Ẹlẹ́dàá wa ti jẹ́ káwọn èèyàn mọ àwọn òfin tó de ìgbéyàwó tipẹ́ kí àwọn ìjọba tó bẹ̀rẹ̀ sí í gbé òfin kalẹ̀ lórí ọ̀rọ̀ ìgbéyàwó. Ìwé àkọ́kọ́ nínú Bíbélì sọ fún wa pé: “Ọkùnrin yóò . . . fi baba rẹ̀ àti ìyá rẹ̀ sílẹ̀ tí yóò sì fà mọ́ aya rẹ̀, wọn yóò sì di ara kan.” (Jẹ́nẹ́sísì 2:24) Ìwé atúmọ̀ ọ̀rọ̀ inú Bíbélì kan sọ pé ọ̀rọ̀ náà “aya” lédè Hébérù “ń tọ́ka sí obìnrin.” Jésù mú kó ṣe kedere pé “akọ àti abo” ni a gbọ́dọ̀ máa so pọ̀ nínú ìgbéyàwó.—Mátíù 19:4.

 Nítorí náà, ohun tí Ọlọ́run fẹ́ ni pé kí ìgbéyàwó wà títí lọ, kí ó sì jẹ́ láàárín ọkùnrin àti obìnrin tí wọ́n nífẹ̀ẹ́ ara wọn. Ọlọ́run dá ọkùnrin àti obìnrin lọ́nà tí wọ́n á fi lè jẹ́ àṣekún ara wọn, kí wọ́n lè fi ara wọn lọ́kàn balẹ̀, kí wọ́n lè ní ìbálòpọ̀, kí wọ́n sì lè bímọ.