Fare bugithin ni Greek nib ga’ ni yima pilyeg ni “yul’yul’” e be yip’ fan “ban’en nrib manigil.” Ku rayog ni nge yip’ fan reb e fel’ngin nrib manigil ni ma m’ug ko ngongol rok be’.

Piin Kristiano e yad ma athamgil ni ngar folgad ko n’en ni yog apostal Paul ni faani gaar: “Gamad ba adag ni nguug rin’ed e tin nib mat’aw [“nguug yul’yul’gad,” NW] ni gubin ngiyal’.” Mang e ba muun ko re n’ey?

Yooren e girdi’ e ra kadbul u m’on ni nga ranod nga fithik’ e girdi’ ni yoor ma yad ma yaliy yaarad nga therek. Mang fan? Ya dubrad ni nga ranod nga fithik’ e girdi’ ni bay ban’en nib kireb u rogon yaarad. Machane, bay ban’en ni kab ga’ fan ko bin ni nge fel’ yaan piyan lolugen be’ ni kan th’ab ara nge fel’ yaan e mad rok. Bin riyul’ i rarogodad nder ma guy e girdi’ e aram e n’en nrayog ni nge fal’eg e ngongol rodad u p’eowchen e girdi’ ara kirebnag.

Be tamilangnag e Thin rok Got nib mom ni ngaud rin’ed e tin nib kireb ban’en. Be gaar e Genesis 8:21: “Ka nap’an ni kabran e girdi’, ma ba kireb e lem rok.” Ere, faanra ngad pared ni gad ba yul’yul’, ma thingar da guyed rogon ni ngad gelgad nga boch ban’en u rarogodad ni ma k’aringdad ni ngad denengad. I tamilangnag apostal Paul rogon ni i cham ko denen ni gaar: “Lanin’ug e ri ba adag fare motochiyel rok Got. Machane reb e motochiyel nib thil ko biney e gu be guy ni be maruwel u fithik’ i dowag​—reb e motochiyel ni be togopluw ko bin baaram e motochiyel ni ba adag lanin’ug. Ir e ke tiyeg ni gag e kalbus ko tin ni ba adag e denen ni ir e be maruwel u fithik’ i dowag.”​—Roma 7:22, 23.

Bod ni, faanra be k’aringdad gum’ircha’dad ni ngad rin’ed ban’en nib kireb ma dab kud yul’yul’gad, ma de t’uf ni ngad paged gadad ko pi n’en ni be ar’arnag lanin’dad, ya ka rayog ni ngad dugliyed e n’en nib fel’ ni ngad rin’ed. Ma nap’an ni gad ra siyeg e lem nib kireb, ma rayog ni ngad pared ni gad ba yul’yul’ ni mus ni faanra yooren e girdi’ u toobdad e darur yul’yul’gad.

Ra ngad pared ni gad ba yul’yul’, mab t’uf ban’en ni nga i gagiyegnag e ngongol rodad. Machane, rib gel e kireban’ riy ya boor e girdi’ ni kab ga’ fan u wan’rad rogon e ‘miti mad’ ni ngar chuwgad ngay ko bin ni ngar lemnaged ban’en ni ir e nga i gagiyegnag e ngongol rorad. Bochan e re n’ey, ma yad ma guy rogon ni ngar gayed e tawey rorad u fan ndarur yul’yul’gad u boch ban’en. I yog ba ken e babyor ni gaar: “Ba ga’ ni gad ma ban ara da sasalapgad u reb e kanawo’ nra m’ug riy ni gad boch e girdi’ ni gad ba yul’yul’.” (The (Honest) Truth About Dishonesty) Ere gur, bay ban’en nrayog ni nge ayuwegdad ni ngad nanged ko bay boch ban’en nrayog ni nge dab da yul’yul’gad riy fa dariy? Bin riyul’ riy e bay.

Bokum milyon e girdi’ u ga’ngin yang e fayleng ni kar pirieged nrayog ni nge ayuwegrad e thin nu Bible. Bay boch ban’en u lan e Bible nrayog ni nge gagiyegnag rogon e ngongol rodad. (Psalm 19:7) Rayog ni nge pow’iydad u boch ban’en ni bay rogon ko tabinaw rodad, nge maruwel, nge rogon e ngongol ni gad ma dag, nge boch ban’en ni bay rogon ko tha’ u thildad Got. Re n’ey e ka bay angin ke mada’ ko ngiyal’ ney. Gubin e pi motochiyel nge pi  kenggin e motochiyel u Bible nrayog ni nge ayuweg e girdi’ u gubin e pi nam u fayleng. Ere, faanra ud beeged e Bible, ma gad be fal’eg i lemnag e thin riy, ma gad fol ko pi fonow riy, ma aram e rayog ni ngad filed ngodad rogon ni ngaud yul’yul’gad mu ud rin’ed e tin nib fel’ ban’en.

Machane, faanra ngaud pared ni gad ba yul’yul’, ma de gaman ni kemus ni nge yag e bin riyul’ e tamilangan’ ngodad u lan e Bible. Ya gad manang ni ka gad be par u lan ba fayleng ni kari gel e kireb ko ngongol ko girdi’ riy ma gubin ngiyal’ ni yibe towasariydad ni ngaud uned ko pi ngongol ney. Aram fan nib t’uf ni ngad meybilgad ngak Got ni nge ayuwegdad. (Filippi 4:6, 7, 13) Faan gad ra rin’ e re n’ey, ma aram e rayog ni nge dab da rusgad ni ngad rin’ed e tin nib fel’ ma gad yul’yul’ u gubin ban’en.

