Kaam lemnag boch e deer ni aray rogon, fa? Faanra arrogon, ma gathi yigoo gur e ga ma lem ni aray rogon. Girdi’ u ga’ngin yang e fayleng e yad ma fal’eg i lemnag e pi deer nib ga’ fan ni bay rogon ko yafos. Gur, rayog ni ngam pirieg e fulweg ko pi deer ney?

Bokum milyon e girdi’ e ra lungurad, “Arrogon!” Mang fan? Ya bochan ni kar pirieged e fulweg ko pi deer rorad u lan e Bible. Ga baadag ni ngam nang e n’en ni be yog e Bible? Faanra arrogon, ma dabisiy nra yib angin ngom e fol Bible ni ma tay e Pi Mich Rok Jehovah ndariy puluwon. *

Riyul’, ni bay e girdi’ nnap’an ni yira yog ni ngan fil e Bible ngorad, ma ma lungurad: “Kaygi yoor pa’ nga puluwog.” “Ba mo’maw’ ni nggu nang fan e n’en ni bay riy.” “Gu be magar ni nggu micheg ban’en ngom.” Machane, yugu boch e girdi’ e ba thil e lem rorad. Ya yad baadag ni ngar nanged ko mang e be yog e Bible. Ere, chiney e ngad guyed ko mang e ke yog boch e girdi’:

• “Kug un ko teliw ko Katolik nge Protestant, ma ug wan ko Sikh tempel nge gin ni ma par e monk riy, ma ku ug fil murung’agen Got u reb e skul nib tolang. Machane, da gu pirieg e fulweg ko pi deer rog u murung’agen Got. Ma aram me yan i reb e rran me yib reb e Pi Mich Rok Jehovah nga tabinaw rog. Ma bochan ni ke yag ni nge pi’ e fulweg ko pi deer rog nrogon nib puluw ko Bible, ma aram me m’agan’ug ngay ni nggu un ko fol Bible.”​—Gill, England.

• “Boor e deer rog u murung’agen e yafos, machane de yag ni nge pi’ e pastor ko galesiya rog e fulweg ko pi deer rog nib puluw. Machane, reb e Pi Mich Rok Jehovah e fanay e Bible ni nge tamilangnag e fulweg ko pi deer rog. Ma nap’an ni fitheg ko gu baadag ni ngkug fil boch murung’agen e Bible, mu gog ngak ni gu baadag.”​—Koffi, Benin.

• “Gu baadag ni nggu nang murung’agen e piin ni kar m’ad. Gu ma lemnag nrayog rok e piin ni kar m’ad ni ngar gafgownaged e piin ni ka yad ba fos, machane gu baadag ni nggu nang e n’en ni be yog e Bible. Ere, gu tababgow reb e fager rog ni ir reb e Pi Mich Rok Jehovah i fil e Bible.”​—José, Brazil.

• “Ug gay rogon ni nggu beeg e Bible machane de yag ni nggu nang fan e thin riy. Ma aram mug mada’gad e Pi Mich Rok Jehovah, mar tamilangnaged fan ngog murung’agen boch e yiiy u Bible. Ma aram mu gu adag ni ngkug nang boch ban’en.”​—Dennize, Mexico.

• “Ug lemnag ko riyul’ ni ma lemnageg Got, fa danga’. Ere gu turguy u wan’ug ni nggu meybil ngak fare Got ni bay murung’agen u Bible. Ma faani bin migid e rran me yib e Pi Mich Rok Jehovah nga tabinaw rog ma aram me m’agan’ug ngay ni nggu un ko fol Bible.”​—Anju, Nepal.

“Pi n’ey ni ke buch ko pi girdi’ ney e be puguran ngodad e thin ni yog Jesus ni gaar: “Nge felan’ e piin ni kar pirieged u lanin’rad ni kar gafgowgad ndabisiy ni nge yog Got ngorad.” (Matthew 5:3) Arrogon, ba t’uf ni nge nang e girdi’ murung’agen Got. Ma kemus ni ir e rayog rok ni nge pi’ e tin nib t’uf rodad ni fan ko tirok ban’en, ma ma rin’ e re n’ey u daken e Thin rok ni aram e Bible.

Ere, faanra nge un be’ ko fol Bible, ma mang e ba muun ngay? Ma uw rogon nrayog ni nge yib angin ngom? Yira pirieg e fulweg ko gal deer ney ko bin migid e article.