Mu susunnag e re n’ey: Gubin ngiyal’ nra sap Julia nge therek ma be lemnag ni kaygi ga’. Me gaar u wan’: “Ba t’uf ni nggu achichig.” Aray rogon e lem rok ni yugu aram rogon ni yugu be yog e gallabthir rok nge pi fager rok ngak ni “kaygi silek’lek’.”

Dawori n’uw nap’an ni ka fini lemnag Julia ni nge rin’ boch ban’en nib pag rogon ya nge yag ni ngki “mul lal e pawn rok.” Kemus ni n’en ni nge rin’ e nge kay e ggan nri buchuuw u lan in e rran . . .

Faanra bay ba ngiyal’ ni kam lem ni bod rogon Julia, ma mang e ngam rin’?

De kireb ni ngam lemnag rogon yaam. Bin riyul’ riy e, boor e pumoon nge ppin ni be yog e Bible ni yad ba pichoay ara pidorang. Pi girdi’ ney e ba muun ngay Sarah, nge Rachel, nge Abigail, nge Josef, nge David. Be yog e Bible ni immoy be’ nib pin ni ka nog Abishag ngak nrib “pidorang.”​—1 Kings 1:4.

Machane, boor e fel’ yangaren ni yugu yad ma lemnag rogon yaarad. Re n’ey e rayog ni nge k’aring boch e magawon nib ga’. Am lemnag e re n’ey:

• Kan gay murung’agen ma kan pirieg ni 58 e pasent u boch e rugod ni yad ma yog ni ka yugu ra sugsuggad e bin riyul’ riy e kemus ni 17 e pasent u fithik’rad e rriyul’ nib sugsug.

• Ku bay boch ban’en nni gay murung’agen min pirieg riy ni 45 e pasent u boch e ppin ni ka yugu ra silek’lek’gad e yad ma lemnag ni ka yugu ra sugsuggad!

• Bay boch e fel’ yangaren ni kar guyed rogon ni ngar achichiggad me munmun me yib ba mit e m’ar ngorad ni ka nog e anorexia ngay. Mit ney e m’ar e rayog ni nga nim’ riy ma ra bay rok be’ ma ma guy rogon ndabi abich ni bochan e be magar nri sugsug.

 Faanra bay boch ban’en ni ma buch rom ni be dag ni bay e re miti m’ar ney rom ara yugu ba mit e m’ar ni bay rogon ngay, ma aram e ngam ning e ayuw. Som’on e rayog ni ngam non ngak bagayow e gallabthir rom ara be’ nib piilal ni be pagan’um ngak. Be gaar e Bible: “Pi tafager e gubin ngiyal’ ni yad ma dag e t’ufeg rorad. Mang gam’engin e walag ni faanra dab ra puruy’naged e gafgow rorad?”​—Proverbs 17:17, BT.

Riyul’ ni bin riyul’ i rarogon be’ ndabiyog ni ngan guy e aram e n’en nra fal’eg yaan facha’ ara kirebnag yaan. Am lemnag Absalom ni fak David ni Pilung. Be gaar e Bible:

“Ga’ngin yu Israel ndariy taabe’ riy nib gilbuguwan nga feni pichoay. . . . Dariy tharan u lolugen nge mada’ nga bugul i ay.”​—2 Samuel 14:25.

Yugu aram rogon, ma Absalom e ir be’ nib tolangan’, ma baadag ni ngari yag ngak e n’en ni be nameg, mab sasalap! Aram fan nder weliy e Bible boch ban’en nib fel’ u murung’agen, ya be yog ni ir be’ nder ma tamra’, ma de yul’yul’, ma ma fanenikan e girdi’ ni baadag ni nge thang e fan rorad.

Aram fan ni be fonownagdad e Bible ni be gaar:

“Bin nib beech i gimed e ka mon’ed nga dakenmed.”​—Kolose 3:10.

“Dab mu ted ban’en nga dowmed ni nge fal’eg yaamed ngam pidoranggad . . . , ya lanin’med e nge par nib pidorang.”​—1 Peter 3:3, 4.

Yugu aram rogon nde kireb ni ngam adag ni nge fel’ yaam, machane bin riyul’ riy e kab ga’ fan ni nge yag boch e fel’ngin ngom nib manigil ko bin ni nge fel’ yaam. Pi fel’ngim nib manigil e aram e n’en nra fal’egem u p’eowchen e girdi’, ma gathi rogon fanam pichoay ara pidorang! Bochi pin ni ka nog Phylicia ngak e yog ni gaar: “Ra gab pidorang mab mom ni nge mit owchen e girdi’ ngom, machane bin riyul’ i rarogom ndabi guy e girdi’ nge pi fel’ngim nib manigil e aram e n’en ma par u laniyan’ e girdi’ nib mo’maw’ ni ngar paged talin.”

Dabum yaam, fa?

Bay ba ngiyal’ ni kam lemnag ni ngam un nga ba mit e diet nib pag rogon ya nge yag nim fal’eg ban’en nib kireb u rogon yaam, fa?

Faanra rayog ni ngam thilyeg boch ban’en u rarogom, ma mang e ga ra thilyeg? (Mmel’eg e fulweg rom.)

• N’UMNGIM

• TOMALNGIM

• PIYAN LOLUGEM

• SHAPE ROM

• OWCHEM

• RAMAEN DOWAM

Faanra fulweg rom ko gal nsom’on e deer e arrogon, ma kam mel’eg dalip ara boor ko dalip ban’en u tan e bin dalip e deer, ma aram e ngam lemnag e re n’ey: Rogon yaam u wan’um e sana gathi aram rogon ni ma lemnag yugu boch e girdi’. Ba mom ni ngam rin’ boch ban’en nib pag rogon me magafan’um nga rogon yaam nib pag rogon.​—1 Samuel 16:7.