Bible fa danga’? Ma uw rogon ni ngam dugliy ko ra pagan’um ko girdi’ ni dam nangrad fa danga’? Bay ban’en nib mudugil ni aram e dabiyog ni nge pagan’um ngak be’ nde yoor ban’en ni ga manang u murung’agen. Ya fin ga ra nang be’ nib fel’ rogon ma aram e rayog ni ngam nang ko ba yul’yul’ nrayog ni nge pagan’um ngak fa danga’. Ere ku er rogon e Bible. Dabi mich u wan’um boch e thin nde riyul’ ni ma yog boch e girdi’ nib togopuluw ko Bible. Mu tay e tayim ni ngam fal’eg i yaliy e mich riy ni “Got e ke thagthagnag.”

Gathibthib ni Un Tay

Dabi mulan’um ni faan ga ra nang ni bay boch e girdi’ ni yad ma yog ni yad ma “tayfan” e Bible, machane bin riyul’ riy e yad ma  darifannag rogon feni puluw e thin riy ma rayog ni nge pagan’uy ngay. I yog reb e babyor ni boor e girdi’ e ngiyal’ ney ni yad ma weliy murung’agen e Bible maku yad ma yog ni yad e Kristiano, e “yad ma yog ni thin nu Bible e thin ko girdi’.”​—New Dictionary of Theology.

Boor e girdi’ ni yad ma fil murung’agen e teliw ni yad ma guy rogon ni nge maruwar u wan’ e girdi’ ko ri mini’ e piin nra yoloyed e Bible. Bod ni boch i yad e ma yog ni gathi Isaiah ni profet e yoloy fare babyor ni Isaiah. Ya yad ma yog nre babyor nem e fin nni yoloy nga tomuren ni ke yim’ Isaiah. Reb e babyor ni yoloy Lowther Clarke e be yog nre babyor nem e yoloy boor e girdi’ u bokum e mfen. Machane biney e thin e be darifannag e n’en ni yog Jesus Kristus nge pi gachalpen u murung’agen Isaiah ni ir e yoloy e re ke babyor ney.​—Matthew 3:3; 15:7; Luke 4:17; John 12:38-41; Roma 9:27, 29.

Ma n’en nth’abi gel e kireb riy e piin ni yad ma gathibthibnag e Bible ni bod J. R. Dummelow e yog ni fapi yiiy ni bay u lan fare babyor ni Daniel e “bogi ban’en ni ke buch me tay e en ni yoloy e re babyor nem ni bogi yiiy.” Ere ku aray bayay ni kar darifannaged e n’en ni yog Jesus Kristus. I ginangey Jesus u murung’agen e “N’en ni Th’abi Dabuy ni ke sak’iy u lan fa gin’en nib thothup, ni ir e faani weliy Daniel ni profet murung’agen.” (Matthew 24:15) Ba puluw ni nge lemnag reb e Kristiano ni i un Jesus i bannag e girdi’ me un i yog boch e chep u lan e Bible nde riyul’ ni bogi yiiy, fa? Danga’.

Bay Rogon, Fa?

Sana ga ra fith ni lungum, “Ri bay rogon ko mini’ e yoloy e Bible?” Arrogon bay. Uw rogon u wan’um bangi babyor ni ka nog ni ke yoloy e fager rom u m’on ni nge yim’, ni bin riyul’ riy e dawori yoloy? Faanra yog e girdi’ ni llowan’ ngom ni boch e girdi’ e kar yoloyed e n’en ni yad be lemnag ni baadag e fager rom, ma gathi ra m’ay fan fa gi babyor? Ma gur, rayog ni nge pagan’um ngay ni riyul’ ni thin ko fager rom e bay riy?

