1. Mang e ma yib ngan’um u nap’an ni ga ra lemnag rarogon Jehovah?

 KA AM guy rogon ni ngam susunnag rarogon Jehovah, fa? Mang e ma yib ngan’um u nap’an ni ga be meybil ngak? Yugu aram rogon ndabin guy Jehovah, machane boor e kanawo’ ni ma weliy e Bible murung’agen riy. Be yog ni “ir e yoror rodad,” ma ba “nifiy ni ma urfiy ban’en.” (Ps. 84:11; Heb. 12:29) Nap’an nni pilyeg e changar rok Ezekiel me yog ni Jehovah e bod ba malang ni sapphire, nge ba wasey ni be gal ramaen, nge ba ragim nib fel’ yaan. (Ezek. 1:​26-28) Bay boch e pi n’ey ni kan weliy u rarogon Jehovah nsana ri gad ra ngat ngay ara k’aring e marus ngodad.

2. Mang e rayog ni nge mo’maw’nag ngak boch e girdi’ ni ngar chugurgad ngak Jehovah?

² Sana ba mo’maw’ ni nge mich u wan’dad ni gad ba t’uf rok Jehovah ni bochan e dabiyog ni ngad guyed. Bay boch e girdi’ ni ma lemnag ndabiyog ni nge t’ufegrad Jehovah ni bochan e pi n’en ni i buch rorad kafram. Rayog nda i t’ufegrad e chitamangirad. Machane manang Jehovah rogon lanin’dad nge fan nrayog ni nge mo’maw’ ni ngad chugurgad ngak. Ere aram fan ni ke tamilangnag rarogon ngodad nib manigil u daken e Thin rok ya nge ayuwegdad.

3. Mang fan nsusun e ngad filed murung’agen e t’ufeg ni ma dag Jehovah?

³ T’ufeg e aram e re bugithin ni be tamilang rarogon Jehovah nrib fel’ rogon. (1 John 4:16) Ir e t’ufeg ma gubin ban’en ni ma rin’ u fithik’ e t’ufeg. Ba gol Got nga rogon ni ma dag e t’ufeg, ma ri kub gel e t’ufeg rok ya mus ngak e piin ndarur t’ufeged ni ku ma t’ufegrad. (Matt. 5:​44, 45) Gad ra weliy murung’agen Jehovah ko re article ney nge t’ufeg ni ma dag. Ra yoor ban’en nda filed u murung’agen e Got rodad, ma aram e rra gel feni t’uf rodad.

RI GAD BA T’UF ROK JEHOVAH

4. Uw rogon u wan’um e t’ufeg rok Jehovah? (Kum guy e sasing.)

⁴ “Somol e ri ma runguy . . . e girdi’.” (Jas. 5:11) Ke taarebrogonnag ir ngab matin ni ma t’ufeg fak. (Isa. 66:​12, 13) Mu susunnag ba matin ni be ayuweg bochi tir ni fak u fithik’ e t’ufeg. Ke fek  fachi tir ke tay nga daken ay ma be non ngak nib sumunguy. Nap’an nra yor ara amith bang u dow, ma aram me pi’ e tin nib t’uf rok. Ere nap’an nra amith lanin’dad ma rayog ni nge pagan’dad ngay nra t’ufegdad Jehovah. I yoloy fare psalmist ni gaar: “Yu ngiyal’ nder paslagan’ug ma ke magafan’ug, mag fal’eg lanin’ug nggu felan’.”​—Ps. 94:​19, BT.

5. Uw rogon u wan’um e t’ufeg rok Jehovah u fithik’ e yul’yul’?

⁵ Ba yul’yul’ Jehovah. (Ps. 103:8) Nap’an ni gad ra oloboch ma der ma mulan’ u puluwdad. Yugu aram rogon ni boor yay ni i kirebnag fare nam nu Israel laniyan’ machane i yog ko girdi’ rok ni kar kalgadngan’rad nri yad ba t’uf rok u daken e pi thin ni baaray ni be gaar: “Ri gab fel’ u wun’ug ma bochan e ri gab t’uf rog ma aram e gu be gagiyegnagem nguun tayfam.” (Isa. 43:​4, 5, BT) Dawori thil rogon ni ma dag Got e t’ufeg. Gubin ngiyal’ nrayog ni ngad taga’gad ko t’ufeg rok. Mus ni faanra kad rin’ed reb e denen nib ubchiya’ ma der ma pagdad Jehovah. Faanra da kalgadngan’dad ngad sulod ngak, ma gad ra guy ni ka gad ba t’uf rok. Ke micheg nra “n’ag fan” u wan’ urngin e kireb rodad. (Isa. 55:7) Be yog e Bible ni aram e ngiyal’ nra ‘pi’ Somol ngodad e ngiyal’ ni nge yib gelngidad.’​—Acts 3:​19, 20.

