“Urngin e tin nib fel’ ni be pi’ Got ngodad nge urngin e tow’ath nrib manigil ma be yib u tharmiy ngodad, ni be yib rok Got nga but’, ni ir e sunumiy urngin ban’en ni be gal ramaen u lan e lang.” (James 1:17) Riyul’ nre thin nu Bible ney e be weliy murung’agen e gol ni ke dag Jehovah Got ngodad ni ir e Chitamangidad ni bay u tharmiy. Machane, u fithik’ urngin e tow’ath ni ke pi’ ko girdi’ ma bay taareb riy ni aram e bin th’abi fel’. Mang e re tow’ath nem? Fapi thin ni yog Jesus ni boor e girdi’ ni manang ni bay ko John 3:16 e be pi’ e fulweg ko re deer ney. Be gaar: “Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.”

Fak Got ni kari maagirag rok ni pi’ nib tow’ath e aram e bin th’abi fel’ e tow’ath ni ke yag ngodad ni bochan e rayog ni nge pithigdad ko denen, nge pilibthir, nge yam’. (Psalm 51:5; John 8:34) Demtrug gelngin e athamgil ni gad ra tay, ma dabiyog ni ngad chuwgad u tan gelngin e pi n’ey ni gadad rodad. Machane, bochan nri gad ba t’uf rok Got, ma aram me pi’ e n’en nib t’uf nra ayuwegdad ni ngad chuwgad u tan gelngin e denen. Bochan ni ke pi’ Jehovah Got Jesus Kristus ni Fak ni kari maagirag rok ni nge biyuliydad, ma aram fan ni piin ni yad ra fol e ra yag e athap ngorad ko yafos ni manemus. Machane, mang e re biyul nem? Mang fan nib t’uf ni ngan pi’? Ma uw rogon nrayog ni nge yib angin ngodad?

Biyul e aram puluwon ban’en ni ngan chuw’iy ngan sulweg ara puluwon be’ ni kan kol ni ngan pag. Be yog e Bible ni gal ga’ rodad ni aram Adam nge Efa e nni sunmiyrow ni yow ba flont, ma bay e athap rorow ni ngar parew u paradis u fayleng ndariy n’umngin nap’an, maku arrogon pi fakrow nra yib nga tomuren. (Genesis 1:26-28) Machane rib gel e kireban’ riy, ya mul gubin e pi tow’ath ney u pa’row ni bochan e ra dugliyew ndab ra folgow rok Got, ma aram mar denengow. Mang wenegan ni yib nga tomuren? Be pi’ e Bible e fulweg riy ni be gaar: “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.” (Roma 5:12) Ere, bochan e n’en ni rin’ Adam ma aram fan nde yag ni nge fakay boch e bitir nib flont, ya n’en ni buch e af e denen nge yam’ ngorad.

Machane faanra ngan biyul, ma n’en ni ngan pi’ e thingari taareb rogon nga puluwon e n’en ni kan kirebnag. Nap’an ni togopuluw Adam ngak Got ni lem rok, ma aram e ke denen, ma wenegan ni yib riy e mul e yafos rok nib flont u pa’. Be yog e Bible ni bochan e re n’ey, ma aram me par pi fak ni kar manged sib ko denen nge yam’. Ere, ku reb e yafos nib flont ni aram e yafos rok Jesus e ir e thingar ni pi’ nib maligach ni nge chuweg e girdi’ u tan gelngin e denen ni ke af ngorad. (Roma 5:19; Efesus 1:7) Bochan ni ke t’ufegdad Got ke pi’ e re biyul ney ni nge thang puluwon e yafos ni manemus u paradis u fayleng ni ke mul u pa’ Adam nge Efa, ma aram fan ni ke yag e athap ngodad nrayog ni ngki yag e re yafos nem ngodad bayay.​—Revelation 21:3-5.

Gad ra lemnag angin e re n’ey nra yib ngodad, ma dariy e maruwar riy ni fare biyul nib tow’ath ni ke pi’ Got ni nge bing e kanawo’ ngodad ni ngki yag e yafos ni manemus ngodad bayay e aram e bin th’abi fel’ e tow’ath ni kan pi’. Ra nge ga’ fan u wan’dad e re ‘tow’ath ney nrib manigil,’ ma aram e ngad weliyed e pi n’en ni kad weliyed ko fa binem e article ni be weliy rogon nrayog ni nge pi’ be’ reb e tow’ath nib manigil. Re n’ey e ra tamilangnag fan ni ireray e bin th’abi fel’ e tow’ath.

