1. Mang fan nib mo’maw’ ni ngad nanged e n’en nri be yip’ be’ fan u nap’an nra yog ni ke n’ag fan e kireb rodad?

 “KUG N’AG FAN ROM.” Ba mudugil nra fal’eg e pi thin ney lanin’um, nib ga’ ni faanra ka mog ara kam rin’ ban’en ni ke kirebnag laniyan’ be’! Machane mang e ri be yip’ fan fare thin ni “Kug n’ag fan rom”? Gur, be yog facha’ ni kam kirebnag laniyan’ ni aram e ke fel’ bayay e tha’ u thilmew? Fa be yip’ fan ni ke dabuy ni ngam ululgow i weliy murung’agen fare magawon ni ke sum u thilmew? Girdi’ e nap’an ni yad ra yog ngom ni kar n’aged fan e kireb rom, mab mo’maw’ ni ngam nang ko mang e ri yad be yip’ fan.

 2. Uw rogon ni ke weliy e Bible rogon ni ma n’ag Jehovah fan e kireb? (Kum guy e footnote.)

² Rib thil rogon ni ma n’ag Jehovah fan e kireb rodad e girdi’ ndawor da flontgad nga rogon ni gad n’ag fan e kireb rok bagadad nge bagadad. Dariy be’ nrayog ni nge n’ag fan e kireb ni bod rogon Jehovah. I weliy fare psalmist murung’agen Jehovah ni gaar: “Gur e rriyul’ ni ga ma n’ag fan e kireb, ni fan e ngaug pared ni bay madgum u wan’mad.” a (Ps. 130:​4, NW) Arrogon, Jehovah e ‘rriyul’ ni ma n’ag fan e kireb.’ Ir e ke dag ngodad rogon ni ngarin n’ag fan e kireb. Bay boch e verse u lan e pi babyor ko Bible nni yoloy ni thin ni Hebrew ni piin nra yoloyed e ra weliyed rogon ni ma n’ag Jehovah fan e denen ni yad be fanay bbugithin ndawor ra fanayed bayay u nap’an ni yad be weliy rogon ni ma n’ag e girdi’ fan e kireb.

 3. Uw rogon nib thil rogon ni ma n’ag Jehovah fan e kireb nga rogon ni gad ma n’ag fan e kireb? (Isaiah 55:​6, 7)

 ³ Nap’an nra n’ag Jehovah fan e denen rok be’, ma kari chuweg u laniyan’. Ke fel’ e tha’ u thilrow bayay. Ri gad be pining e magar ngak Jehovah nri ma n’ag fan e kireb rodad ni boor yay.​—Mu beeg e Isaiah 55:​6, 7.

 4. Uw rogon ni ke ayuwegdad Jehovah ni ngad nanged e n’en nri be yip’ fan ni ngan n’ag fan e kireb?

⁴ Faanra ba thil rogon ni ma n’ag Jehovah fan e kireb nga rogon ni gad ma rin’, ma uw rogon nrayog ni ngad nanged e girdi’ ndawor da flontgad e n’en nri be yip’ fan ni ngan n’ag fan e kireb? Ke ayuwegdad Jehovah ni ngad nanged rogon ni ma rin’ e re n’ey u daken boch e fanathin ni be weliy rogon ni ma n’ag fan e denen. Gad ra weliy boch e pi fanathin nem u lan e re article ney. Pi n’ey e be dag nnap’an ni gad ra kalngan’dad ma ma chuweg Jehovah e denen rodad me pagdad ni ngkud manged fager rok bayay nib chugur thildad. Nap’an ni gad be weliy e pi fanathin ney, ma rra ga’ fan u wan’dad e Chitamangidad ni ir be’ nib sumunguy ni boor e kanawo’ ni ma n’ag fan e kireb riy.

MA CHUWEG JEHOVAH E DENEN

 5. Mang e ma buch u nap’an nra n’ag Jehovah fan e denen rodad?

⁵ Ba ga’ ni ma taarebrogonnag e Bible e denen ko gilab nib tomal. Aray rogon ni weliy David ni Pilung murung’agen e denen rok ni gaar: “Gu be limoch u fithik’ e pi denen rog ni ke sugubur; nib gilab ni kaygi tomal ni nggu chibiy.” (Ps. 38:​4, BT) Machane piin kar kalgadngan’rad e ma n’ag Jehovah fan e denen rorad. (Ps. 25:18; 32:5) Fare bugithin ni Hebrew ni kan pilyeg ni “n’ag fan” ko gal verse ney e be yip’ fan ni “ngan chibiy nga lang” ara “ngan fek.” Ere rayog ni ngad taareb rogonnaged Jehovah ngak be’ nib pumoon nib gel ni ke yib i chibiy e denen rodad ke fek, ke chuweg u daken podad.

