Uw Rogon Ngongolen e Am u Wan’ Jesus?

PIIN ni kar yoloyed e gospel e ra weliyed boch ban’en ni i mada’nag Jesus u nap’an ni i machib ni bay rogon ko ngongolen e am. De n’uw nap’an nga tomuren ni ke gaman 30 e duw rok Jesus min taufenag, ma aram me ognag Satan e fayleng ngak ni nge gagiyegnag. Boch nga tomuren u nap’an ni be machib ma bay ba ulung i girdi’ ni yad baadag ni nge pilung Jesus. Maku bay e piin ni yad baadag ni nge mang be’ ni ma gagiyegnag ngongolen e am. Mang e ke rin’ Jesus? Gad ra lemnag dalip i ban’en ni buch.

En Ta Gagiyeg u Fayleng. Rogon ni yog fare Gospel e ognag Satan “urngin e nam nu fayleng” ngak Jesus ni nge gagiyegnag. Am lemnag gubin ban’en nib fel’ nrayog ni nge rin’ Jesus ni fan ko girdi’ ni yad be gafgow ni faanra ir e be gagiyegnag e fayleng. Be’ nib mich u wan’ nrayog rok e am ni nge pithig e pi magawon ko girdi’ e dabi siyeg reb e liw ni aram rogon ni faanra kan ognag ngak. Machane Jesus e ke siyeg.​—Matthew 4:8-11.

Pilung. Boor e girdi’ u nap’an Jesus ni yad baadag reb e pilung nrayog ni nge pithig e pi magawon rorad ni bay rogon ko salpiy nge am. Pi girdi’ nem e yad baadag ni nge un Jesus ko ngongolen e am ni bochan ni yad manang nrayog rok. Mang e rin’ Jesus? I yoloy John e gospel ni gaar: “Me nang Jesus ni yad be n’en ni ngar bad ngak ngar feked ngar tiyed ni ir e nge mang pilung rorad, ndemtrug ko ba adag Jesus fa dabun; ma aram me pagrad nge yan nga daken e burey ni goo ir.” (John 6:10-15) Ere ba tamilang ni siyeg Jesus ni nge un ko ngongolen e am.

Ma togopluw ko am. Mu lemnag e n’en ni buch rok Jesus u m’on ni ngan li’ nge yim’. Piin ni yad ma un ngak e pi Farise ni yad baadag ni ngar chuwgad u tan e am rok piyu Roma nge pi girdi’ ko ba’ rok Herod ni yad bang ko am nu Roma e kar bad ku Jesus. Yad baadag ni ngar towasariyed ni nge un nga reb e liw ko am. Kar fithed ngak ko ba puluw ni nge pi’ piyu Jew e tax nga Roma.

I yoloy Mark e thin rok Jesus ni gaar: “‘Mang ni gimed be guy rogon ni nggu aw ko ban romed? Mfeked ba salpiy nib silber i yib ngog ngug guy.’ Ma ra feked reb i yib ngak me fithrad ni gaar, ‘Mini’ e yaan owchen nge fithingan e baaray riy?’ Mi yad fulweg ngak ni lungurad, ‘Pilung nu Roma.’ Ma aram me gaar Jesus ngorad, ‘Faanra er  rogon me ere mpied ngak e pilung nu Roma e tirok ban’en, mi gimed pi’ ngak Got e tirok Got ban’en.’”(Mark 12:13-17) Rogon ni be yog reb e babyor u murung’agen e fulweg ni pi’ Jesus e gaar: “Ke siyeg Jesus ni nge mang reb e tayugang’ ko am ma ke dag rogon ni ngan thabthabilnag e n’en ni milfan ngak Ceasar nge n’en nib milfan ngak Got.”​— Church and State​—The Story of Two Kingdoms.

Magawon ni bod rogon e gafgow nge sasalap e kirebnag laniyan’ Kristus. Thin ko Bible e be tamilangnag ni kari taganan’ u rarogon e girdi’ ni i guy ni yad be gafgow. (Mark 6:33, 34) Machane de lemnag Jesus ni nge un nga ngongolen e am ya nge yog ni nge chuweg e sasalap ko girdi’ u roy u fayleng, ni yugu aram rogon ni towasariy boch e girdi’ ni nge un i pithig e pi magawon ni bay e ngiyal’ nem.

Ere pi n’en ni buch rok Jesus e be tamilangnag ni dabun ni nge un nga ngongolen e am. Machane u rarogon e piin Kristiano e ngiyal’ ney? Mang e susun ni ngar rin’ed?