Mu Fil Ban’en ko Thin Rok Got

Mang e Fel’ ni Ngan Nang u Murung’agen e Teliw?

Re article ney e be weliy boch e deer ni kam fith ma be dag ko uw e rayog ni ngam pirieg e fulweg riy u Bible. Pi Mich Rok Jehovah e yad ra felfelan’ ni ngar tamilangnaged e pi fulweg ney ngom.

1. Gubin ra ba e teliw mab fel’, fa?

Boor pi yurba’ teliw ni bay e girdi’ riy nib yul’yul’ ni yad baadag ni ngar felfelan’naged Got. Ma guy Jehovah e pi girdi’ nem ma yad ba t’uf rok. Machane bay boch e girdi’ ni kar fanayed e teliw rorad ni nge puluw ko ngongol rorad nib kireb. Kakrom ma bay boch e tayugang’ ko teliw e yad ma gafgownag e piin ni yad ma togopuluw ngorad. (2 Korinth 4:3, 4; 11:13-15) Rogon ni yibe weliy ko news e ngiyal’ ney e bay boch e tayugang’ ko teliw ni yad ma pi e ayuw ni fan ko terrorism nge mahl ara yad ma un i gafgownag e bitir.​—Mu beeg e Matthew 24:3-5, 11, 12.

Be fil e Bible ni l’agruw mit e teliw ni aram e bin riyul’ e teliw nge teliw ni googsur. Teliw ni googsur e der ma fil e tin riyul’ u murung’agen Got. Machane, baadag Jehovah Got ni ngada nanged e tin riyul’ u murung’agen.​—Mu beeg e 1 Timothy 2:3-5.

2. Mang e tin nib fel’ ni ngan nang u murung’agen e teliw?

Got e dabun e pi yurba’ i teliw ni ngar bannaged e girdi’ ni bochan e yad ma dake ba t’uf Got rorad, machane bin riyul’ riy e darur filed e tin riyul’ u murunga’gen. Bin riyul’ riy e piin ni yad ma un ko pi teliw nem e yad baadag ni ngar uned ko ngongolen e re fayleng ney ni Satan ni Mooniyan e ir e be gagiyegnag. (James 4:4; 1 John 5:19) Thin rok Got e ke taareb rogonnag e pi yurba’ i teliw nib pagan’rad ko am ko girdi’ ma gathi Got, ngak reb e ppin ni ma pi’ ir ni chuway. Ke yog e Bible fithingan e re ppin ney ni “Babylon nib Gilbugwan” kan fek e re ngachal nem ko fare mach nu Babylon kakrom ni aram e gin ni tabab e teliw ni googsur riy u tomuren fare day u nap’an Noah. Dabki n’uw nap’an ma ra thang Got gubin e teliw ni yad ma bannag e girdi’ ma yad be gafgownagrad.​—Mu beeg e Revelation 17:1, 2, 5, 17; 18:8, 23, 24.

 3. Uw rogon ma ra fek Got i yib e felfelan’ ko gubin e nam?

Bochan ni yira thang gubin e teliw ni googsur ma aram ban’en ni yira felfelan’ ngay. Ya aram e ngiyal’ nra m’ay gubin e gafgow rodad u ga’ngin yang e fayleng. Dakuriy ba ngiyal’ ni nge bannagdad fa nge ruw raba’nagdad e teliw ni googsur. Gubin e girdi’ ma yad ra liyor ngak fare Got nib riyul’ u taabang.​—Mu beeg e Isaiah 11:9; Revelation 18:20, 21; 21:3, 4.

4. Mang e thingari rin’ e girdi’ ni yad ba yul’yul’?

Dawori pagtalin Jehovah e girdi’ ni yad ba yul’yul’ ni yad bay ko pi teliw ni googsur u ga’ngin yang e fayleng. Ya be kunuyrad e ngiyal’ ney nga taabang ma be fil e tin riyul’ ngorad.​—Mu beeg e Mikah 4:2, 5.

Be pag Jehovah e girdi’ ni yad baadag ni ngar pigpiggad ngak ni ngar manged bang ko tabinaw rok. Yugu aram rogon nra puwan’ e pi fager rodad nge girdi’ rodad ngodad, machane nap’an ni gad ra pigpig ngak Jehovah ma boor e tin nra yog ngodad. Ni bod rogon e tha’ nib fel’ u thildad Got, nge “tabinaw” nib beech ma bay e t’ufeg riy, nge athap ko yafas ni dariy n’umngin nap’an.​—Mu beeg e Mark 10:29, 30; 2 Korinth 6:17, 18.

Ra ga baadag ni ngkum nang boch, mu guy e guruy 15 nge 16 ko fare ke babyor ni ke fal’eg e Pi Mich Rok Jehovah.

[Picture Credit Line on page 26]

The Complete Encyclopedia of Illustration/J. G. Heck