 6. Uw palogin e gin ma fek Jehovah e denen rodad ngay?

⁶ Ku bay reb e fanathin ni be dag rogon ni ma fek Jehovah e denen rodad nge mal’afnag rodad. Be gaar e Psalm 103:12: “Rogon feni mal’af thilin e ngek nge ngal, e aram rogon nra chuweg e denen rodad nge mal’afnag rodad.” Dabiyog ni nge for e yal’ ko gin ma aw e yal’ riy. Re n’ey e be yip’ fan ni ma fek Jehovah e denen rodad nga bang nib palog rodad ndabiyog ni nge taw rogon e lem rodad ngay. Re n’ey e be micheg ngodad nri ma n’ag Jehovah fan e denen rodad!

 7. Uw rogon ni be weliy e Bible e n’en ma rin’ Jehovah ko denen rodad? (Mikah 7:​18, 19)

⁷ Yugu aram rogon ni gowa ma fek Jehovah e denen rodad nge mal’afnag rodad, ma gur, ma tay rok nder ma pithig pa’ riy? Danga’, ya yoloy Hezekiah ni Pilung murung’agen Jehovah ni gaar: “Kam n’ag machan gubin e denen rog u wan’um.” (Isa. 38:​9, 17, BT) Re fanathin ney e be dag ni gowa ma fek Jehovah e denen rodad nge yon’ nga bang ndabiyog ni ngan guy. Ku rayog ni ngan pilyeg e re thin ney ni: “Kam tay e [denen rog] ni gowa ban’en ndawori buch.” Ki tamilangnag e Bible e re n’ey u daken yugu reb e fanathin ni bay ko Mikah 7:​18, 19. (Mu beeg.) Be yog e re thin ney ni ma yon’ Jehovah e denen rodad nge yan i par nga t’ay e rigur. Kakrom e yira yon’ ban’en nga t’ay e rigur ma dariy be’ nrayog ni nge pirieg.

 8. Mang e kad filed?

⁸ Ere kad filed ko pi fanathin ney nnap’an nra n’ag Jehovah fan e denen rodad, ma aram e kari chuweg ni gubin ndakuriy rogon ni nge tomalnagdad. Riyul’ ni yog David nib “felfelan’ e piin ni ke n’ag Got fan u wan’ e kireb rorad, ni piin ni ke upunguy Got e denen rorad! Kari felfelan’ e en ni denen rok e dab ki ta’ Somol ni malfith rok!” (Rom. 4:​7, 8) Ri ireray e n’en be yip’ fan ni ngan n’ag fan e kireb!

 MA MALUKNAG JEHOVAH NGE CHUWEG MACHAN E DENEN RODAD

 9. Mang fanathin e ke fanay Jehovah ni nge tamilangnag rogon ni ma n’ag fan e denen?

⁹ Ki fanay Jehovah yugu boch e fanathin ni nge ayuwegdad ni nge ga’ fan u wan’dad rogon ni ma thang e denen rok e piin kar kalgadngan’rad u daken fare biyul ni maligach nni pi’. Be yog e Bible ni Jehovah e ma maluknag nge chuweg machan e denen. Re n’ey e ma beechnag reb e tadenen. (Ps. 51:7; Isa. 4:4; Jer. 33:8) Ki weliy Jehovah rogon angin e re n’ey ni gaar: “Denen ni kam lukgad ngay e rib gagiyel nib ramaen row, machane bay gu maluknagmed ngam beechgad ni bod feni beech e ayis ni ma mul u lang nga but’. Denen ni kam lukgad ngay e ra yan i par nrib gagiyel ni bod ramaen e row nrib gel e row riy, machane gimed ra par ni kam wechwechgad ni bod feni wechwech bunuen e saf.” (Isa. 1:18) Rib mo’maw’ ni ngan chuweg ban’en nib ramaen row ni ke af ko mad. Machane ke fanay Jehovah e re fanathin ney ni nge micheg nga lanin’dad nrayog ni ngan maluknag e denen rodad ngari chuw ndabkiyog ni ngan guy.

10. Ku mang reb e kanawo’ ni kan weliy riy rogon ni ma n’ag Jehovah fan e denen rodad?

¹⁰ Kan weliy ko fa binem e article ni denen e taareb rogon ko malfith. (Matt. 6:12; Luke 11:4) Ere gubin yay ni gad ra denen nib togopuluw ngak Jehovah ma gowa be ga’ e malfith rodad. Rib ga’ e malfith rodad ngak! Machane nap’an nra n’ag fan e denen rodad, ma gowa bod ni ke thang urngin e malfith rodad ke m’ay. Der ma lemnag ni ngad pied puluwon e denen rodad ni ke n’ag fan. Ri gad ma felfelan’ u nap’an nra n’ag Jehovah fan e denen rodad ni bod rogon be’ ni ma felfelan’ u nap’an nra math gubin e malfith rok!

