Tó o bá fẹ́ mọ ẹnì kan, ó ṣeé ṣe kó jẹ́ pé ohun tí wàá kọ́kọ́ béèrè lọ́wọ́ ẹ̀ ni pé, “Kí lorúkọ ẹ?” Tó o bá bi Ọlọ́run ní ìbéèrè yẹn, kí lo rò pé ó máa sọ?

“Èmi ni Jèhófà. Orúkọ mi nìyẹn.”​—Àìsáyà 42:8.

Orúkọ náà ṣe pàtàkì sí Ọlọ́run fúnra ẹ̀. Kò sí ẹnì kankan tó fún Ọlọ́run lórúkọ yìí, òun ló fún ara ẹ̀. Jèhófà fúnra ẹ̀ sọ pé: “Èyí ni orúkọ mi títí láé, bí wọ́n á sì ṣe máa rántí mi láti ìran dé ìran nìyí.” (Ẹ́kísódù 3:15) Nínú Bíbélì, orúkọ Ọlọ́run ìyẹn Jèhófà fara hàn ju àwọn orúkọ oyè míì lọ, bí Olódùmarè, Baba, Olúwa, tàbí Ọlọ́run. Kódà ó tún fara hàn ju orúkọ àwọn èèyàn lọ, bí Ábúráhámù, Mósè, Dáfídì àti Jésù. Ìdí ni pé Jèhófà fẹ́ kí gbogbo èèyàn mọ orúkọ òun gangan. Bíbélì sọ pé: “Kí àwọn èèyàn lè mọ̀ pé ìwọ, ẹni tí orúkọ rẹ̀ ń jẹ́ Jèhófà, ìwọ nìkan ṣoṣo ni Ẹni Gíga Jù Lọ lórí gbogbo ayé.”​—Sáàmù 83:18.

Orúkọ náà ṣe pàtàkì sí Jésù. Nínú àdúrà táwọn èèyàn mọ̀ sí Àdúrà Olúwa, Jésù kọ́ àwọn ọmọ ẹ̀yìn ẹ̀ pé kí wọ́n máa bẹ Ọlọ́run pé: “Kí orúkọ rẹ di mímọ́.” (Mátíù 6:9) Jésù fúnra ẹ̀ gbàdúrà pé: “Baba, ṣe orúkọ rẹ lógo.” (Jòhánù 12:28) Bí Jésù ṣe máa fi ògo fún orúkọ Ọlọ́run ló ṣe pàtàkì jù sí i, ìdí nìyẹn tó fi sọ nínú àdúrà ẹ̀ pé: “Mo ti jẹ́ kí wọ́n mọ orúkọ rẹ, màá sì jẹ́ kí wọ́n mọ̀ ọ́n.”​—Jòhánù 17:26.

 Orúkọ náà ṣe pàtàkì sáwọn tó mọ Ọlọ́run. Àwọn èèyàn tó jọ́sìn Ọlọ́run láyé àtijọ́ mọ̀ pé tí wọ́n bá fẹ́ rí ààbò àti ìgbàlà, ó ṣe pàtàkì pé káwọn mọ orúkọ Ọlọ́run. Bíbélì sọ pé: “Orúkọ Jèhófà jẹ́ ilé gogoro tó lágbára. Olódodo sá wọ inú rẹ̀, ó sì rí ààbò.” (Òwe 18:10) Ó tún sọ pé: “Gbogbo ẹni tó bá ń ké pe orúkọ Jèhófà yóò sì rí ìgbàlà.” (Jóẹ́lì 2:32) Bíbélì fi hàn pé orúkọ Ọlọ́run máa fi ìyàtọ̀ sáàárín àwọn tó ń jọ́sìn Ọlọ́run àtàwọn tí kò sìn ín. “Gbogbo èèyàn yóò máa rìn ní orúkọ ọlọ́run wọn, àmọ́ àwa yóò máa rìn ní orúkọ Jèhófà Ọlọ́run wa títí láé àti láéláé.”​—Míkà 4:5; Ìṣe 15:14.

