I fil Jesus ngak e girdi’ ni ngaur pared ni bay e gapas u thilrad. Machane bay bayay ni gaar ngak e pi apostal rok: “Dab mfineyed ni ku gub ni nggu fek e gapas i yib nga fayleng; danga’, gathi gub ni nggu fek e gapas i yib, machane ba sayden e kug fek i yib. Ya ku gub ni nggu pingeg e bitir ni pumoon ngar togopluwgad ngak e chitamangirad, ma ku er rogon e bitir ni ppin ni ngar togopluwgad ngak e chitiningrad, nge leengin be’ ngak e chitiningin figirngin.” (Matt. 10:34, 35) Mang e be yip’ Jesus fan?

Dabun Jesus ni nge yu raba’nag e girdi’ u lan e tabinaw, machane manang ni aram e n’en nra buch u lan boch e tabinaw ni bochan e pi n’en i fil ko girdi’. Ere piin yad baadag ni ngar manged boch i gachalpen Kristus mar uned ko taufe e ba t’uf ni ngar nanged ni bay yu ngiyal’ ndabi m’agan’ chon e tabinaw rorad ko n’en kar dugliyed. Bay yu ngiyal’ nrayog ni nge togopuluw e en mabgol rorad ngorad ara yugu boch i girdien e tabinaw rorad mar mo’maw’naged ngorad ni ngar pared ni yad ba yul’yul’ ko pi n’en i machibnag Kristus.

Be pi’ e Bible e athamgil nga laniyan’ e piin Kristiano ni ngar ‘pired ni ba aw e gapas u thilrad nge urngin e girdi’.’ (Rom. 12:18) Machane pi n’en i machibnag Jesus e rayog ni nge bod “ba sayden” ni kan fek nga lan boch e tabinaw. Ma buch e re n’ey u nap’an nra m’agan’ be’ u lan reb e tabinaw ko pi n’en i machibnag Jesus, machane yugu boch i girdien fare tabinaw e dubrad. Faanra buch e re n’ey, ma fapi girdi’ u lan fare tabinaw e kar ted yad ni “toogor” rok faen ke fil e tin riyul’.​—Matt. 10:36.

Pi gachalpen Kristus ni yad ma par u boch e tabinaw nib thil e michan’ ko girdi’ riy e bay yu ngiyal’ ni yad ma mada’nag e magawon ni ma skengnag rogon e t’ufeg rorad ngak Jehovah nge Jesus. Bod nrayog ni nge towasariyrad girdien e tabinaw rorad ndawor nanged e tin riyul’ ni ngar uned nga reb e madnom ko pi yurba’ i teliw ni googsur. Ere nap’an ni yad ra mada’nag e skeng ni aray rogon, ma mini’ e yad ra rin’ e n’en baadag? I gaar Jesus: “En ni kab t’uf rok e chitamangin ara chitiningin ngog e dariy rogon ni nge mang be’ rog.” (Matt. 10:37) Riyul’ ni gathi be yog Jesus ni faanra nge mang be’ reb i girdien, ma aram e thingari war e t’ufeg rok ngak e gallabthir rok. Ya be fil ngorad rogon ni ngar dugliyed ko mang e pi n’en th’abi ga’ fan u lan e yafos rorad. Faanra togopuluw girdien e tabinaw rodad ngodad ni bochan e gad be guy rogon ni ngad liyorgad ngak Jehovah, ma ka gad ra ulul ni ngad t’ufeged yad, machane gad manang ni kab ga’ fan e t’ufeg rodad ngak Got.

Dariy e maruwar riy nrayog ni ngari kireban’dad ko togopuluw ni be tay chon e tabinaw rodad ngodad. Yugu aram rogon ma pi gachalpen Jesus e thingar dab ra paged talin fapi thin ni yog ni be gaar: “En ndabi fek e kuruth rok [“fare ley i gek’iy rok,” NW] nge lek luwan eg e dariy rogon ni nge mang be’ rog.” (Matt. 10:38) Re n’ey e be yip’ fan ni piin Kristiano e yad manang ni togopuluw nra ur mada’naged u lan e tabinaw e aram boch e gafgow nthingari m’agan’ pi gachalpen Kristus ngay. Machane yad be athapeg nra boch nga m’on ma ra thilyeg girdien e tabinaw rorad e lem rorad ngar adaged ni ngar filed e Bible ni bochan e ngongol rorad nib fel’.​—1 Pet. 3:1, 2.