Ere ku er rogon e Bible. Aram fan ni boor e girdi’ ni ki mada’ ko piin ni yad ma yog ni yad e Kristiano e yad ma lemnag nrayog ni ngar feked yathin e n’en ni be yog e Bible u murung’agen e yul’yul’, nge yalen e par ko pumoon nge ppin, nge ku boch ban’en. Uw urngin yay ni kam rung’ag ni ke lunguy, “Machane binir e thin e bay ko Bin Kakrom e M’ag ko Bible!”​—ya nge yan i aw ni gowa de ga’ fan. Machane gad manang ni yog apostal Paul ni fa Bin Kakrom e M’ag rok Got e ba “thothup” ma Got e ke “thagthagnag.”

Machane sana ra lungum, “Dabug ni ngad darifannaged e thin ko girdi’ ni yad ba llowan’ nge piin ni yad manang murung’agen e Bible.” Rriyul’ e re n’em ya bay boch e piin ni yad ba yul’yul’ ni kar ayuweged gadad kad nanged e n’en ni be yog e yu ken nsom’on e Bible nni yoloy. Machane ba tamilang nnap’an nni yoloy e Bible bayay mu kun fek e thin riy ngan abuweg nga bang ma  aram e ngiyal’ ni un e oloboch nga fithik’. Dab mu pagtalin nib ga’ e thil u thilin e ngan pirieg e oloboch ko thin nu Bible ko bin ni nga nog nde riyul’ e thin riy, ya llowan’ ko girdi’.

Mu Par nib Mich u Wan’um e Thin u “Lan fare Babyor nib Thothup”

U m’on ni yog Paul ni Bible e thagthagnag Got e thin riy nga laniyan’ e girdi’ ngar yoloyed, me yog ngak Timothy fan nib ga’ fan e thin nu Bible ni gaar: “Tin tomren e rran e. . . . girdi’ nib kireb nge piin ni yad be dake girdien Kristus e bayi gel farad kireb nguur banniged boch e girdi’ ma yibe bannagrad.” (2 Timothy 3:1, 13) Nap’an Paul ma bay boch e girdi’ ‘nib tolang e skul rorad’ ni ur bannaged e girdi’ mar warnaged e michan’ rorad ngak Jesus Kristus ni bochan e “tugthin.” (1 Korinth 1:18, 19; Kolose 2:4, 8) I pi’ apostal Paul e athamgil nga laniyan’ Timothy ni nga i ‘par ko tin nib riyul’ e thin ni kan fil ngak’ u ‘nap’an ni kab bitir’ ni ke pi’ Got.​—2 Timothy 3:14, 15.

Rib ga’ fan ni ngan rin’ e re n’ey e chiney ko “tin tomuren e rran.” Dab mu lemnag ndabiyog ni nge bannagem boch e girdi’ ni yad ba llowan’ ko “tugthin.” Machane ngam bod e pi Kristiano ko bin som’on e chibog ni aram e ngam ayuwegem me pagan’um ko n’en ni kam fil u Bible ni aram e Thin rok Got ni kan thagthagnag.

Ra felfelan’ e Pi Mich Rok Jehovah ni ngar ayuweged gur nge mich e thin nu Bible u wan’um. Bod ni rayog ni ngar daged ngom rogon ni ke ayuwegey e pi kenggin e motochiyel nu Bible ni kab kafram i yib ke mada’ ko chiney, nge rogon nib puluw e thin riy ko science. Faanra gab adag, ma dab mu magawon ni ngam yol ngak e piin ni kar ngongliyed e re babyor ney ngar weliyed ngom rogon ni ke ayuweg e Bible boch e girdi’ kar nanged nriyul’ ni Bible e Thin rok Got.

[Picture on page 5]

Uw rogon ni ngam nang ko nge pagan’um ngak e girdi’ ni kam mada’nag fa danga’?

[Picture on page 6]

Gad be pining e magar ngak e piin ni boor ban’en u murung’agen e Bible ni yad manang ma yad ba yul’yul’ ni bochan e kar ayuweged gadad kad nanged e thin ko tin som’on e babyor ko Bible nni yoloy