Ó jẹ́ ká dá Ọlọ́run tòótọ́ mọ̀. Ọ̀pọ̀ àwọn ọ̀mọ̀wé Bíbélì ló gbà pé orúkọ náà Jèhófà túmọ̀ sí “Alèwílèṣe.” Jèhófà fúnra ẹ̀ jẹ́ ká mọ ìtumọ̀ orúkọ ẹ̀ nígbà tó ń sọ nípa ara ẹ̀ fún Mósè pé: “Èmi Yóò Di Ohun Tí Mo Bá Fẹ́.” (Ẹ́kísódù 3:14) Torí náà, orúkọ yẹn ní ìtumọ̀ tó jinlẹ̀ ju pé kéèyàn kàn pe Ọlọ́run ní Ẹlẹ́dàá ohun gbogbo. Orúkọ yẹn jẹ́ ká mọ̀ pé Ọlọ́run ní agbára láti ṣe ohunkóhun, ó sì lè lo ìṣẹ̀dá rẹ̀ èyíkéyìí láti ṣe ohunkóhun tó bá ní lọ́kàn. Àwọn orúkọ oyè kan ń tọ́ka sí ipò Ọlọ́run, àṣẹ tó ní tàbí agbára ẹ̀. Àmọ́ orúkọ ẹ̀ gangan ló sọ irú ẹni tó jẹ́ ní pàtó àti ohun tó lè ṣe.

Ó jẹ́ ká mọ̀ pé Ọlọ́run nífẹ̀ẹ́ wa. Ìtumọ̀ orúkọ Ọlọ́run fi hàn pé ó nífẹ̀ẹ́ gbogbo nǹkan tó dá títí kan àwa èèyàn. Bí Ọlọ́run ṣe sọ orúkọ ẹ̀ fún wa jẹ́ kó dá wa lójú pé ó fẹ́ ká mọ òun. Kò retí pé ká béèrè lọ́wọ́ òun, fúnra ẹ̀ ló sọ ọ́ fún wa. Láìsí àní-àní, Ọlọ́run fẹ́ ká mọ̀ pé òun kì í ṣe àdììtú, àmọ́ òun jẹ́ ẹni tó wà lóòótọ́, a sì lè sún mọ́ òun.​—Sáàmù 73:28.

Tá a bá ń lo orúkọ Ọlọ́run, ńṣe là ń fi hàn pé a nífẹ̀ẹ́ ẹ̀. Àpẹẹrẹ kan rèé, ká sọ pé o pàdé ẹnì kan tó o fẹ́ bẹ̀rẹ̀ sí í bá ṣọ̀rẹ́, o wá sọ fún un pé orúkọ ẹ gangan lo fẹ́ kó máa pè ẹ́. Àmọ́ ní gbogbo ìgbà tẹ́ni náà bá rí ẹ, orúkọ míì ló máa ń pè ẹ́. Báwo ló ṣe máa rí lára ẹ? Ó ṣeé ṣe kó o máa rò ó pé ẹni náà ò ṣe tán láti di ọ̀rẹ́ ẹ. Bẹ́ẹ̀ náà ló rí pẹ̀lú Ọlọ́run. Jèhófà ti sọ orúkọ ẹ̀ fún wa, ó sì gbà wá níyànjú pé ká máa lò ó. Tá a bá ń lo orúkọ náà, ńṣe là ń jẹ́ kí Jèhófà mọ̀ pé a fẹ́ sún mọ́ ọn. Kódà, Ọlọ́run máa ń fiyè sí ‘àwọn tó ń ṣàṣàrò lórí orúkọ ẹ̀ tàbí àwọn tó ka orúkọ ẹ̀ sí pàtàkì!’​—Málákì 3:16.

Tá a bá fẹ́ mọ Ọlọ́run, ìgbésẹ̀ àkọ́kọ́ ni pé ká mọ orúkọ ẹ̀. Àmọ́, a ò gbọ́dọ̀ jẹ́ kó parí síbẹ̀. Ó tún yẹ ká mọ irú ẹni tó jẹ́.