6. Mang e be fil e Zekariah 2:8 ngodad u murung’agen Jehovah?

⁶ Mu beeg e Zekariah 2:8. a Bochan ni gad ba t’uf rok Jehovah, ma aram fan ni ma lemnag rogon lanin’dad ma baadag ni nge yororiydad. Ma kireban’ u nap’an nra guy ni be kireban’dad. Aram fan nrayog ni ngad meybilgad ni nge lungudad: “Mu ayuwegneg ni bod ni ga ma ayuweg e tir u marwam.” (Ps. 17:​8, BT) Ba mom ni ma amith tiren marowdad, ma aram bang u dowdad nrib ga’ fan. Ere nap’an nra taareb rogonnagdad Jehovah ko tir u marwan ma gowa be gaar, ‘En nra gafgownagmed e girdi’ rog e be gafgownag ban’en nrib ga’ fan u wan’ug.’

7. Mang fan nib t’uf ni ngari pagan’dad ni gad ba t’uf rok Jehovah?

⁷ Baadag Jehovah ni nge mich u wan’dad ni gad ba t’uf rok. Machane manang nrayog ni nge maruwar u wan’dad ko rayog ni nge t’ufegdad fa danga’ ni bochan e pi n’en ni i buch rodad kafram. Fa reb e sana rayog ni gad be mada’nag boch e magawon e chiney ni be skengnag rogon e pagan’ rodad ko t’ufeg rok Jehovah. Ere mang e ra gelnag e pagan’ rodad? Aram e ngad filed  rogon ni ma t’ufeg Jehovah Jesus, nge piin kan dugliyrad, nge gadad ni gad gubin.

ROGON NI MA DAG JEHOVAH E T’UFEG ROK

8. Mang fan nib mich u wan’ Jesus nib t’uf rok e Chitamangin?

⁸ Bokum bilyon e duw ni i gelnag Jehovah nge Fak nib t’uf rok e t’ufeg u thilrow. Yow e th’abi n’uw nap’an ni kar parew u taabang. I tamilangnag Jehovah gelngin nib t’uf Jesus rok ko Matthew 17:5. Yugu rayog ni nge gaar Jehovah, ‘Ireray e cha’ ni kari felan’ug ngak.’ Machane baadag ni ngad nanged gelngin nib t’uf Jesus rok, ere aram fan ni yog ni ‘ir Fak nrib t’uf rok.’ Rib felfelan’ Jehovah ngak Jesus nib ga’ ni bochan e ba m’agan’ ngay ni nge pi’ e yafos rok ni fan ngodad. (Efe. 1:7) Ma Jesus e rib mich u wan’ nrib t’uf rok e Chitamangin. Boor yay ni i yog u fithik’ e pagan’ nib t’uf rok e Chitamangin.​—John 3:35; 10:17; 17:24.

9. Mang thin e be tamilangnag rogon gelngin e t’ufeg rok Jehovah ko piin kan dugliyrad? Mu tamilangnag. (Roma 5:5)

⁹ Ku be yog Jehovah nib t’uf rok e piin kan dugliyrad. (Mu beeg e Roma 5:5.) Mu tay fanam i yan ko fare thin ni “puog.” I yog ba ken e dictionary ko Bible nre t’ufeg nem e “ke map’ nga dakendad ni bod ba lul’.” Re n’ey e be tamilangnag gelngin nrib t’uf e piin kan dugliyrad rok Jehovah! Piin kan dugliyrad e yad manang ni “yad ba t’uf rok Got.” (Jude 1) I weliy apostal John rogon lanin’rad u nap’an ni yoloy ni gaar: “A mu guyed nga rogon fadad t’uf rok e en ni Chitamangiy! Rogon ni gadad ba t’uf rok e ri ba ga’, ni aram tapgin ma ka nog ni gadad pi fak Got.” (1 John 3:1) Machane gur, kemus ni yigoo piin kan dugliyrad e yad ba t’uf rok Jehovah, fa? Danga’, ya ke dag Jehovah ni gad gubin ni gad ba t’uf rok.

