Mang Fan ni Boor e Mabgol ni Be Kireb?

“Me yib boch e Farise ngak [Jesus] mi yad guy rogon ni ngar ninged e kanawo’ ngak ko thin, mi yad fith ngak ni lungurad, ‘Mog, mmat’aw ko Motochiyel rodad nra chuweg be’ leengin ndemtrug e n’en ni ke bucheg?’”—Matthew 19:3.

IMMOY boch e girdi’ u nap’an Jesus ni i maruwar u wan’rad ko rayog ni nge par e mabgol ni dabi dar fa dabiyog. I gaar Jesus ngorad: “Dawor mbeeged e pi thin ni baaray u lan e babyor nib thothup ni gaar, Som’on ko tabolngin e sunumiyrow e en ni Tasunumiy ni bagayow e be’ nib pumoon ma bagayow e be’ ni ppin? Me gaar, ‘Ereray fan nra digey e pumoon e chitamangin nge chitiningin ngar pirew leengin, mi yow par ni kar taab girdi’gow.’ Ya aram e gathi ku yow ba ruw ni girdi’, ya kar taab girdi’gow. Ere thingari dabi dareg e girdi’ e gali cha’ ni Got e ke chagiyrow.” a (Matthew 19:4-6) Ere ba tamilang ni sunumiy Got e mabgol ni nge par ndabi dar.

Boor e nam e ngiyal’ ney ni sogonap’an 40 pasent ko mabgol riy e be ‘dar.’ Ere dakuriy angin e fonow nu Bible u murung’agen e mabgol ko ngiyal’ ney, fa? Ma gur, fan ni be kireb e mabgol e bochan nib kireb rogon aram ko tabolngin?

Mu lemnag e re fanathin ni baaray: L’agruw wu’ e mabgol e ra chuw’iyed l’agruw e karrow ni taareb rogon. Ba wu’ e gal mabgol nem e yow ma ayuweg e birorow e karrow nib fel’ rogon ma yow ma kol ayuw u rogon ni yow ma yan riy. Ere par e karrow rorow nde kireb. Ma fa wu’ ni baaram e mabgol e da ur ayuwegew e birorow e karrow ma yow ma yan riy ndemtrug rogon. Ma aram me kireb fare karrow mi yow n’ag. Ere mini’ e ba kireb e rok? Fare karrow ara fare wu’ i mabgol? Ba tamilang ni fare wu’ i mabgol ni u ranow ko fare karrow e yow e ba kireb e rorow.

Ere ku arrogon e mabgol. Fan ni ma kireb e gathi bochan nib kireb rogon aram ko tabolngin. Boor e mabgol ni be par nib fel’ rogon ni be micheg ni riyul’ e re n’ey. Pi mabgol nem e ba mo’maw’ ni nge kireb ma be par nib felfelan’, maku be felfelan’nag chon e tabinaw nge girdi’ nu lan binaw. Machane mabgol e ku bod e karrow. Faanra nge par ndabi kireb mab t’uf ni ngaun ayuweg nib fel’ rogon ma yibe yaliy e yungi n’en ni ke kireb riy ngan fal’eg.

Demtrug ko kafin mu un ko mabgol fa ke n’uw nap’an, ma rayog ni nge ayuwegem e fonow nu Bible ngam ayuweg e mabgol rom nge par nib fel’ mab gel. Tin migid e page e be weliy boch ban’en nrayog ni nge ayuwegem.

[Footnote]