Reb e Deer ni fan ngak Jesus

Boor e girdi’ nib mich Got u wan’rad e yad be lemnag ni teliw nge am e nge maruwel u taabang. Ba mich u wan’rad ni teliw a rayog ni nge chuweg e pi magawon ko girdi’. Machane ku bay e piin ni mich Got u wan’rad ni yad be lemnag ni teliw nge am e susun dab ra maruwel u taabang. U rogon u wan’um e re n’ey? Ga be lemnag ni nge maruwel e am nge teliw u taabang, fa?

KAN weliy ni Jesus Kristus e be’ “nib gilbuguwan ni bay rogon ko teliw u chepin e girdi’.” Ere am lemnag ni faanra rayog ni ngam fith ngak e re deer ney, Susun ni nge maruwel e teliw nge am u taabang, fa? Gur, mang e fulweg rok? Nap’an ni immoy u fayleng me pi’ e fulweg ko re deer nem u daken e thin nge ngongol rok. Fare Welthin ni pi’ Jesus u Daken e Burey e be tamilangnag boch e fonow ni nge ayuweg pi gachalpen ni ngar fal’eged i lemnag rogon ni ngar ngongolgad ko girdi’ u lan e binaw rorad. Ere ngad weliyed boch ban’en ni bay ko re welthin nem.

Ngan Tamilangnag Boch Ban’en Ngak e Girdi’

I tamilangnag Jesus rogon e lem nsusun ni nge yog ngak pi gachalpen ni bay rogon ko ngongolen e fayleng. I yog ni gaar: “Gimed bod e sol ni fan ngak urngin e girdi’ nu fayleng. Machane faanra chuw e buday ko sol, ma dakuriy kanawoen me yog nni ngongliy ngki sul nge buday bayay. Ya dakuriy fan; ma aram min n’ag nga daken e but’ ngi i yan e girdi’ u daken. Gimed bod e tamilang ngak e girdi’ nu fayleng ni polo’. . . . Ere ku er rogomed ni nge gal raamed u p’eowchen e girdi’, ya ngar guyed e tin nib fel’ ni gimed be rin’ mi yad yog e sorok ngak e Chitamangimed ni bay u tharmiy.” (Matthew 5:13-16) Mang fan ni taareb rogonnag Jesus pi gachalpen ko sol nge tamilang?

Thin rok Jesus ni be taareb rogonnag pi gachalpen ko sol nge tamilang e aram e be yip’ fan ni ngongol rorad e ra pi’ e tamilang ngak e piin ni yad baadag ni ngar guyed e tamilang. U daken e fanathin ni i fanay Jesus, mab tamilang ni dabun ni nge par pi gachalpen nga bang ni yigoo yad ni dab ur mathukgad ko girdi’ nu fayleng. Mang fan?

Mu lemnag e re n’ey: Sol e dabiyog ni nge ayuweg e ggan ni nge dabi kireb ni faanra dabni athkuy ngay. Magal e dabiyog ni nge gal’ lan reb e sengil ni faanra yira tay nga wuru’ fare sengil. Ere aram fan nde motochiyelnag Jesus ngak pi gachalpen ni ngar ranod ngar pared nga bang u roy u fayleng ni yigoo yad mar tababnaged reb e ulung ni taarab e michan’ rorad. Maku de tachilen ngorad ni ngar fanayed e teliw rorad ni nge mang ba yoror rorad ko magawon u roy u fayleng. Machane piin ni Kristiano e yad ra par u fithik e girdi’ u roy u fayleng nib fel’ e ngongol rorad ma bod rogon e sol ni yira athkuy ko ggan ma dabi kireb nge reb e magal ni yira ta nga reb e sengil ma ra tamilang.

“Gathi Yad e Girdi’ nu Roy u Fayleng”

Machane fonow ni pi’ Jesus ngak pi gachalpen u rogon ni ngar ngongolgad ngak yugu boch e girdi’e ke tamilangnag reb e deer nib ga’ fan nga rogon e lem rok reb e Kristiano ni bay rogon ko ngongolen e am. Mang fan? De n’uw nap’an nga tomuren ni yim’ Jesus me yibilay pi gachalpen ngak e chitamangin, ni gaar: “Ma gathi gu be wenignag ngom ni ngam fekrad ngar chuwgad u fayleng, machane gu be wenignag ngom ni ngam ayuwegrad rok Faanem nib Kireb. Gathi yad e girdi’ nu roy u fayleng ni bod gag ni gathi gag e girdi’ nu fayleng.” (John 17:15, 16) Ere, uw rogon ma piin Kristiano e gathi yad bang ko fayleng, machane yad be un nga boch ban’en ko binaw rorad? Bay dalip e deer ni gad ra weliy murung’agen:

• Uw rogon ngongolen e am u wan’ Jesus?

• Mang e ba t’uf ni nge rin’ e piin Kristiano e ngiyal’ ney?

• Mang angin e machib ko pi Kristiano ngak e girdi’ u lan binaw?