11. Mang e be yip’ fan fare thin ni be yog e Bible ni kan “chuweg” e denen rodad? (Acts 3:19)

¹¹ Gathi kemus ni ma thang Jehovah e malfith rodad, ya ku ma chuweg nge chuw. (Mu beeg e Acts 3:19.) Ra ngan susunnag ma ngam lemnag be’ ni gowa ke yoloy ba X nib ga’ nga daken urngin e salpiy ni malfith rom u babyor. Yugu aram rogon ma sana ka rayog ni ngan guy fapi namba ni kan tay e X nga daken. Machane ba thil e bin ni ngan chuweg ban’en. Ra ngad nanged fan e re fanathin ney, mab t’uf ndab da paged talin ni ink ni yima fanay kakrom e ba mom ni ngan thangthang ko ran. Rayog ni nge fek be’ bangi sponge nib munur nge thangthang fapi n’em ni kan yoloy. Ere nap’an ni yira “chuweg” e malfith rok be’ ma gowa kan thang ke m’ay ndabkiyog ni ngan guy e n’en kan yoloy nga babyor. Gowa bod nda immoy fare malfith. Ri gad ba felfelan’ ngay ni kad nanged nnap’an nra n’ag Jehovah fan e denen rodad, ma ma rin’ u reb e kanawo’ nra m’ug riy ni gowa dawor da rin’ed fapi denen!​—Ps. 51:9.

12. Mang e gad be fil ko fare fanathin ni murung’agen bangi manileng?

¹² Ki fanay Jehovah reb e fanathin nib chugur ko biney ni nge weliy rogon ni ma chuweg e denen. I gaar: “Kug chuweg e denen rom ni bod bangi manileng.” (Isa. 44:22) Nap’an nra n’ag Jehovah fan e denen rodad ma gowa bod ni ke fanay bangi manileng nib dub’ag ni nge mithag e denen rodad nga fon ya nge dab kud guyed, maku arrogon ir ndab ki guy.

13. Nap’an nra n’ag Jehovah fan e denen rodad, ma uw rogon e re n’ey u wan’dad?

¹³ Mang e gad be fil ko re n’ey? Nap’an nra n’ag Jehovah fan e denen rodad, ma susun e dab da pared u n’umngin nap’an e yafos rodad ni yugu be magawon lanin’dad ni bochan e denen ni ud rin’ed. Kan pi’ puluwon e denen rodad ni gubin u daken rachaen Jesus Kristus. Ere nap’an nra n’ag Jehovah fan reb e denen ni kad rin’ed, ma gowa bod ndawor da rin’ed fare denen. Aray rogon nri ma n’ag fan e kireb rodad u nap’an ni kad kalgadngan’dad.

 RA FAL’EG JEHOVAH E THA’ U THILDAD BAYAY

14. Mang fan nrayog ni nge pagan’dad ngay nra n’ag Jehovah fan e denen rodad? (Kum guy e sasing.)

¹⁴ Bochan nri ma n’ag Jehovah fan e denen rodad, ma aram fan nrayog ni nge fel’ e tha’ u thildad. Re n’ey e ma ayuwegdad ndab da pared ni yugu be magawon lanin’dad ni bochan e denen ni ud rin’ed. Dariy rogon ni ngad magargad nri chey ma kab damumuw Jehovah ngodad ma be gay rogon ni nge gechignagdad. Dariy ba ngiyal’ nra rin’ e re n’ey. Mang fan nrayog ni nge pagan’dad ngak Jehovah u nap’an nra yog ni ke n’ag fan e denen rodad? I yog ngak Jeremiah ni profet ni gaar: “Bay gu n’ag fan e denen rorad u wun’ug ma dab ku gu lemnag e kireb ni kar ngongliyed.” (Jer. 31:34) Nap’an ni sul apostal Paul u daken e pi thin ney, me fanay ba thin ni taareb fan ngay ni be gaar: “Bay gu n’ag u wun’ug e denen rorad.” (Heb. 8:12) Machane mang e ri be yip’ fan e re n’ey?

