Fel’ nge Kireb: Ban’en Nthingar Mmel’eg
Rogon e ngongol nra ud rin’ed e ra dugliy ko gad ra felfelan’ fa danga’. Manang Jehovah Got e re n’ey. Aram fan ni baadag ni ngad folgad ko pi motochiyel rok.
Baadag Jehovah ni ngad pared u fithik’ e gapas nge felfelan’.
“I Gag Somol ni Got romed, faen baadag ni nge fil ngomed e tin nib fel’ me pow’iymed ko fare kanawo’ ni ngam marod riy. ‘Faan mang e um motoyilgad ko tin ku gog ni gu reg e thin riy ni ngan rin’! Ma aram e ra map’ e flaab nga dakenmed ni bod ba lul’ nder melik’. Ma aram e bay u mu gelgad ko mahl ni bod e n’ew ni be lobeb i yib nga dap’el’ay.’”—Isaiah 48:17, 18, BT.
Manang Got e bin th’abi fel’ e kanawo’ ni ngad pared riy ni bochan e Ir e Ke Sunmiydad. Baadag ni ngad folgad ko pi fonow rok ni bochan e ra yib angin ngodad. Nap’an ni gad ra fol ko pi motochiyel rok Got, ma de t’uf ni ngad lemnaged ko ra yib angin ngodad fa danga’. Ya gubin ngiyal’ nib puluw e n’en gad ra mel’eg, ma ra yibnag e gapas nge felfelan’ ngodad.
Der ma yog Jehovah ni ngad rin’ed ban’en ndabiyog rodad.
“Tin ni ke yog Somol ni nguum rin’ed ni ir e kug pi’ ngomed e daba’ e gathi ban’en nrib mo’maw’ fa gomanga ban’en ndabiyog ni ngam lethgad ngay.”—Deuteronomy 30:11.
Faanra ngad folgad ko pi motochiyel rok Got ni murung’agen e ngongol nsusun e ngaud rin’ed, ma sana ba t’uf ni ngad thilyeged rogon e lem nge ngongol rodad. Machane der yog Jehovah ni ngad rin’ed boch ban’en ndabiyog rodad. Bin riyul’ riy e manang e tin nrayog rodad ni bochan e Ir e Ke Sunmiydad. Ma nap’an ni gad ra nang rarogon nib fel’ rogon, ma gad ra guy ni “tin ni ke yog ni ngad rin’ed e gathi rib mo’maw’.”—1 John 5:3.
Be micheg Jehovah nra ayuweg e piin yad ra fol ko pi motochiyel rok.
“I gag e Somol ni Got rom; i gag e gu ma pi’ gelngim ma be lungug ngom, Dab mu rus; ya bay gu ayuwegem.”—Isaiah 41:13.
Rayog ni ngad folgad ko pi motochiyel rok Got ni bochan e ra ayuwegdad. Rayog ni nge ayuwegdad u daken e Thin rok ni aram e Bible ni ma pi’ e athamgil nge athap ngodad.
Bokum milyon e girdi’ u ga’ngin yang e fayleng ni kar guyed ni ke fel’ boch e par rorad ni bochan e yad be fol ko pi motochiyel u Bible. Ere mang ndab mu fil boch ban’en u murung’agen e pi fonow nib manigil ni bay u Bible? Rayog ni ngam tabab ko fare brochure ni kenggin e Mu Par Ndariy N’umngin Nap’an ni Gab Felfelan’! ni bay ko jw.org/yap ndariy puluwon. Baaray kenggin e pi guruy riy:
-
Uw Rogon Nra Ayuwegem e Bible?
-
Be Pi’ e Bible e L’agan’ Ngodad
-
Rayog ni Nge Pagan’um ko Bible, Fa?
Nap’an ni ga ra fal’eg i yaliy e n’en bay ko Thin rok Got ni aram e Bible, ma ga ra guy riy ni gathi ba ke babyor ni ke kakrom, ya “ma par ni ka rogon ni gubin ngiyal’.” (Psalm 111:8, BT) Gad ra fol ko pi motochiyel u Bible ni murung’agen e ngongol nsusun e ngaud rin’ed, ma aram e bin th’abi fel’ e kanawo’ ni ngad pared riy. Machane dabi towasariydad Got ni ngad rin’ed e re n’ey. (Deuteronomy 30:19, 20; Joshua 24:15) Ra bagadad ma ir rok e nge dugliy ni nge rin’.