Hitoshi ni faan kad weliyed murung’agen ko fa bin som’on e article e wer thin ni ir reb e tamaruwel nib yul’yul’. Chiney e ma maruwel rok be’ ni baadag e girdi’ nib yul’yul’. I yog Hitoshi ni gaar: “Gu be felfelan’ ni ke yag ni nggu pirieg reb e maruwel ni be ayuwegeg ni nga i par nib beech e nangan’ rog.”

Ku bay boch e girdi’ ni aray rogorad. Baaray murung’agen boch e girdi’ ni ke yib angin ngorad fare kenggin e motochiyel u Bible ni faan be yog ni ‘nguud yul’yul’gad’ u gubin ban’en.

• Ra Beech e Nangan’ Rom

  “Nap’an ni gaman 13 e duw rog, mug tal ko skul ma aram mu ug chagil ngak boch e girdi’ ni yad ba moro’ro’ ngaug rin’ed boch e maruwel u taabang. Ere, sogonap’an 95 e pasent ko pi salpiy ni ug thognag e ug fek u fithik’ e sasalap. Boch nga tomuren ma aram mug un ko mabgol, ma gamow tabab e pumoon rog ni nggu filed e Pi Mich Rok Jehovah e Bible u taabang. Gu filew ni Jehovah * Got e ba fanenikan e ngongol ndariy e yul’yul’ riy. Ere, gu dugliyew ni nggu thilyegew e ngongol romow. Nap’an e duw ni 1990 ma gamow ognag e yafas romow ngak Jehovah ma gamow un ko taufe nggu mangew l’agruw e Pi Mich Rok Jehovah.”​—Proverbs 6:16-19.

  “Kafram e yigoo chugum ko moro’ro’ e ba sug u naun rog, machane chiney e kug chuweg e pi chugum nem u tafenag; ma ke yag ni nge beech e nangan’ rog. Faan gu ra sul nggu lemnag urngin e duw ni ug rin’ boch ban’en u fithik’ e sasalap, ma gub felfelan’ ngay ni ke runguyeg Jehovah. Ku gub felfelan’ ni bochan e chiney e gubin e nep’ ni gu ra yan gu mol ma gu manang nib m’agan’ Jehovah ko n’en ni gu be rin’.”​—Cheryl, Ireland.

  “Nap’an ni pirieg e en nib ga’ ko maruwel rog nda gu fek e n’en ni kan ognag ngog u fithik’ e sasalap u tomuren ni kug rin’ed boch e maruwel ni fan ngak be’, ma aram me gaar ngog: ‘Be ayuwegem e Got rom ni ngam par ni gur be’ nrayog ni nge pagan’uy ngom! Gamad ba tow’ath ni ga be maruwel romad.’ Bochan ni gub yul’yul’ u gubin ban’en ma aram e n’en ni ke ayuwegeg ni nga i par e nangan’ rog nib beech u p’eowchen Jehovah Got. Ku be ayuwegeg ni nggu ayuweg chon e tabinaw rog nge boch e girdi’ ni ngkur pared ni yad ba yul’yul’.”​—Sonny, Hong Kong.

• Ra Gapas Lanin’um

  “Gu ma maruwel u reb e bank nib ga’. Girdi’ ni ma un ko biney e maruwel e yad baadag ni nge yoor e salpiy rorad ko bin ni ngaur yul’yul’gad. N’en nib ga’ ni ma lemnag e girdi’ e, ‘Faanra rayog ni nge fel’ rogon be’ miki ayuweg e salpiy ko nam, me ere mang e ba kireb riy ni nga yugu ni sasalap buchuuw?’ Machane, bochan ni gub yul’yul’, ma aram fan nib gapas lanin’ug. Kug dugliy u wan’ug ni nggu par ni gub yul’yul’ ndemtrug e n’en ni gu ra mada’nag nga tomuren. Manang e piin ni gu ma maruwel rorad ndab gu bannagrad ara gu ban ni fan ngorad.”​—Tom, Meriken.

• Ra Pagan’um Ngom

  “I yog e en ni gu ma maruwel u tan pa’ ni nggu ban u murung’agen boch e talin e maruwel ni ke yan nga bang, machane mu gog ndab gu rin’. Ere, nap’an ni yan i gagiyel ko mini’ e ke iring e pi talin e maruwel nem, me pining faen nib ga’ ko maruwel e magar ngog nda gu ban u murung’agen e pi n’em. Riyul’ nde mom ni ngan par ni yib yul’yul’ u lan ba fayleng ndaki yul’yul’ e girdi’ riy. Machane, faan gad ra rin’ ni aray rogon ma rayog ni nge pagan’ e girdi’ ngodad mu ur ted fadad.”​—Kaori, Sapan.

Ere, uw rogon u wan’um, gathi kab fel’ ni nge par be’ nib beech e nangan’ rok, mab gapas laniyan’, ma be pagan’ ngak ni bochan e ir be’ nib yul’yul’?