10. Mang e bin th’abi fel’ e kanawo’ ni ke dag Jehovah riy ni gab t’uf rok?

¹⁰ Mang e bin th’abi fel’ e kanawo’ ni ke dag Jehovah e t’ufeg rok riy? Ke dag u daken fare biyul. Aram rogon ni ke dag Jehovah gelngin e t’ufeg rok riy ni kab gel nga rogon e t’ufeg ni ke dag be’! (John 3:16; Rom. 5:8) I pi’ Fak nrib t’uf rok me pag ni nge yim’ ni fan ngak urngin e girdi’ ya nge yag ni n’ag fan e denen rodad ma gad mang fager rok. (1 John 4:10) Faanra ud fal’eged i lemnag tolngin puluwon e n’en ke pi’ Jehovah nge Jesus ni fan ngodad, ma aram e rayog ni ngari tamilang u wan’dad gelngin nri gad ba t’uf rorow ni be’ nge be’. (Gal. 2:20) Dan pi’ fare biyul nri bochan e nge puluw nga rogon ni ma rin’ Jehovah ban’en u reb e kanawo’ nib mat’aw. Ya re n’ey e ba tow’ath nni pi’ ni bochan e t’ufeg. Ke dag Jehovah nri gad ba t’uf rok ni aram e ke pi’ Jesus ni maligach ni ir e en th’abi t’uf rok. I pag Fak ni nge gafgow me yim’ ni fan ngodad.

11. Mang e gad be fil ko Jeremiah 31:3?

¹¹ Kad filed ni gathi kemus ni gad ba t’uf rok Jehovah, ya ku ma yog ngodad gelngin nri gad ba t’uf rok. (Mu beeg e Jeremiah 31:3.) Ke pow’iydad ngak ni bochan e gad ba t’uf rok. (Mu taarebrogonnag ko Deuteronomy 7:​7, 8.) Dariy ban’en ara be’ nrayog ni nge daregdad ko re t’ufeg nem. (Rom. 8:​38, 39) Uw rogon e re t’ufeg ney u wan’um? Mu beeg e Psalm 23 ya ngam guy rogon ni i lemnag David e t’ufeg rok Jehovah, nge n’en nrayog ni nge k’aringem e re t’ufeg ney ni ngaum lemnag.

UW ROGON U WAN’UM E T’UFEG ROK JEHOVAH?

12. Uw rogon ni ga ra weliy e n’en bay ko Psalm 23?

¹² Mu beeg e Psalm 23:​1-6. Psalm 23 e ba tang ni be weliy rogon nib pagan’ David ngay nib t’uf rok Jehovah ma ma ayuweg. David ni ir e yoloy e re tang ney e i weliy rogon feni chugur e tha’ u thilrow Jehovah ni ir e en ma gafaliy ni bod Be’ ni Ma Gafaliy e Saf. Ba pagan’ David ngay ni nge pag Jehovah ni nge pow’iy, ma gubin ngiyal’ ni i taga’ ngak. Manang ni t’ufeg rok Jehovah e ra i un ngak u n’umngin nap’an e yafos rok. Mang fan nrib pagan’ ko re n’ey?

13. Mang fan nib pagan’ David ngay nra ayuweg Jehovah?

 ¹³ “Dakuriy ban’en nga bayang ni nge yog ngog.” Manang David nib fel’ rogon ni yibe ayuweg ni bochan e gubin ngiyal’ ni i pi’ Jehovah e tin nib t’uf rok. Ku manang ni Jehovah e fager rok ma kub fel’ u wan’. Aram fan nib pagan’ ngay ndemtrug e n’en nra buch rok boch nga m’on ma ra ulul Jehovah ni nge pi’ e tin nib t’uf rok. Bochan ni i pagan’ David ngay nib t’uf rok Jehovah ma ra ayuweg ko tin nib t’uf rok, ma aram fan nda i magafan’ ma i par nib felfelan’.​—Ps. 16:11.