 Aram e n’en ni gad baadag ni nge yag ngodad. Gadad e girdi’ e gad baadag ni ngad pared ndariy n’umngin nap’an. Yugu aram rogon ndabiyog ni nge yag e re yafos ney ngodad ni gadad rodad, machane fare biyul e aram e n’en ni ke bing e kanawo’ ni ngki yag e re yafos nem ngodad bayay. Be gaar e Bible: “Denen e ma pi’ puluwoy​—ni yam’; machane tow’ath rok Got ngodad ndariy puluwon e yafos ndariy n’umngin nap’an nra pi’ u daken e taab girdi’ ni kad tiyed e Somol rodad i Jesus Kristus.”​—Roma 6:23.

Aram e n’en nib t’uf rodad. Dabiyog ko girdi’ ni ngar biyuliyed yad. Be gaar e Bible: “Puluwon e pogofan rok be’ e yugub pag feni tolang. Ya n’en ni nge pi’ ni puluwon ni fan e nge dab ki yim’ . . . e dabi gaman puluwon rok.” (Psalm 49:8, 9) Ere, rib t’uf ni nge ayuwegdad Got ya nge yag nda chuwgad u tan gelngin e denen nge yam’. Machane, ke pi’ e n’en nib t’uf rodad u daken fare biyul ni pi’ “Kristus Jesus.”​—Roma 3:23, 24.

Ba puluw e ngiyal’ ni kan pi’ riy. Be gaar e Bible: “Ka gadad be par ni gadad bogi tadenen me yan i yim’ Kristus ni fan ngodad!” (Roma 5:8) Ere, bochan ni kan biyuliydad u nap’an ni “ka gadad be par ni gadad bogi tadenen,” ma aram e n’en ni ke dag gelngin nri gad ba t’uf rok Got ni yugu aram rogon ni gad bogi tadenen. Maku reb e, yugu aram rogon ni ka gad be gafgow u wenegan e denen ni ke af ngodad, machane bay boch ban’en nrayog ni ngad athapeged boch nga m’on.

Rib ga’ fan ni ke pi’ ma be dag nri gad ba t’uf rok. Be yog e Bible e n’en ni k’aring Got ni nge pi’ Fak ni nge biyuliydad. Be gaar: “Baaray rogon ni dag Got ni gadad ba t’uf rok: i l’og Fak ni kari maagirag rok ngaray nga fayleng ni fan e nge yog e yafos ngodad u daken. Baaray rogon ni gadad ba t’uf rok Got: gathi ud pired nib t’uf Got rodad, ya ud pired ni gadad ba t’uf rok.”​—1 John 4:9, 10.

Uw rogon ni ngam dag nib ga’ fan u wan’um e bin th’abi fel’ e tow’ath ni kan pi’? Dab mu pagtalin ni yog Jesus ko John 3:16 ni kemus ni yigoo piin ni yad ra maruweliy e ‘michan’’ rorad ngak e ra yag e yafos ngorad. Michan’ nrogon ni be yog e Bible e aram e nge “pagan’dad ko pi n’en ni ir e ke l’agan’dad ngay.” (Hebrews 11:1) Ra nge yag e re pagan’ ney ngodad, ma aram e ba ga’ fan ni nge yag e bin nib puluw e tamilangan’ ngodad. Ere, gamad be pi’ e athamgil nga lanin’um ni ngam tay e tayim ni ngam fil murung’agen Jehovah Got ni ir e En Ke Pi’ e re ‘tow’ath ney nrib manigil.’ Mu kum fil murung’agen e n’en nthingar mu rin’ me yag fare yafos ni manemus ngom nra yag u daken fare biyul ni maligach ni ke pi’ Jesus.

Rayog ni ngam fil murung’agen e pi n’ey ni faan ga ra beeg boch ban’en nib puluw ko Bible ni bay ko www.mt1130.com. Ba felfelan’ e Pi Mich Rok Jehovah ngay ni ngar ayuweged gur. Ba pagan’mad ngay ni faan ga ra fil murung’agen e re tow’ath ney me yib angin ngom, ma aram e ga ra yog fapi thin ni be gaar: “Ke magar Got u daken e Somol rodad i Jesus Kristus!”​—Roma 7:25.