15. Mang e be yip’ fan fare thin ndakir lemnag Jehovah e denen rodad?

¹⁵ Fare thin ni “lemnag” ni kan fanay u Bible e gathi gubin ngiyal’ ni be sor fan ngak be’ ni be lemnag ban’en ni ke buch kafram. Ya rayog ni be sor fan ngak be’ ni be rin’ ban’en. Fare pumoon nni tining nga baley i gek’iy u tooben Jesus e gaar ngak: “Ri ga ra lemnigeg ko ngiyal’ ni ga ra yib ni gur e kam mang pilung.” (Luke 23:​42, 43) Re pumoon ney e gathi kemus ni be yog ngak Jesus ni nge lemnag boch nga m’on. Ma n’en ni yog Jesus ngak e be m’ug riy nra rin’ ban’en ni aram e nge faseg ko yam’. Ere nap’an nra yog Jehovah ndakir lemnag e denen rodad, ma aram e be yip’ fan ni ke n’ag fan rodad ma dabki gechignagdad boch nga m’on ni bochan e denen rodad.

16. Mang e be taareb rogonnagdad e Bible ngay?

¹⁶ Ku be fanay e Bible yugu reb e fanathin ni nge ayuwegdad ni ngad nanged rogon e puf rogon ni ma yag ngodad ni bochan e ka rin n’ag fan e denen rodad. Kan taareb rogonnagdad ngak e piin yad e “sib rok e denen” ni bochan e gad bogi tadenen. Machane ke magar Jehovah ya bochan ni ke n’ag fan e denen rodad, ma aram e rayog ni ngan taareb rogonnagdad ngak  bogi sib ni kan ‘chuwegrad u pa’ e denen.’ (Rom. 6:​17, 18; Rev. 1:5) Arrogon, nap’an nra n’ag Jehovah fan e denen rodad ma ri gad ma felfelan’ ni bod ba sib ni kan pag ke yan.

17. Nap’an ni yira n’ag fan e denen rodad, ma uw rogon ni ma golnagdad? (Isaiah 53:5)

¹⁷ Mu beeg e Isaiah 53:5. Bin tomur e fanathin ni gad ra weliy e be taareb rogonnagdad ko girdi’ ni bay ba mit e m’ar rorad ni yira yim’ riy. Machane ke golnagdad Jehovah ni bochan e biyul ni maligach ni pi’ Fak. (1 Pet. 2:24) Nap’an ni gad ra denen, ma aram e kad kirebnaged e tha’ u thildad Jehovah. Machane bochan fare biyul ma rayog ni nge n’ag fan rodad miki fel’ bayay e tha’ u thildad. Nap’an nra gol be’ u ba mit e m’ar ni ke yib ngak nib ubchiya’, ma ri ma felfelan’. Ku arrogodad ni gad ma felfelan’ u nap’an nra fel’ bayay e tha’ u thildad Jehovah, mu kud fel’gad u wan’.

ANGIN NRA YIB NGODAD NI BOCHAN E MA N’AG JEHOVAH FAN E DENEN RODAD

18. Mang e kad filed ko fapi fanathin ni bay u Bible ni be weliy rogon ni ma n’ag Jehovah fan e denen rodad? (Kum guy fare kahol ni kenggin e “Rogon ni Ma N’ag Jehovah Fan e Denen Rodad.”)

¹⁸ Mang e kad filed ko fapi fanathin ni bay u Bible ni be weliy rogon ni ma n’ag Jehovah fan e denen rodad? Nap’an nra n’ag fan e denen rodad ma ma tay ni gowa dawor da rin’ed e pi denen nem, ma rayog ni nge pagan’dad ndab ki gechignagdad boch nga m’on ni bochan e pi denen nem. Re n’ey e ra bing e kanawo’ ngodad ni nge fel’ e tha’ u thildad e Chitamangidad ni bay u tharmiy. Maku reb e dab da paged talin nre n’ey ni ngarin n’ag fan e denen rodad e aram reb e tow’ath. Ma rin’ Jehovah e re n’ey ni bochan e t’ufeg nge runguy rok ni ma dag ko girdi’ ni tadenen, ma gathi bochan e bay mat’awdad ni nge n’ag fan e denen rodad.​—Rom. 3:24.

19. (a) Mang e susun ni ngad felfelan’gad ngay? (Roma 4:8) (b) Mang e gad ra weliy ko bin migid e article?

¹⁹ Mu beeg e Roma 4:8. Susun e nge bagadad me felfelan’ ngay ni Jehovah e ir fare Got ‘nriyul’ ni ma n’ag fan e kireb’! (Ps. 130:4) Machane faanra ngan n’ag fan e denen rodad, ma bay ban’en nib ga’ fan nthingar da rin’ed. I weliy Jesus ni gaar: “Faanra dab mu n’iged fan u wun’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy ndabiyog ni nge n’ag fan u wan’ e kireb ni kam rin’ed.” (Matt. 6:​14, 15) Ere ba tamilang nib t’uf ni ngad folwokgad u rogon ni ma n’ag Jehovah fan e denen. Machane uw rogon nrayog ni ngad rin’ed e re n’ey? Aram e n’en be weliy e bin migid e article.