14. Uw rogon nrayog ni nge ayuwegdad Jehovah u fithik’ e t’ufeg?

¹⁴ Ma ayuwegdad Jehovah u fithik’ e t’ufeg nib ga’ nu nap’an nra buch boch ban’en nib kireb rodad. Claire b ni ke pag 20 e duw ni ke pigpig u Bethel e daki nang rogon ni nge ayuweg e tabinaw rok u nap’an nra mada’naged boch e magawon nra chuw reb miki yib reb. I stroke e chitamangin, min tharbog reb e ppin ni walagen ko ulung, me magawon e tabinaw rok ko salpiy, maku thingar ra chuwgad ko naun ni yad ma par riy. Uw rogon ni dag Jehovah ni be ayuwegrad u fithik’ e t’ufeg? I yog Claire ni gaar: “Gubin ngiyal’ ni i ayuwegmad Jehovah ko tin nib t’uf romad u reb e rran ngu reb. Boor yay ni i pi’ e tin nib t’uf romad nge pag nga urngin nug lemnag nra pi’! Ba ga’ nug ma lemnag rogon ni ayuwegmad Jehovah ma dab gu pagtalin rogon ni i t’ufegmad. Pi n’ey e ke ayuwegeg ni nggu athamgil u fithik’ e pi magawon nug ma mada’nag.”

15. Mang fan ni sul gelngin David ngak? (Kum guy e sasing.)

¹⁵ “Ma fulweg gelngig ngog.” Bay yu ngiyal’ ni i kireban’ David ni bochan e magawon nge skeng ni i mada’nag. (Ps. 18:​4-6) Machane t’ufeg ni i dag Jehovah ngak nge rogon ni i ayuweg e fulweg gelngin ngak. I pow’iy Jehovah e re fager  rok nem ni ke aw parwon nga “daken e ted nib galunglung e pan riy” nge “yungi ran nib machalbog ma mmocha’ e ran u lan.” Bochan e re n’ey, ma aram me sul gelngin David me yag ni nge ulul ko pigpig ngak Jehovah u fithik’ e felfelan’.​—Ps. 18:​28-32.

16. Uw rogon ni ke pi’ e t’ufeg rok Jehovah gelngim?

¹⁶ Ku arrogon e ngiyal’ ney ni “bochan e t’ufeg rok Jehovah u fithik’ e yul’yul’, ma aram fan ni kad gad ma ulul” ko pigpig ni gad ma tay u nap’an ni kad mada’naged boch e skeng nge magawon. (Lam. 3:​22, NW; Kol. 1:11) Am lemnag e n’en ni buch rok Rachel. Ri kireban’ u nap’an ni chuw figirngin miki tal ko pigpig ngak Jehovah u nap’an fare m’ar ni COVID-19. Ere mang e rin’ Jehovah ni fan ngak? I yog ni gaar: “I guy Jehovah rogon ni nggu nang ni gub t’uf rok. I pi’ boch e fager ngog ni yad ma tay e tayim ni fan ngog, ma yad ma yib ra pied e ggan ngog, ma yad ma yoloy boch e thin nge thin nu Bible ngar pied ngog ni be m’ug riy ni yad be lemnageg, ma yad ma sap ngog mar siminmingad, maku yad ma puguran ngog ni be ayuwegeg Jehovah. Gubin ngiyal’ ni gu ma pining e magar ngak Jehovah ni ke pi’ reb e tabinaw nib ga’ ngog ni yad ma t’ufegeg.”

17. Mang fan ‘nde tamdag’ David?

¹⁷ “Dab gu tamdag, ya ga ba’ rog!” Boor yay ni i par e yafos rok David nga thatharen e riya’, maku boor e toogor rok nib gel gelngirad. Machane t’ufeg rok Jehovah e ayuweg ni nga i par nib pagan’ ma manang ndabi buch ban’en rok. Manang David ni urngin ban’en ni be buch rok ma bay Jehovah rok, ma re n’ey e pi’ e pagan’ ngak. Aram fan nrayog ni nge tang ni gaar: “I chuweg [Jehovah] urngin e marus rog.” (Ps. 34:4) Yugu aram rogon ni i rus David, machane t’ufeg rok Jehovah e kab gel ko marus rok.

