Ebrewita 12:1-29
12 Ape yariku rameana yaneruaki kuaita siyawaita umaawaita yande arama, yarikute yaxari yanesui panye ipusewaa, panye yanepuxuwerasawa yuiri uikuwaa yanerese, ape yarikute yayana tiyanekuere ipiri kua yanerunde kitiwaa.
2 Yarikute yamaa sese kua Jesus, kua uyupiruwaa uruyari, umukaturu yuiri kua yaruyariwaa, kua uaguentariwaa upurara kurusa rese sesewara kua suuriwaa umaawaa senundere, timaa arama ixupe kua aintaumutiĩ ae, asui kuiri uwapika ikatusawa upe kua Deus trunu kiti.
3 Ape perikute pemanduari kua uaguentariwaa turusu aintaumuruanyana rame ae turusu kuaita puxuwerawaita, tiarama pekuere penye, tiarama yuiri pitua peruyari.
Yamuruanyana yanepuxuwerasawa
4 Tire pemburi peruwi pemuruanyana resewara pepekadu.
5 Maitaa timaarese penye isui kua umbeuwaa penye arama kuaye tairaita yawe? Nyãse yawe unyee: Inde seraira, teremaa puxi Neruixawa supe uxari rame repurara nepuxuwerasawa resewara, terexari ae umpurarakari rame inde.
6 Nyãse Yaneruixawa umpurarakari panye kuaita ugustariwaita, asui unupa panye kuaita tairaita usuantiwaita.
7 Perikute peaguentari umpurarakari rame penye, nyãse Deus umunya yande arama kuaye taira yawe. Nyãse awataa kua taina tiwa ipaya umpurarakari ae ipuxuwerasawa resewara?
8 Tirame umpurarakari penye pepuxuwerasawa resewara kuaye umpurarakariwaa yawe penye panye, ape maa ipayaimawaita penye, asui timaa tairaita penye.
9 Nyãse yarikute yanepaya kua mundu upewaraita umpurarakariwaita yande yanepuxuwerasawa resewara, asui yawaite yamaa ainta supe. Ape turusu piri yaruyari inyenga kua espiritu paya yapaka kuri yande irumu.
10 Nyãse kuaita yanepayaita kua mundu puraita aintaumpurarakari yande kuairantu kuaye aintauputariwaa yawe, maa kua Deus umpurarakari yande yaiku arama puranga, yariku arama yamanduarisawa purangawaa kuaye iyawe.
11 Maa umpurarakari rame yande sasi yasaã ae, timaa umusuuri yande, maa arireana uxari tiyanepiaiwa yande, uxari yuiri purangawaa yamanduarisawa yande umpurarakariwaita.
12 Ape pemusanta peipu pituawaita, pemukirimbawa perinipia membekawaita;
13 Pemusatambika peipi rapee tiarama kuri uyereu uyumuapiriwaa upe kua alejadu, maa puranga arama kuri ae.
Yaruyari arama puranga
14 Pesikari timaarese peiku puranga aintairumu panye kuaita apigawaita, pesikari yuiri pemanduariwaa ikiaimawaa, nyãse ikiawaa irumu tikuri pemaa yaneruixawa.
15 Pemaa pesui yawaite yepe pesuiwara tiuriku Deus purangasawa, yawaite usemu pesui sapu irawawaa utiari arama penye, umukia arama kuaita siyawaita.
16 Pemaa pesui yawaite ikiawaa umanduarisawa kua yepe, yawaite tiumanduari Deus kuaye kua Ezau yawe, kua uxariwaa ituyuwesawa kua itainasawa supe umbau yepe viaji rikuyara.
17 Nyãse pekuawate yawe rire uputari rame ixupe arama kua purangawaa tiaintauxari ixupe ae, nyãse tiupuderi utrukari umanduarisawa, asui uyaxiu, uputari resewara utrukari umanduarisawa.
Jesus kua umusasawasara
18 Nyãse tipemusuaki kua yapuderi yapisika yaneipu irumu, kua tata sendiwaa, kua pitunawasuwaa, kua sasiyarasawa, kua trevada yuiri,
19 Tiyuiri pemusuaki trumbeta tiapusawa, tiyuiri kuaita upurungitawaita kirimbawa, asui kuaita usenduwaita ainta supe aintauputari aintaupitu aintaupurungita.
20 Nyãse tiaintaupuderi aintawaguentari suaxara kua nyenga umbeuwaa ainta supe, yawe unyee: Awa upisika kua iwitera rese aintauyuká ae ita irumu, ate suu yuiri.
21 Nyãse turusu yawaite kua aintaumaawaa, asui Muize umbeu: Hasikie, hariri yuiri.
22 Maa pesikana ipiri kua iwitera serawaa sião, setama yuiri kua Deus upakawaa, Jeruzalẽ kiti kua iwaka kitiwara, aintapiri yuiri kuaita anjuita siyawaita, ipiri yuiri panye kuaita uyumuatiriwaita Deus yaraita ainta.
23 Pesikana ipiri iingreja kiti kuaita primeruwaita kuaita urikuita aintarera iwaka kiti, Deus ipiri yuiri kua umbeuwaa aintaresewara panye, aintaespiritu ipiri yuiri kuaita apigawaita purangawaita umukaturuwaita,
24 Ipiri yuiri kua Jesus kua umusasawasara kua umbeuwaa pisasua, pemusuaki suwi umburiwaa umbeu yande arama puranga piri Abel ruwi sui.
25 Pemaa pesui yawaite tiperuyari kua upurungitawaa penye arama. Nyãse tirame aintaueskapari ainta tiwaita usendu kua upurungitawaa ainta supe kuxima kua mundu upe, tiyuiri kuri yaeskapari yande tirame yaruyari kua upurungitawaa yande arama iwaka sui.
26 Inyenga irumu umuriri kuera kua mundu, maa kuiri umbeu yande arama: ’Amu ara kuri hamuriri yuiri kuri kua mundu, timaa kua mundunyu, maa iwaka yuiri.
27 Umbeu rame kuera yepe viajite kuri hamuriri kua mundu, asui ipupete uxari yakuawa umburi kuri kua umuririwaita aintasuiwara kuaita umunyawaita, aintauiku arama santa kuaita tiwaita upuderi umuriri.
28 Ape yarikute yaxari suuri yanepia, nyãse yarikute yaneretama tiwa upuderi umuriri; ape yarikute yamee Deus supe purangawaa kuaye uputariwaa yawe yamanduari resewara ae puranga, yasikie resewara yuiri isui.
29 Nyãse tata sendiwaa kua yaneDeus.
