Kaam lemnag ko ka bay rogon e yafas rodad nga bang, fa kemus ni ngaud fafelgad, ma gad be maruwel, ma gad un ko mabgol, me yag reb e tabinaw ngodad, ngemu’ ma gad pilibthir? (Job 14:1, 2) Be dag e Bible ni mus ngak boch e girdi’ nri yad ba gonop ni ur lemnaged e re deer ney.​—Mu beeg e Eklesiastes 2:11.

Bay fan e yafas rodad, fa? Som’on e thingar da fithed ni nge lungudad, Uw rogon ni tabab e yafas rodad? Tomuren ni ke par boor e girdi’ kar fal’eged i lemnag rogon ni kan sunmiy e man’ey rodad nge yu yang u dowdad, ma ke tamilang u wan’rad ni bay be’ nib gonop ni ke Sunmiy urngin ban’en. (Mu beeg e Psalm 139:14.) Faanra aray rogon, me ere ba mudugil ni bay fan ni ke sunmiydad! Faan gad ra nang fan ni kan sunmiydad ma rayog ni nge yib fan e yafas rodad.

I tow’athnag Got e gal nsom’on e girdi’ me yog ban’en ngorow ni ngar rin’ew. Ba m’agan’ ngay ni ngar diyengow nge sug pi fakrow u fayleng, mu kur ngongliyew e re fayleng ney nge mang paradis, mi yad par riy ndariy n’umngin nap’an.​—Mu beeg e Genesis 1:28, 31.

I magawon e n’en nib m’agan’ Got ngay u nap’an ni togopuluw e girdi’ nga rogon e gagiyeg ni be tay. Yugu aram rogon, ma de digeydad Got maku de thilyeg e n’en nib m’agan’ ngay. Be micheg e Bible ni kab kakrom i yib ni be rin’ Got boch ban’en ya nge yag ni thapeg urngin e piin ni yad ba yul’yul’ ngak me lebguy e n’en nib m’agan’ ngay ni fan ko fayleng. Baadag Got ni nge par e yafas rom ni bod rogon ni lemnag ko som’on! (Mu beeg e Psalm 37:29.) Rayog ni nge ayuwegem e Bible ni ngam nang rogon nra fel’ rogom ko pi n’en nib m’agan’ Got ngay.