Ohun tó sábà máa ń jẹ́ káwọn kan kórìíra àwọn míì ni ohun tí kì í ṣòótọ́ tí wọ́n gbọ́ nípa wọn. Wo àwọn àpẹẹrẹ yìí:

• Àwọn agbanisíṣẹ́ kan gbà pé àwọn obìnrin ò lè ṣiṣẹ́ tó jẹ mọ́ sáyẹ́ǹsì, iṣẹ́ agbára tàbí iṣẹ́ tó gba àròjinlẹ̀.

• Nígbà àtijọ́ nílẹ̀ Yúróòpù, wọ́n fẹ̀sùn èké kan àwọn Júù pé wọ́n ń da májèlé sínú àwọn kànga, wọ́n sì ń mú kí àrùn tàn káàkiri. Bákan náà, nígbà ìjọba Násì, wọ́n tún fẹ̀sùn èké kan àwọn Júù. Lọ́tẹ̀ yìí, wọ́n sọ pé àwọn ló jẹ́ kí ètò ọrọ̀ ajé dẹnu kọlẹ̀ lórílẹ̀-èdè Jámánì. Láwọn ìgbà méjèèjì yìí, ìyà ńlá ni wọ́n fi jẹ́ àwọn Júù. Kódà, àwọn kan ṣì ń fojú burúkú wò wọ́n títí dòní.

• Ọ̀pọ̀ èèyàn gbà pé gbogbo àwọn aláàbọ̀ ara ni kì í láyọ̀, ọkàn wọn sì máa ń bà jẹ́.

Àwọn ẹlẹ́tanú tó gba irú ọ̀rọ̀ yìí gbọ́ máa ń tọ́ka sí àwọn àpẹẹrẹ tàbí ẹ̀rí tó jọ pé ó bá èrò wọn mu. Wọ́n sì gbà pé aláìmọ̀kan lẹ́ni tó bá ta ko èrò wọn.

“Kò dára kí èèyàn wà láìní ìmọ̀.”​—ÒWE 19:2.

Kí la rí kọ́? Téèyàn ò bá mọ òótọ́ ọ̀rọ̀, ìpinnu tí kò dáa lèèyàn máa ṣe. Téèyàn bá fòótọ́ sílẹ̀ tó wá gba ìtàn àròsọ gbọ́, ńṣe lá kàn máa fojú burúkú wo àwọn èèyàn.

Tá a bá mọ ohun tó jẹ́ òótọ́ nípa àwọn èèyàn, a ò ní tètè máa gba ọ̀rọ̀ tí kò dáa táwọn èèyàn ń sọ nípa wọn gbọ́. Nígbà tá a  bá sì ti mọ pé wọn ò sọ òótọ́ nípa àwọn èèyàn kan fún wa, a máa fẹ́ mọ ohun tó jẹ́ òótọ́ nípa wọn.

• Tí wọ́n bá sọ pé ẹ̀yà kan burú, rántí pé kì í ṣe gbogbo àwọn tó wá látinú ẹ̀yà náà ló burú.

• Rántí pé o ò lè mọ gbogbo nǹkan nípa àwọn èèyàn.

• Sapá láti gbọ́ òótọ́ ọ̀rọ̀ látẹnu ẹni tó ṣeé fọkàn tán.