18. Faanra ga manang ni gab t’uf rok Jehovah, ma uw rogon nrayog ni nge pi’ gelngim u nap’an ni ke yib e marus ngom?

¹⁸ Faanra gad manang ni gad ba t’uf rok Jehovah, ma uw rogon nra pi’ gelngidad u nap’an ni ke yib e marus ngodad? Bay reb e pioneer ni ka nog Susi ngak ni weliy rogon lanin’row figirngin u nap’an ni li’ ba pagel ni fakrow ir nge yim’. I gaar: “Nap’an nra buch ban’en rom nrib gel e kireb riy, ma rayog ni ngari magawonnagem mag lemnag ndakuriy bang nrayog ni ngam pirieg e ayuw riy. Machane t’ufeg rok Jehovah e ke ayuwegmow ni nggu parew nib pagan’mow ma gamow manang ndabi buch ban’en romow.” Rachel ni faan kan weliy murung’agen e yog ni gaar: “Bay reb e nep’ nri amith lanin’ug nib gel, mi ri magafan’ug, miki yib e marus ngog nib gel, ma aram mug meybil ngak Jehovah nib ga’ lamag. Ka chingiyal’ nem mug thamiy ni ke gapaseg lanin’ug ni bod e n’en ma rin’ ba matin ngak bochi tir ni fak, ma aram mug mol. Dab gu pagtalin e re n’ey ni buch rog.” Bay reb e piilal ni ka nog Tasos  ngak ni aningeg e duw ni par u kalbus ni bochan e siyeg ni nge un ko salthaw. Uw rogon ni guy rogon ni be t’ufeg Jehovah ma be ayuweg? I yog ni gaar: “I pi’ Jehovah urngin ban’en nib t’uf rog nge ku boch ni boor. Re n’ey e micheg nga lanin’ug nrayog ni ngari pagan’ug ngak. Maku reb e ki ayuwegeg Jehovah u daken gelngin nib thothup ni nggu par ni gub felfelan’ ni yugu aram rogon nug be par u bangi ban’en nib mom ni nge kireban’ug riy. Re n’ey e ayuwegeg ni nggu nang ni faanra i pagan’ug ngak, ma aram e ra ug par ma gu manang ni gub t’uf rok. Ere gu tabab ko pigpig ngak u kalbus ni gag reb e regular pioneer.”

MU CHUGUR NGAK E GOT ROM NI GAB T’UF ROK

19. (a) Faanra gad manang ni gad ba t’uf rok Got, ma mang e ra rin’ ko meybil rodad ngak? (b) Mang e kan weliy u murung’agen e t’ufeg rok Jehovah nri ga baadag? (Mu guy fare kahol ni kenggin e “ Boch e Thin Nra Ayuwegdad ni Ngad Nanged ni Gad Ba T’uf rok Jehovah.”)

¹⁹ Fapi cha’ ni kad weliyed murung’agrad e gubin ni be micheg ni bay Jehovah rodad ni ir fare “Got ni gadad ba t’uf rok”! (2 Kor. 13:11) Ma lemnagdad ni be’ nge be’. Mab mich u wan’dad ni ‘be yororiydad ko t’ufeg rok ni dabi mus.’ (Ps. 32:10) Ra ud fal’eged i lemnag rogon ni ke dag ni gad ba t’uf rok, ma aram e rra riyul’ u wan’dad me gel e chugur ko tha’ u thildad. Rayog ni ngad meybilgad ngak nib puf rogodad ma gad weliy ngak gelngin nib t’uf ni nge t’ufegdad. Rayog ni ngad weliyed urngin e magafan’ rodad ngak ya ba pagan’dad ni manang fan ma ri baadag ni nge ayuwegdad.​—Ps. 145:​18, 19.

20. Uw rogon ni gad ma chugur ngak Jehovah ni bochan e gad ba t’uf rok?

²⁰ Gad baadag ni nge t’ufegdad Jehovah ni bod ni gad baadag ni ngad chugurgad nga tooben ba nifiy nib magowel u borran nib gel e garbeb. Yugu aram rogon nib gel gelngin e t’ufeg rok Jehovah, machane ku ma dag u fithik’ e sumunguy. Ere mu felfelan’ ni bochan e gab t’uf rok. Ma gad gubin ni manga yigi m’agan’dad nga rogon ni ma t’ufegdad ni aram e nge lungudad: “Ba t’uf Somol rog”!​—Ps. 116:1.